Eńbegine – laıyqty qurmet

Muǵalim – el erteńi sanalatyn óskeleń urpaqty tárbıeleıtin eń mártebeli mamandyq

Almatydan – Mıra BAIBEK

Almaty qalasyndaǵy Sultanahmet Qojyqov atyndaǵy №39 mamandandyrylǵan lıseıde ustaz eńbegin ulyqtaý maqsatynda «Ustaz aty – bıik ári máńgilik» atty taqyrypta kórkemónerpazdar konserttik baǵdarlama usyndy. Konsert barysynda lıseıdiń ardager ustazdary Tursyngúl Tasbolatova, Kúlásh Serjanova, Zarıa Ysqaqovanyń eren eńbekterin eleý maqsatynda syı-qurmetter kórsetildi. Kásibı eńbek jolynda joǵary nátıjege jetken, shákirtterdi patrıottyq tárbıege baýlýda ónege bola bilgen lıseı ustazdary Kúláıhan Sarymbetova, Gúlbaqyt Sanjıeva, Tolqyn Baıǵalıeva, Qudaıbergen Qulshyǵashov «Nur Otan» partııasynyń maqtaý qaǵazdarymen marapattaldy. Bilim basqarmasynyń marapattaýyna Sáken Júnisbek, Gúljan Seıitova, Qudaıbergen Latypov syndy ustazdar laıyq dep tanyldy. Col kúni qaladaǵy №147 gımnazııa da muǵalimder kúnin zor qýanyshpen atap ótti. Mektep oqýshylarynyń uıymdastyrýymen «Meniń súıikti ustazym» atty sýret kórmesi men «Ustazǵa  myń alǵys!» atty merekelik jıynda aýdandyq bilim basqarmasynyń atynan qoǵamdyq jumystarǵa belsene aralasqany úshin Marjan Rahanova men Raıhan Ámetovaǵa Alǵys hat tabys etildi. Gımnazııa dırektory Roza Mákejanova pedagogıkalyq ujymdasy Gaýhar Súndetbaeva, Aqmaral Muhametkárimova, Zárý Izembetova, Tolqyn Qanafına sııaqty úzdikterge maqtaý qaǵazdaryn tapsyrdy. Merekelik kesh mekteptegi kórkemónerpazdar úıirmesi músheleriniń shyrqap salǵan ánimen jalǵasty.  ALMATY

Semeıden – Raýshan NUǴMANBEKOVA

«Qazirgi zamanda bilim deńgeıi joǵary ult qana jahandaný talaptaryna jaýap bere alady. Sondyqtan bilim salasy – eldiń erteńin aıqyndaıtyn, onyń básekelestik qabiletine yqpal etetin asa mańyzdy sala», dep Elbasymyz aıtqandaı, egemen eldiń bolashaǵy úshin táýelsizdigimizdi tuǵyrlandyratyn óskeleń urpaqty tárbıeleýshi ustazdardyń kásibı merekesi Semeı qalasy boıynsha atalyp ótti. Shákárim atyndaǵy memlekettik ýnıversıtettiń rektory Meıir Eskendirov qaladaǵy ustazdar qaýymyn shyn júrekten quttyqtaǵannan keıin, kezinde Semeı memlekettik pedagogıkalyq ınstıtýtynda oqyǵan jáne uzaq jyldar jas urpaqty tárbıeleýge úlken úles qosqan muǵalimderge «Jyl muǵalimi» marapatyn tabys etti. Mundaı marapatqa №37 mektep-gımnazııa dırektory Jumaǵazy Stambekov te ıe bolyp, áriptesterin áspettegen bul kúnge erekshe rıza ekendigin aıtty. Merekege oraı Astanadan arnaıy kelgen akademık-ǵalym Ǵarıfolla Esim, búginde ǵylym-bilim salasyna degen talaptar ózgergenmen, ustazdyń mártebesi eshqashan joǵalmaq emes degen oıyn ortaǵa saldy. – Men ózim 80 jyldyq tarıhy bar osy oqý ornynyń túlegimin. Shákirtterin bilim nárimen sýsyndatyp, adamgershilik rýhta baǵyt-baǵdar berýde oqytýshylardyń eńbegi zor. Sondyqtan da muǵalim árdaıym qasıetti tulǵa retinde erekshelenedi, sondaı ustazdardyń biri Amantaı Isauly, – deı kele Ǵarıfolla Esim zalda otyrǵan ýnıversıtettiń professory, tarıhshy-ǵalym Amantaı Isınniń keýdesine «Shákárim» medalin taqty.  SEMEI

Shymkentten – Baqtııar TAIJAN

Muǵalimderdiń tól merekesi Shymkenttegi «Tatý» saltanat saraıynda laıyqty atalyp ótti. Jıynda olardy oblys ákimi Beıbit Atamqulov arnaıy quttyqtap, qıly da qyzyq eńbekterine tabys tiledi. Kásibı merekede kóptegen ustazdar sandaǵan jyldardaǵy eńbekteriniń jemisin kórip, memlekettik nagradalarǵa ıe boldy. Olar bilim qyzmetkerleri úshin eń úlken marapat Ybyraı Altynsarın atyndaǵy arnaıy tósbelgige laıyq dep tanyldy. Solardyń biri – Sozaq aýdanyndaǵy gımnazııa mektebiniń dırektory, aýdandyq máslıhattyń depýtaty Berik Turǵynbekov «Uly Muhań, Muhtar Áýezov: «El bolam deseń, besigińdi túze», dep aıtqan. Jas bala qalaı ıseń solaı maıysatyn jas shybyq sııaqty. Kóp jylǵy eńbegimizde marapat úshin emes, elimizdiń keleshegi durys bolýy úshin eńbek ettik. Sol eńbegimizdiń baǵalanǵanyna rızamyz», dedi. Ońtústik ustazdary tól merekesi qarsańynda úlken tabysqa jetkenin sóz yńǵaıynda aıta keteıik. Astanada ótken respýblıkalyq «2016 jyldyń úzdik pedagogy» baıqaýynda Tóle bı aýdanyndaǵy №1 mektep-gımnazııanyń qazaq tili men ádebıeti pániniń muǵalimi Nurıla Baıtasova konkýrs jeńimpazy boldy. Sonymen qatar, respýblıka mektepteri arasyndaǵy baıqaýda Shymkenttegi Y.Altynsarın atyndaǵy №66 mektep-gımnazııasy birinshi oryndy jeńip aldy.

Tarazdan –  Oralhan DÁÝIT

Árbir adam óziniń balalyq shaǵyn eske alǵanda, oqyǵan mektebi, alǵashqy muǵalimi týraly aıtady. Muǵalimniń árbir jyly sózi, qamqor kóńili, sonymen birge talapshyl minezi shákirtteriniń esinde máńgi qalady. Iаǵnı, árbir tárbıeli shákirt aıaýly ustazdaryn qurmet tutady. Jaǵymdy beınesin ózine úlgi etedi. Osyndaı el bolashaǵyna ólsheýsiz qyzmet etetin jandardyń eńbegi árqashan qurmetteýge laıyq! Jambyl oblysynyń ustazdary Táýelsizdiktiń 25 jyldyǵyn joǵary jetistiktermen qarsy alǵaly otyr. Bıylǵy jyly respýblıkalyq, halyqaralyq baıqaýlarda 176 jambyldyq muǵalimniń jeńimpaz bolyp tanylýy, daryndy oqýshylardyń halyqaralyq olımpıadalar men ǵylymı jarystarda 68 medaldy, respýblıkalyq pán olımpıadasynyń qorytyndysy boıynsha besinshi jyl qatarynan birinshi komandalyq oryndy ıelenýi – oblys mektepterindegi tynymsyz eńbektiń nátıjesi ekeni anyq. Bul kúni oblystyń bilim berý júıesin damytý men jetildirýge qosqan eleýli jeke úlesi jáne jas jetkinshekterdi oqytý men tárbıeleýdegi jetistikteri úshin birqatar bilim qyzmetkerleri oblys ákiminiń «Qurmet» gramotasymen, «Qazaqstan Respýblıkasy bilim berý isiniń qurmetti qyzmetkeri» jáne Y.Altynsarın  atyndaǵy tósbelgimen, «Eńbek ardageri» medalimen marapattaldy. Sondaı-aq, oblystyq «Úzdik pedagog» konkýrsynyń jeńimpazdary da oblys ákiminiń Alǵys hatyna jáne baǵaly syılyqtarǵa ıe bolyp, úlken qýanyshqa bólendi. Jambyl oblysy