Sem Ýolker – «Kazakhstan open» chempıony

Almatydaǵy «Jaılaý» golf klýbynda 29 qyrkúıek pen 2 qazan aralyǵynda «Kazakhstan Open - 2016» halyqaralyq týrnıri ótip, oǵan álemniń 25 elinen 132 oıynshy qatysty. Halyqaralyq jarys dástúr boıynsha Pro-Am týrnırinen bastaldy. Bul úlken oıyn aldyn­daǵy sońǵy tııanaqty daıyn­dyq sııaqty shara eken. Ol, sondaı-aq, qatysýshylardyń ózara tanysyp, til tabysýyna sebep bolady. Osy kezeń úshin de qomaqty júlde tigildi. Bıyl­ǵy jeńim­paz­darǵa Maldıv jaǵa­jaıy­na joldama berildi. Álemdik deńgeıdegi golf al­paýyt­tarynyń úzdigin anyq­taı­tyn týrnır – Londonda ótetin Eýropa týry oıyndary. Oıynshylar oǵan jetý úshin birneshe deńgeıden tura­tyn halyqaralyq jarystar uıym­dastyrylady. Sonyń biri – «Kazakhstan Open». Osymen on ekinshi jyl ótken saıysty «European Challenge Tour» uıymy, Qazaqstannyń golf federasııasy jáne «Jaılaý» golf klýby uıymdastyrdy. Almaty qalasy­nyń ákimdiginiń qoldaýymen sátti aıaqtalǵan oıyndardyń turaq­ty bas demeýshisi «Eurasian Resource Group» kompanııasy bol­dy. Sheteldik jáne otandyq buqara­lyq aqparat quraldarynda keńinen nasıhattalǵan týrnırdiń negizgi aqparattyq seriktesi bolý «Egemen Qazaqstan» gazeti úshin de dástúrge aınaldy. Sonymen, on ekinshi týrnır nesimen este qaldy? Osy suraqty uıymdastyrýshylarǵa da, sheteldik oıynshylarǵa da qoıyp kórdik. Dittegen jaýap bireý: «Joǵary deńgeıde uıymdastyrylǵan minsiz ári qomaqty qarjy tigilgen oıyn». Ásirese, «Kazakhstan Open-2016» halyqaralyq týrnıriniń bıýdjeti sheteldikter úshin eleń eterlik. Áýel basta fransýz oıynshysy Roman Langaske aıtyp edi: «Bas júldege tigilgen 72 000 eýro meni Qazaq­stanǵa jeteledi», dep. Qo­naq­­tardyń aıtýynsha, mundaı qomaqty qarjyny báske tigetin elder sanaýly. Dál osy 72 000 eýro tura­tyn bas báıge aǵylshyn oıynshysy Sem Ýolkerdiń qan­jyǵasyn maılady. Jasyl qyrat ústinde 270 ret sátti soqqy jasap, 18 upaı jınaǵan kásipqoı golfshi qarsylastaryna qarasyn kórsetpedi. Bul – Sem myrzanyń az ýaqyt aralyǵyndaǵy ekinshi úlken jeńisi. Ol tamyz aıynda Fınlıandııada ótken «Vierumäki Finnish Challenge» týrnırinde de jeńimpaz bolǵan. Jarystyń ekinshi júldesi Ýolkerdiń jerlesi, aǵylshyn Djordan Smıtke buıyrdy. Al úshinshi orynǵa nıderlandtyq Raıner Sakston kóterildi. – Oıynnyń sońǵy kúni qıyn jaǵdaıda ótti. Jańbyr men qar aralasyp jaýyp, el-sel etti. Degenmen, dittegen nátı­jege jettim-aý... Osyndaı oıyn uıym­­­dastyryp, qatysýǵa múm­kin­­dik bergen sizderge rahmet. «Báıterek» kýbogyn qolyma ustaý baqyty buıyrǵanyna bek qýa­nysh­tymyn. Qazaqstan jasasyn! – deıdi «Kazakhstan Open-2016» halyqaralyq týrnıriniń chempıony Sem Ýolker. Qalmahanbet MUQAMETQALI, «Egemen Qazaqstan»  ALMATY