Búgin Májilis depýtattary «Qazaqstan Respýblıkasynyń keıbir zańnamalyq aktilerine ekstremızmge jáne terrorızmge qarsy is-qımyl máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.
Jobany depýtattarǵa Ulttyq qaýipsizdik komıteti tóraǵasynyń orynbasary Marat Qalqabaev tanystyrdy. Zań jobasy Memleket basshysynyń tapsyrmasy boıynsha ázirlendi. Maqsat – ekstremızmge jáne terrorızmge qarsy is-qımyl, qarý-jaraq aınalymy jáne kóshi-qondy retteý salasyndaǵy qoldanystaǵy zańnamany jetildirý.
Qalqabaevtyń aıtýynsha, Aqtóbe men Almatydaǵy sońǵy oqıǵalar ekstremızm jáne terrorızmge qarsy is-qımyl salasynda zańnamaǵa ózgerister engizý qajettigin kórsetken.
Búginde lańkestiktiń qaqtyǵystar aımaǵynan shyǵyp jaıylý úrdisi anyq baıqalyp otyr. Jobany daıarlaý kezinde sońǵy kezderi elimizde jáne álemde oryn alǵan lańkestik qylmystar eskerý, lańkestik áreketke jol bermeý maqsatyndaǵy otandyq jáne sheteldik tájirıbe saraptaý negizinde jasaldy dedi Qalqabaev.
Sonymen ekstremızm men terrorızmge qarsy qoldanystaǵy zańǵa qandaı ózgerister engizilmek? Bul týraly biz ne bilýimiz qajet?
- Jańa joba qoldanystaǵy 5 kodeks jáne 19 zańǵa ózgerister engizýdi qarastyrady.
- Qylmystyq kodekste terrorlyq qylmystar úshin jaza qataıady. Ekstremızm jáne terrorızm úshin sottalǵandardyń dúnıe-múlki mindetti túrde tárkilenedi.
- Ákimshilik tártip buzýshylyq kodeksinde qarý-jaraq aınalymy, kóshi-qon salasyndaǵy tártip buzýlar úshin jaýapkershilik kúsheıtiledi.
- Jeke tulǵalardy tirkeýsiz turǵyzǵan úı ıeleri ákimshilik jaýapqa tartylady.
- Ýaqytsha meken-jaı jáne turaqty meken-jaıǵa tirkelýdiń tártibin buzǵan tulǵalarǵa kórsetiletin qyzmet kólemi shekteledi.
- Tır ashý jáne onyń jumysyn júrgizý tártibin buzǵany, jeke kúzet uıymdary qyzmetkerleriniń arnaıy kıimdi zańsyz kıgeni úshin ákimshilik jaýapkershilik engiziledi.
- Qarý-jaraqtyń jekelegen túrleriniń aınalymy týraly zańda qarý-jaraq saýdasyn jáne ony saqtaýdy qadaǵalaý kúsheıtiledi. Sonymen qatar bul saladaǵy kásipkerlik te qatań baqylaýǵa alynady.
- Qarý satatyn dúkenderdiń ornalasqan jerine baılanysty talaptar paıda bolady. Qarý-jaraqty atýǵa daıyn kúıinde satýǵa tyıym salynady.
- Azamattar ustaı alatyn qarý-jaraq sany qazir bes saıly jáne bes tegis uńǵyly bolsa, ol eki saıly jáne eki uńǵyly bolyp azaıatyn bolady.
- Kúzet uıymdaryna aıryqsha talaptar qoıylady. Máselen, azamattardy kúzetshi qyzmetine jumysqa alýdyń naqty sharttary paıda bolýy múmkin. Eger olar qarý-jaraq, oq-dári jáne jarylǵysh zattar saqtalǵan nysandardy kúzetetin bolsa, ol nysandarda dabyl qaǵylǵan jaǵdaıda kúzetshilerge birden ishki ister organdaryna habar berý mindetteledi.
- Terrorızmge jáne ekstremızmge qatysy bar dinı toptar men birlestikterdiń qyzmetine tyıym salynady.
- Mádenıet jáne sport mınıstrligi dinı týrızm salasynda is-áreket júrgizýdiń tártibin anyqtaıtyn normatıvti-quqyqtyq akt qabyldaıtyn bolady.
- Qazaqstannyń zańdaryn buzǵan sheteldikterdi elden shyǵarýdyń negizderi naqtylanady.
- «Baılanys týraly zańǵa» da ózgerister engiziledi. Baılanys salasyn qadaǵalaıtyn organǵa kezek kúttirmeıtin, aýyr jáne aýyr qylmystarǵa aparýy múmkin tótenshe jaǵdaılarda baılanys júıeleri men toraptarynyń jumysyn toqtata alatyn quziret beriledi.
- Qazaqstannyń baılanys júıesinde IMEI-kodtary birdeı abonenttik qurylǵylardy paıdalanýǵa jol bermeý sharalary qarastyrylady. Ol úshin Qazaqstanda qoldanylatyn jáne kirgiziletin búkil qurylǵylardyń biryńǵaı IMEI-kod bazasy jasalady.
- Qurylǵylardy paıdalanýshylardyń abonenttik nómirimen sáıkestendirý maqsatynda tirkeý mindeti engiziledi. Bul quqyq qorǵaý jáne arnaıy organdardyń tekserýin qajet etetin nysandardy jedel anyqtaýǵa múmkindik beredi. Kontrabandalyq qurylǵylardy kirgizýdi shekteıdi jáne urlyq-qarlyqty azaıtady.
- О́kiletti organdarǵa tirkelmegen abonenttik nómirlerdi anyqtaý úshin abonentterdiń qyzmettik aqparatyn qaraýǵa quziret beriledi.
