Qazaqstanda úleskerlik qurylys talaptary kúsheıedi

«Parlament «Turǵyn úı qurylysyna úlestik qatysý týraly» QR jańa Zańyn qabyldady. Ol 2016 jyldyń 10 qazanynan bastap engiziletin bolady dep habarlaıdy Egemen -aqparat primeminister.kz saıtyna silteme jasap. Jańa zańnamaǵa sáıkes, úleskerlerdiń qarajatyn tartýdyń úsh tásili qarastyrylǵan. Birinshi tásil – qor kepildigin alý arqyly úleskerlerdiń qarajatyn ulǵaıtý múmkindigi. Ekinshisi – jergilikti atqarýshy organnyń ruqsatymen, ekinshi deńgeıli banktiń qatysýymen, jáne úshinshisi - jergilikti atqarýshy organnyń ruqsat berýimen, turǵyn úıdiń qańqasy turǵyzylǵannan keıin», -  dep habarlady Astana qalasy Memlekettik sáýlet-qurylys baqylaýy basqarmasy basshysynyń orynbasary Dáýlet Dosqulov Astana ákimdigindegi baspasóz konferensııasynda. Onyń aıtýynsha, qurylys salýshylar kelesi talaptar oryndalǵan kezde ǵana úleskerlerdiń qarajatyn tarta alady. Ol - jer ýchaskesiniń bolýy, turǵyn úı nysandary qurylysynyń shyǵyndary smetasynan turatyn memlekettik saraptaýdan ótken jobalyq-smetalyq qujattama, sondaı-aq, tıisti ınjenerlik kommýnıkasııalardy qosý jumystary. «Kepildik berý qorymen shartqa qol qoıyp, kepildikke ıe bolǵan jaǵdaıda, qurylys salýshy qarajattardy tartýǵa quqyly bolady. Qalǵan eki tásil boıynsha tek jergilikti atqarýshy organnan úleskerlerdiń qarajatyn tartý boıynsha ruqsatyn alǵan kezde ǵana júzege asyrylady. Bul qyzmetti jergilikti atqarýshy organda, ıaǵnı Astana qalasynyń ákimdiginde qala sáýleti basqarmasy oryndaıtyn bolady. Munda qujattardy qabyldaý men qarastyrý jumystary jáne úleskerlerdiń qarajatyn tartýǵa ruqsattama daıyndalatyn bolady», - dep sózin túıindedi D. Dosqulov. Eske sala keteıik, áleýetti úleskerler men qurylys salýshylar kez-kelgen týyndaǵan suraq boıynsha Astana qalasy ákimdiginiń call-ortalyqtaryna 1414 telefony boıynsha habarlasýy kerek.