Jylyjaıda nıderlandtyq agronom jumys isteıdi

Qazir Aqtóbeniń saýda oryndarynan jyl boıy kókónis ónimderi úzilmeıdi. Buǵan gollandııalyq tehnologııamen jumys isteıtin «Izet GreenHouse» JShS eleýli úles qosyp keledi. Kishkene ǵana kesedeı qalbyrǵa otyrǵyzylǵan qyzanaq tuqymynyń kerilgen jińishke jipti qýalaı órmelep, sabaq salyp, ónim bergenin kórgende tańǵalaryń sózsiz. Bul budan bes-alty jyl burynǵy alǵashqy jylyjaılar salyna bastaǵandaǵy tańǵalýshylyq bolatyn. Qazir buǵan da et úırenip boldy. Degenmen, araǵa ýaqyt salyp kelgenimizde jylyjaıdaǵy qyzanaqtyń ornyn qııar basypty. Seriktestik dırektory Málik Qusaıynovtyń sharýanyń adamy ekenin burynnan da biletinbiz. Únemi izdeniste júretin isker jigit áńgimeni áriden órbitti. – 2008 jyly jer telimin alyp, jylyjaı salýǵa bel býdyq. Tańdaý jylyjaı sharýashylyǵynda álemdik ozyqtar qataryndaǵy Gollandııa tehnologııasyna tústi. Bir jyldan keıin qurylysty bastap kettik. Tehnologııa da, materıal da, olardy ornatqan mamandar da Gollandııadan ákelindi. 2010 jyly jeltoqsan aıynda jylyjaı tolyq paıdalanýǵa berildi, qyzanaq tuqymy da sol elden jetkizildi. 2011 jyly sáýirde alǵashqy ónimdi jınadyq. Bes jyl qatarynan qyzanaq egip, jylyna 1800 tonna qyzanaq jınap, ótkizdik. Bul jobaǵa salynǵan 1238 mıllıon teńge nesıeni tolyqtaı qaıtarýǵa múmkindik berdi, – deıdi ol paıdaly sharýany qolǵa alǵanyna rıza kóńilmen. Jobany «QazAgroqarjy» AQ qar­jy­landyrýymen Gollandııanyń «Dalsem Hor­ticultural Projects BV» kompanııasy jú­zege asyrdy. Jylyjaı kesheninde gollandııalyq tuqymdar paıdalanylady jáne Nıderlandtan shaqyrylǵan agronom Fred van Klıng turaqty negizde qyz­met isteı­di. Jylyjaı tolyqtaı gazben jyly­ty­lady. «Izet GreenHouse» JShS elimizdiń batys óńirin kókónis ónimderimen qamtamasyz etýge arnalǵan Qazaqstannyń ozyq ın­ves­tısııalyq jobalarynyń qataryna jatady. Oblys jáne qala ákimdikteriniń qol­daýymen keshen oblys naryǵy men dú­kenderin ónimdermen qamtamasyz etip otyr. О́nim mıneraldy tyńaıtqyshtardy qol­dana otyryp, gollandııalyq tehnologııa­men, ekologııalyq taza ádispen óndiriledi. Seriktestik óz ónimderin Reseıdiń Oryn­­­bor oblysyna ótkize bastady. Qa­zir jyly­­jaı kesheninde 50 adam eńbek etedi. Se­rik­testik jylyjaıda Aqtóbe aýyl sha­rýa­­­shylyǵy kolledj túlek­teri­niń táji­rı­beden ótýlerine jaǵdaı týǵy­zyp otyr, olardyń qatarynan jumys­qa alyn­ǵandary da bar. – Munda jumysqa turǵanyma kóp bolǵan joq. Jumysym ózime unaıdy, eńbek­­aqysy da táýir. Taza da jaryq jerde eń­­bek etemin, – deıdi Talǵat Támenbaev. – Biz ónimderimizge degen suranysty eskerip, óndiristi keńeı­týge baǵyt ustap otyr­myz. Qalalyq ákimdik jańa jylyjaı ornalastyrýǵa 3 gektar jer bóldi. Sol kezde eki jylyjaıǵa qyzanaq pen qııar­dy almastyryp egýge qol jetkizemiz. Bul ónim­dilikti arttyra túsedi dep oılaımyz. Oǵan da gollandııalyq tehnologııa ornatylatyn bolady, – deıdi Málik Qusaıynov. Aýyl sharýashylyǵy salasyndaǵy kásip­kerlerdiń gollandııalyq tehnologııaǵa umty­lýlarynyń da jóni bar eken. Nıder­land Qazaqstan ekonomıkasyna qarjy quıyp otyrǵan iri ınvestor bolyp tabylady. Satybaldy SÁÝIRBAI, «Egemen Qazaqstan» Aqtóbe oblysy Sýretti túsirgen Haıreden Raýshanov