Qazaqstan-Eýropalyq odaq: О́zara baılanystardy óristetý jolynda

Qazaqstan men Eýropalyq odaq saýda-ekonomıkalyq jáne ınvestısııalyq yntymaqtastyǵyn ilgeriletý boıynsha únqatysýlaryn belsendi ete túsýde. Osy oraıda, Syrtqy ister mınıstri Erlan Ydyrysov bastaǵan qazaqstandyq delegasııa «Qazaqstan Respýblıkasy-Eýropalyq odaq» Yntymaqtastyq keńesiniń májilisi men «Eýropalyq odaq-Ortalyq Azııa» mınıstrlik konferensııasyna qatysty. Atalǵan sharalar Belgııanyń astanasy – Brıýssel qalasynda ótti. Yntymaqtastyq keńesiniń kezdesýi Qazaqstan men Eýroodaq arasyndaǵy Keńeıtilgen áriptestik pen yntymaqtastyq týraly jańa kelisimge (KÁYK) qol qoıylǵannan keıin jáne ony ýaqytsha qoldaný ýaqyty bastalǵan soń ótip, eki taraptyń ózara is-qımylynyń kókeıkesti máselelerine arnaldy. Máslıhatta saýda-sattyq pen ınvestısııa, energetıka men kólik salasyn damytý, qorshaǵan ortany qorǵaý, sondaı-aq, saıası yntymaqtastyq pen jańa syn-qaterlerge qarsy is-qımyl tanytý taqyryptary talqylandy. Kún tártibinde erekshe oryn Qazaqstan azamattary úshin EO elderine vızalyq rejimdi jeńildetý perspektıvalary men Qazaqstannyń naryqtyq ekonomıkaly el mártebesine qol jetkizýine baılanysty máselelerge berildi. Kezdesýge qatysýshylar qaıtadan qurylǵan Yntymaqtastyq komıtetiniń oń mańyzyn atap ótti. Endi onyń aıasynda tek ekonomıka men ınvestısııalar jáne saýda-sattyq máseleleri talqylanatyn bolady. Kelisim, sondaı-aq, keden máseleleri boıynsha yntymaqtastyq jónindegi jańa shaǵyn komıtet qurýdy qarastyrady. – Qazaqstan men EO arasyndaǵy saýda-ekonomıkalyq jáne ınvestısııalyq áleýet ázirshe tolyq ashylǵan joq. Jańa qurylymdardyń negizgi mindetteri osy áleýetti ári qaraı damytyp, Qazaqstan Respýblıkasy men Eýropalyq odaq arasyndaǵy Keńeıtilgen áriptestik pen yntymaqtastyq týraly kelisimdi júzege asyrýǵa jan-jaqty yqpal etý bolýy tıis, – dep atap ótti Qazaqstan syrtqy saıasat vedomstvosynyń basshysy. Sondaı-aq, E.Ydyrysov «Eýropalyq odaq-Ortalyq Azııa» mınıstrlik kezdesýine qatysty. О́ńirdegi bes eldiń syrtqy ister mınıstrleri men EO-nyń Syrtqy saıasat jáne qaýipsizdik saıasaty jónindegi Joǵarǵy ókili Federıka Mogerını Ortalyq Azııa men Eýropalyq odaq arasyndaǵy Eýroodaqtyń 2020 jylǵa deıingi О́ńirlik strategııasyn júzege asyrý aıasyndaǵy qazirgi jaǵdaı men onyń perspektıvalaryn talqylady. EO ókilderi Ortalyq Azııa memleketterimen jalpy qaýip-qaterler men qaýipsizdik syn-qaterlerine qarsy turý, sondaı-aq, Aýǵanstandy qalpyna keltirý máselelerinde ózara is-qımyldy belsendi etýdiń mańyzy zor ekenin atap kórsetti. Kezdesýge qatysýshylar adam quqyn nyǵaıtý men zań jáne azamattyq qoǵam ústemdigi máselelerindegi konstrýktıvti ózara is-qımyldyń mańyzdylyǵyna mán berdi. Sondaı-aq, sý, gıdroenergetıkalyq, otyn resýrstaryn ornyqty paıdalaný salasyndaǵy yntymaqtastyqtyń mańyzy zor ekeni atap kórsetildi. E.Ydyrysovtyń erekshe nazar aýdarǵanyndaı, eki kezdesýde de talqylanǵan kókeıkesti máseleler Qazaqstannyń 2017-2018 jyldarǵy BUU Qaýipsizdik Keńesindegi jumystarynyń, sondaı-aq, Astanadaǵy EKSPO-2017 halyqaralyq mamandandyrylǵan kórmesiniń basymdyqtaryna tolyqtaı sáıkes keledi. Sonymen qatar, Brıýsselde E.Ydyrysov «Eýropalyq odaq-Ortalyq Azııa energetıkalyq únqatysýy» taqyrybynda ótken Berlın eýrazııalyq klýbynyń (BEK) 18-shi májilisine qatysty. Qazaqstan SIM-iniń basshysy májiliske qatysýshylardy Qazaqstannyń elde júrgizilip jatqan reformalar men EO-men yntymaqtastyq basymdyqtary turǵysynan kelgendegi áleýmettik-ekonomıkalyq damý barysymen tanystyrdy. Astanada ótetin EKSPO-2017-niń negizgi taqyryby sanalatyn energııanyń qaıtalama kózderi salasyndaǵy ózara is-qımyl máselelerine basa nazar aýdaryldy. Mınıstr Eýroodaqpen saýda-ekonomıkalyq jáne energetıkalyq baılanystardyń búkil kesheni boıynsha yntymaqtastyqty óristetý qajettigin esepke ala kelgende Qazaqstan men Eýroodaq arasyndaǵy KÁYK-ni taraptardyń jedel ratıfıkasııalaýynyń mańyzyn atap kórsetti. Germanııanyń EO-nyń Syrtqy saıasat jáne qaýipsizdik máseleleri jónindegi komıtetiniń resmı ókili Mıhael Flıýgger Qazaqstan tarapynan Eýropanyń energetıkalyq qaýipsizdigin qamtamasyz etý jáne osy maqsattarda kólik marshrýttaryn ártaraptandyrý boıynsha qabyldanyp jatqan sharalardy joǵary baǵalady. Al Germanııa ekonomıkasy Shyǵys komıtetiniń atqarýshy dırektory Mıhael Harms «jasyl» ekonomıkany damytý boıynsha Germanııa jáne Qazaqstan saıasatynyń uqsastyǵyn atap ótti. Tutastaı alǵanda, Brıýsseldegi kezdesýler Qazaqstan-Eýropa energetıkalyq yntymaqtastyǵynyń bolashaǵy tek qazba qýat kózderin senimdi jetkizýmen ǵana shektelip qalmaı, Qazaqstanda qazirdiń ózinde barlyq qajetti quqyqtyq baza qalyptastyrylǵan energııanyń qaıtalama kózderin damytýdaǵy belsendi ózara is-qımylmen baılanysty degen pikirge keldi. Samat MUSA, «Egemen Qazaqstan»