Pedıatrlar jumysy pysyqtaldy

Densaýlyq saqtaý jáne áleýmettik damý mınıstrliginiń qoldaýymen Pedıatrııa jáne balalar hırýrgııasy ǵylymı ortalyǵy, «Qazaqstannyń pedıatrlar odaǵy» qoǵamdyq birlestigi respýblıkalyq balalar dárigerleriniń VIII sezin uıymdastyrdy.  Bul – tórt jylda bir ret bala densaýlyǵyna baılanysty jınaqtalǵan kúrdeli máselelerdiń sheshimin izdestiretin dástúrli basqosý. Bıylǵy sezde 400-ge jýyq pedıatrııa salasynyń bilikti mamandary jańa týǵan nárestelerdiń syrqaty men bala ólim-jitimi kórsetkishin tómendetý joldaryn, ekpe egýdiń tıimdiligin jáne mekteptegi meıirbıkelerdiń mindetin qaıta uıymdastyryp, zamanǵa saı jańasha jetildirý jaıyn sóz etti. Ana men balany qorǵaý qyzmetiniń negizgi áleýetin saqtaı otyryp, onyń qurylymyn ózgertý, ambýlatorııa-emhana tizbeginiń rólin arttyrý arqyly ony jańa ekonomıkalyq jaǵdaılarǵa beıimdeý, barlyq balalar úshin medısınalyq kómekti qoljetimdi etý densaýlyq saqtaý salasynyń basty mindetine aınalyp otyr. Osy maqsatta 2016-2020 jyldarǵa arnalǵan «Densaýlyq» atty jańa memlekettik baǵdarlama aıasyn­da aýrýdyń aldyn alý jáne basqarýǵa arnalǵan jańa saıasatty endirýdiń birqatar strategııalyq baǵyt­tary daıyndalǵan bolatyn. Atalǵan saıasat qoǵamdaǵy jalpy ólim-jitim kórsetkishin tómendetýge, ómir súrý uzaqtyǵyn ulǵaıtýǵa baǵyttalǵan-dy. Densaýlyq saqtaý jáne áleýmettik damý mınıstr­liginiń medısınalyq jáne farmasevtıkalyq qyzmetti baqylaý komıteti tóraǵasynyń orynbasary Roza Qýanyshbekova men Pedıatrııa jáne balalar hırýrgııasy ǵylymı ortalyǵynyń uıymdastyrý-ádistemelik jumys jáne medısınalyq statıstıka basqarmasynyń jetekshisi Gúlnar Táshenova balalar arasyndaǵy aýrýdyń aldyn alý, dıagnostıkalaý men emdeýge arnalǵan zamanaýı tehno­logııalar, ekpe jumysynyń tıimdiligin arttyrýǵa baı­lanysty aıtqan oıy mańyzdylyǵymen kóńil aýdardy. Jabylyp qalǵan pedıatrııa fakýltetteriniń jaıy, bolashaq pedıatrlardy  daıyndaý isi de nazardan tys qalmady. О́ńirlerden kelgen balalar dárigerleri túıtkildi oılarymen bólisip, qajetti aqparattarmen almasyp, beıindi qyzmetine baılanysty jańalyqtardy pysyqtady. Aıgúl AHANBAIQYZY, «Egemen Qazaqstan» ALMATY