Halyqaralyq qoǵamdastyq oń baǵa berdi

Keshe Ortalyq saılaý komıssııasynyń tóraǵasy Q.Turǵanqulov Qazaqstan Respýblıkasynyń kezekten tys prezıdenttik saılaýyn baıqaý jónindegi EQYU/DIAQB mıssııasynyń basshysy, elshi Daan Evertspen kezdesti. Kezdesý barysynda Ortsaılaýkom basshysy Everts Ortalyq saılaý komıssııasynyń kezekten tys saılaýdy ázirleý men ótkizýdegi jumysymen, saılaý naýqanynyń negizgi kezeńderimen jáne erekshelikterimen tanystyryp ótti, sondaı-aq aldaǵy saılaýda «Saılaý» AAJ-in paıdalanýdan bas tartylǵany jóninde habardar etti. «Biz elimizge shet memleketter men halyqaralyq uıymdardyń baı­qaýshylarynyń kelgenin qoshtaımyz jáne olardyń tıimdi, obektıvti jáne ónimdi jumys isteýi úshin barlyq jaǵdaıdy jasaımyz. Osy maqsatta biz óńirlerde halyqaralyq baıqaýshylarǵa járdemdesý orta­lyq­taryn qurdyq jáne olar saı­laýdy baıqaýshylardyń óz qyzmetin iske asyrýynda naqtyly kómek kórsetedi dep senemiz», – dep atap ótti Q.Turǵanqulov. EQYU/DIAQB mıssııasynyń bas­shysy saılaý naýqany barysyn baıqaýǵa qatysýǵa shaqyrǵany úshin rızashylyǵyn, sondaı-aq mıssııa sa­rapshylarynyń Ortsaılaýkom mú­she­lerimen saılaý úderisiniń barlyq aspektileri boıynsha yntymaq­tas­tyǵy tyǵyz jáne kásibı bolatynyna senimin bildirdi. «Qazaqstan Respýblıkasy Orta­lyq saılaý komıssııasynyń múshele­ri halyqaralyq ortaǵa tanymal, sondyqtan biz pozıtıvti jáne jemisti yntymaqtastyq bolady dep úmit­tenemiz, – dep atap ótti mıssııa bas­shy­sy. – Ortsaılaýkomnyń «Saılaý» AAJ-in paıdalanýdan bas tart­qany jaqsy jańalyq bolyp tabylady». Kezdesý barysynda halyqaralyq qoǵamdastyqtyń qazaqstandyq bı­lik­tiń saılaý ótkizý týraly sheshimine oń baǵa berip otyrǵany ataldy. «Álemniń bir de bir elinde minsiz saılaý joq. Olardyń barlyǵynda saılaý júıesin odan ári jetildirý men damytý múmkindigi bar», – dedi ol. Al Q.Turǵanqulov EQYU/DIAQB mıssııasy sarapshylarynyń saılaýdy baıqaýdy ádil ári obektıvti júrgizýine tilektestigin bildire kelip, bul rette eki taraptyń da múddeleri bir-birine tolyq sáıkes keletinin atap ótti.