Turǵyn úı qatynasy naqtylandy

Májilis Tóraǵasy Oral Muhamedjanovtyń jetekshiligimen ótken palatanyń sársenbi kúngi jalpy otyrysynyń kún tártibinde toǵyz másele talqyǵa salyndy. Otyrys barysynda shyǵarma­shy­lyq qyzmetke qatysty zańdyq qujat boıynsha palatalar ara­syndaǵy kelispeýshilik eńserildi. Qarýly Kúshterdiń, basqa da áskerler men áskerı qurylym­dar­dyń arsenaldary, bazalary men qoımalary janyndaǵy tyı­ym salynǵan aımaqtar men tyı­ym salynǵan aýdandar másele­le­ri boıynsha keıbir zańnamalyq aktilerge tolyqtyrýlar engizý jónindegi zańdyq qujatqa qys­qa­sha baıandamany Qorǵanys mı­nıstriniń orynbasary Talǵat Janjúmenov jasady. Aty aıtyp turǵandaı, arsenaldar men qoı­ma­lar ornalasqan tyıym salyn­ǵan aımaqtarǵa 400 metrge jýyq­taýǵa bolmasa, al tyıym salyn­ǵan aýdandarǵa 3 shaqyrym sheńberinde jaqyndaýǵa ruqsat berilmeıdi. Depýtattar zań jobasyn talqylaı kele, ony maquldaý qajet dep sheshti. Kelesi qaralǵan turǵyn úı qatynastary máseleleri boıyn­sha keıbir zańnamalyq aktilerge ózgerister men tolyqtyrýlar engizýge qatysty zańdyq qujat birinshi oqylymda qaraldy. Ol boıynsha baıandamany Qurylys jáne turǵyn úı-kommýnaldyq sharýashylyq isteri agenttigi tór­aǵasynyń orynbasary Nıkolaı Tıhonıýk jasady. Zań jobasy­nyń negizgi maqsaty memlekettik turǵyn úı qory, kommýnaldyq turǵyn úı qory, memlekettik kásiporyndardyń turǵyn úı qory jáne memlekettik mekemelerdiń turǵyn úı qory dep arajigin ajyratý bolyp tabylady. Sondaı-aq depýtattar jergilikti atqarýshy organdardyń kommýnaldyq turǵyn úı qorynan turǵyn úıge muqtajdardyń esebinde turǵan azamattardyń kezektilik tizimine jyl saıyn túgendeý júrgizý; jetim balalarǵa jáne ata-anasynyń qamqorlyǵynsyz qalǵan balalarǵa turǵyn úı qorynan turǵyn úı alýǵa arnalǵan jas mólsherin ulǵaıtý; azamattardy halyqtyń áleýmettik qorǵalatyn toptaryna jatqyzý talaptaryn naqtylaý; turǵyn úı ınspeksııalary men úı-jaılar (páterler) ıeleri jınalysynyń quzyretin naqtylaý; mindetti túrde kondomınıým obektisiniń ortaq múlkin kúrdeli jóndeýge arnalǵan jınaq shotyn ashý jáne kondomınıým obektisiniń ortaq múlkin kútip ustaýǵa arnalǵan shyǵystarǵa qatysýdan jaltarǵan páter ıelerinen sot organdary arqyly bereshekti óndirip alý máselelerin kózdeıtin túzetýlerdi engizdi. Jalpy sany 300-den asatyn túzetý jumys tobynda qaralǵandyqtan, zań jobasy qoldaý tapty. Sondaı-aq, jalpy otyrysta elektrondyq aqsha máseleleri boıynsha keıbir zańnamalyq aktilerge tolyqtyrýlardy qarastyratyn zań jobasy qaralyp, onda elektrondyq aqshany shyǵarý ári tólemder men ózge de qarjy operasııalaryn júrgizý barysyndaǵy quqyqtyq qatynastardy retteý kózdeledi. Al «Esirtki, psıhotroptyq zattar, prekýrsorlar jáne olardyń zańsyz aınalymy men teris paıdalanylýyna qarsy is-qımyl sharalary týraly» Zańǵa tolyqtyrý engizý jónindegi zań jobasyn Májilis depýtaty Berik Bekjanov tanystyrdy. Atalǵan zań jobasymen, ásirese, aýyldyq jerlerde kóbinen tutynylyp júrgen nasybaıǵa da tyıym salý kózdelip otyr. О́ıtkeni, atalǵan jasyl tústi túıinshekti untaqtardyń quramy belgisiz kúıinde qalyp keledi. Olaı bolsa, atalǵan zat densaýlyqqa zııanyn tıgizýi ábden múmkin, dep sanaıdy zań jobasynyń avtorlary. Zań jobasy maquldandy. Budan basqa «Kopengagende 1992 jylǵy 23-25 qarashada qol qoıylǵan Ozon qabatyn buzatyn zattar jónindegi Monreal hattamasyna túzetýlerdi jáne Monrealda 1997 jylǵy 15-17 qyrkúıekte qol qoıylǵan Ozon qabatyn buzatyn zattar jónindegi Monreal hattamasyna túzetýlerdi ratıfıkasııalaý týraly» zań jobasy jáne «Qazaqstan Respýblıkasynyń Jer kodeksine ózgerister men tolyqtyrýlar engizý týraly» zań jobasy ekinshi oqylymda qoldaý tapty. Asqar TURAPBAIULY.