"Tártipke úırengen bala jaman jolǵa túspeıdi"

Bolat Kenjebaev úıine aýyldaǵy sport zaldan túngi saǵat 22.00-ge qaraı oralady. Onyń otbasynda «ákemiz nege keshigip jatyr?» dep eshkim oılamaıdy. Balalary da, jary da onyń sport zalda «kýrsanttarymen» birge júrgenin bilip otyrady. Vladımırov aýylynda sport zalǵa kelgen mek­tep oqýshylarynyń barlyǵy da osyndaǵy Bolat Kenjebaev basqaratyn «Olımp» áskerı-patrıottyq klýbynyń múshesi bolyp sanalady. Bul jaı aıta salý, tirkeı salý emes, shynaıy jumys bar jerde jalǵandyq joq. Sondyqtan klýb músheleriniń barlyǵyn da Bolat «kýrsanttar» dep ataıdy. Bıyl «Olımp» áskerı-patrıottyq klýbynyń qu­ry­l­ǵanyna 28 jyl bolypty, osy ýaqyt ishinde odan eki myńnyń syrtynda aýyl balalary túlep ushty. Qazir olar elimizdiń túkpir-túkpirinde júrip jatyr, tipti ustazyna shetelderden habarlasatyn kýrsanttary da jetki­likti. Bolat Kenjebaev Qostanaı aýda­n­yndaǵy Vladımırov orta mektebinde áskerı alǵashqy daıyn­dyqtan sabaq beredi. Osydan 30 jyldaı buryn ásker qatarynan oralǵan praporshık jas jigit aýyl mektebine muǵalim bolyp ornalasty. Kóp uzamaı, 1988 jyly ol «Olımp» áskerı-patrıottyq klýbyn qurdy. Ásker men sport egiz uǵym. Bolashaq otan qorǵaýshylar shymyr bolýy tıis. Klýb qurylǵan alǵashqy jyldary keshke qaraı sport zalda 300-ge deıin oqýshylar men aýyl jastary daıyndalatyn. – Burynǵydaı ortalyqtan kelip turǵan jylý joq, sport zaly jyly bolýy úshin qys boıy otty ózimiz jaǵyp shyǵamyz. Bul ońaı bolǵan joq, otyn, kómir daıyndaý kerek, ony jaqqandy aıtsańshy. Sol qı­yn­dyqtardyń barlyǵynan óttik, bi­raq rızamyn. О́kinbeımin, qaıta maqtanamyn. Otan qorǵaýdyń, Otan aldyndaǵy áskerı paryz, patrıotızm degenniń ne ekenin «Olımpten» shyqqan balalar sanasyna sińire bildim, – deıdi Bolat Kenjebaev. Qazir Qostanaı aýdanyndaǵy Vladımırov selosyn atasa aldymen aýyzǵa «Olımp» áskerı-patrıottyq klýby túsedi. Osy okrýgtiń brendi ispettes. «Men eger zakon qýaty qolymda bar kisi bolsam, adam minezin túzep bolmaıdy degen kisiniń tilin keser edim» degen Abaı atamyzdyń sózin Bolat pir tutady. – Buryn da, qazir de «Olımp» áskerı-patrıottyq klýbyna keletin balalardyń basym kópshiligi jaısyz otbasynan shyqqandar. Qazirde aýylda ishkilikke salynǵan úlkenderdiń bar ekenin jasyrmaımyn. Al men jas­tardy daǵdyǵa, tártipke úıretemin. Keshke sabaqtan, jumystan keıin mindetti túrde olar sport zalǵa keledi, judyryqta­sý, kú­restiń sambo, dzıý-do, qazaq kúresi túrlerinen jattyǵady. Klýbtyń tolyp jatqan baǵdarlamalary bar, solarǵa qatysady, sosyn ákesi men anasy sekildi bas­qa jolǵa qaraýǵa, bosańsýǵa olardyń ýa­qyty da bolmaıdy. Eń bastysy, tártip olar úshin ómirlik daǵdy bolyp qalady, – deıdi Bolat Borıduly. Oǵan ustazdyń jarqyn mysaly da bar. Qazir «Olımp» klýbynda óziniń Anna Fedıanına degen kómekshisi bar. О́ziniń shákirti, Astanadaǵy L.N.Gýmılev atyndaǵy Eýrazııa ýnıversıtetin bitirip, týǵan aýylyna kelip, mektepke jumysqa turdy. Ustazynyń shaqyrýymen keldi. Sambodan sport sheberi. Aýylda osy «Olımp» klýby kýrsantynyń biri bolǵan Mıhaılǵa turmysqa shyqty, qazir bir uly bar. – Nesin jasyraıyn, Mıshanyń da, Anıanyń da ata-anasy iship ketken. О́zgergen joq, qazir de solaı. Men jastarǵa: «Senderdiń joldaryń – basqa jol» dep aıttym. Qazir ekeýi tap-tamasha otbasy, sportshy, naǵyz patrıot balalar, – deıdi Bolat Borıduly. Negizi patrıottyq ju­mys Bo­lat Kenjebaevtyń bolmysy deýge bolady. Patrıottyq sezimniń ar ja­ǵynda adamgershilik, meıirimdi­lik, eńbekqorlyq, tabandylyq degen asyl qasıetter jatatynyn ol qatarlastaryna da, kýrsanttaryna da túsindirip keledi. Bókeń aýyldan áskerı boryshyn óteý­ge ketip bara jat­qan kýrsanttardy shy­ǵaryp salýdy ádetke aınaldyrǵan. Qos­tanaıǵa áke­lip, poıyzǵa otyrǵyzyp ji­beretinin, janyna klýbtyń múshelerin, aýyl­dyń kýrsanttaryn ertip alatynyn qaıtersiz. «Olımp» klýby osy jyl­dar ishinde talaı joryqtarǵa shyq­ty, talaı baıqaýlarǵa qatysty. «Olımp» klýby 2014-2015 jyldary patrıottyq tárbıe berý jónindegi jumystar qorytyndy­sy boıynsha oblysta birinshi oryndy ıelendi. Al respýblıkada onyń tájirıbesin taratý jóninde de semı­narlar ótkenin maqtanysh etedi. – Otanǵa degen patrıotızm jalǵan uran bolmaýy tıis, ol kúndelikti ti­r­likten bastalady. Tek erinbeý kerek, isińdi de, balalardy da, barlyǵyn da jaqsy kóre bilseń bolǵany, – dep aǵynan jarylady ańqyldaǵan Bolat Borıduly. Qazir qaı aýyldan da ketýshiler kóp, kelýshiler az. Vladımırov aýyly da ýaqyttyń osy kó­rinisinen shet qalǵan joq. Bolattyń «Olımp» áskerı-patrıottyq klýbynda búginde 135 oqýshy men aýyl jastary jattyǵady. Onyń osy janqııarlyq isi oblys, aýdan basshylyǵynyń nazaryna iligip, 2012 jyly sport zalǵa bıýdjet esebinen eýrojóndeý jumysyn jasap berdi. Qazir kishkentaı kýrsanttary da, ózi de rahattanyp qaldy, jyly jerde jattyǵady, pesh jaǵýdan qutyldy. Sport quraldarynyń barlyǵy da bar. 7-8 jasar kýrsanttardy kómekshisi Anna Fedıanına jattyqtyrady, eresek balalardy ózi baýlıdy. – Men «Egemen Qazaqstan» gazeti arqyly búkil qazaqstandyqtarǵa aýyl­da balalarǵa arnalǵan aýla jáne áskerı-patrıottyq klýbtar quryńyzdar dep jar salǵym keledi. Onyń tamasha nátıjesin kórýge de kepildik beremin, – deıdi Bolat Kenjebaev. – Temirdeı tártipke úırengen, shymyr, ózine senimdi balanyń jany da taza bolady. Jany tazanyń rýhy da myqty. Ondaı jas adasýǵa tıisti emes. Biz amanatqa qııanat jasamadyq. Bolat Kenjebaevtyń sózin oqyrmanǵa sol kúıinshe jetkizýdi jón kórdik. Názıra JÁRIMBETOVA, «Egemen Qazaqstan» Qostanaı oblysy, Qostanaı aýdany, Vladımırov selosy