Jekpe-jekke tastúıin daıyn

Erteń, 29 qazan kúni keshke kúlli qazaq jurtynyń nazary ońtústik megapolıstegi «Almaty Arena» sport saraıyna aýǵaly tur. Buǵan qazaqstandyq kásipqoı boksshy Qanat Islamnyń osynda ganalyq básekelesi Patrık Alloteımen «WBA Fedelatin» belbeýin qorǵaý jáne qurlyqaralyq WBO chempıondyǵyn alý úshin jekpe-jek ótki­zetini sebep bolyp otyr. Qanat 2012 jylǵy qyrkúıekte kásipqoı boksqa aýysqan edi. Ol sol ýaqyttan beri AQSh-tyń Florıda shtatyndaǵy Pahokı qalasynda turyp, jattyǵyp jatyr. Bizdiń jerlesimiz 2012 jylǵy 19 jeltoqsanda «WBA Fedecaribe» boljamy boıynsha birinshi orta salmaqta chempıon atandy. Sol ýaqyttan beri ol 21 ret rıngke shyǵyp, sonyń bárinde jeńiske jetti. Onyń ishinde 18 urysyn nokaýtpen aıaqtady. Degenmen, Qanattyń erteńgi qarsylasy ońaı shaǵylatyn jańǵaq emes. Muny boksshy budan aıdan astam ýaqyt buryn, 23 qyrkúıekte ótkizgen baspasóz máslıhatynda ashyq aıtty. Ol óz elinde ótetin alǵashqy jekpe-jektiń júgi aýyr ekenin birden jetkizdi. – Tuńǵysh ret óz elimde kezdesý ótkizgeli otyrmyn. Bul – úlken jaýapkershilik. Qar­sylasym da osal emes. Bul úshin onyń 36 kezdesý ótkizip, onyń 28-in nokaýtpen jeńgenin aıtsam da jetkilikti. Tipti nokaýty sanynyń ózi meniń barlyq urystarymnan kóp. Men Almatyda jerlesterimniń jappaı qoldaýyna súıenemin. Qazir jattyǵýdy IBA akademııa­synda ótkizip júrmin, – dedi Qanat Islam sol joly. Eske sala keteıik, bul boks keshinde Qanat Islamnan basqa, Janqosh Turarov, Rýslan Myrsataev, Álı Ahmetov, Aıdar Sháribaev, Aıdos Erbosynuly jáne Jánibek Álimhanuly esimdi jerlesterimiz sharshy alańǵa shyǵady. Bulardyń arasynda Jánibek birinshi ret ózin kásipqoı rınginde synap kórgeli tur. Mamandar men sportshynyń aıtýynsha, bizdiń úkilep qosatyn úmitimiz – Qanat Islam aldaǵy jekpe-jekke tastúıin daıyndyqta kelip otyr. Tek oǵan endi sáttilik serik bolsyn dep tileıik. Aıdar О́RISBAEV, «Egemen Qazaqstan»