Egin jınaldy. Jaz boıy tynym tappaǵan sharýa ketpeni damyldady. Qamba astyqqa toldy. Bıyl oljaly jyl boldy. Syr dıqandary gektarynan 54,9 sentnerden ónim alyp, rekordtyq kórsetkishke qol jetkizdi. Shúkir deımiz. Berekeli jyldyń merekesin arttyryp, mereıin tasytatyn «Altyn dán» meıramy da dańqty dıqan, dala akademıgi Ybyraı Jaqaevtyń 125 jyldyǵyna oraılastyrylyp ótti.
«Dala akademıgi – Ybyraı»
Alǵashqy shara Asqar Toqmaǵambetov atyndaǵy Mádenıet úıinde «Dala akademıgi – Ybyraı» atty respýblıkalyq ǵylymı-tanymdyq konferensııamen bastaldy. Oǵan Aýyl sharýashylyǵy mınıstrliginiń jaýapty hatshysy Ermek Kósherbaev, qoǵam qaıratkeri Ábdijálel Bákir, jazýshy, halyqaralyq «Alash» syılyǵynyń laýreaty Qýandyq Túmenbaı jáne belgili ǵalymdar, oblystyń zııaly qaýym ókilderi qatysty. Konferensııany aımaq basshysy Qyrymbek Kósherbaev alǵy sózimen ashty.
– Syr elinde bolashaq úshin eseli eńbek etken dara da dana tulǵalar az emes. Sondaı jandardyń biri ári biregeıi – búgingi 125 jyldyq mereıtoıyn atap ótkeli otyrǵan ataqty jerlesimiz, dańǵaıyr dıqan, eki márte Sosıalıstik Eńbek Eri Ybyraı Jaqaev. Osyndaı jandardy ulyqtaý bizdiń paryzymyz, – dedi óńir basshysy. Oblys ákimi Syr dıqandary aq kúrishtiń atasy atanǵan Jaqaevtyń mereıtoıyna laıyqty tartýmen kelip otyrǵandyǵyn jetkizdi. Oblys eginshileri ár gektardan 54,9 sentnerden rekordtyq ónim aldy. Bul jetistik Táýelsizdiktiń 25 jyldyǵyna, sondaı-aq Y.Jaqaevtyń 125 jyldyǵyna arnalatynyn habarlady. Sondaı-aq, Qyrymbek Eleýuly qazir Qyzylorda kúrishiniń 25 paıyzy eksportqa shyǵarylyp otyrǵanyn málim etti. Iran kúrishiniń suryptaryn ósirý baǵytynda jumystar da júrgizilip jatyr. Qazir oblysta kúrish óńdeıtin birneshe iri kásiporyn bar. Táýelsizdik jyldaryndaǵy rekordtyq ónimderge tórtinshi jyl qatarynan qol jetkizilip otyr. Aımaq basshysy bıyl Y.Jaqaev atyndaǵy tósbelgi shyǵarylyp, endi jyl saıyn kúrishten mol ónim jınaǵandar marapattalatynyn jetkizdi. Al onyń alǵashqy ıegerleri Ybekeńniń kózin kórgen izbasarlary Shyrynkúl Qazanbaeva, Sálıma Jumabekova, Amankeldi Ahmetov bolady.
Munan keıin sóz alǵan Aýyl sharýashylyǵy mınıstrliginiń jaýapty hatshysy Ermek Kósherbaev Alashtyń anasy atanǵan Syr elinen talaı ult maqtanyshy shyqqanyn, olardyń qatarynda bar ómirin týǵan jerin túletýge arnaǵan Jaqaevtyń orny bólek ekenin jetkizdi. Ony aq kúrishtiń atasy dep ataý asyra siltegendik emes. О́ıtkeni, ǵylym men agrotehnıka damyǵan zaman ornaǵanmen de, ol kisiniń qol jetkizgen kórsetkishterin qaıtalaı almaı kelemiz. «Sonymen birge, ol jastardy eńbekke tarta bildi, sonyń arqasynda eńbek dańqyn asyrǵan talaı tulǵalar shyqty. Táýelsizdigimizdiń 25 jyldyǵy toılanatyn jyly aýyl sharýashylyǵy eńbekkerleri laıyqty tartýmen kelip, rekordtyq kólemde astyq jınaldy. Bul Jaqaev izbasarlarynyń eren eńbeginiń jemisi» degen mınıstrlik ókili Syr boıy dıqandaryn tabysymen quttyqtap, izgi tilekterin arnady.
Konferensııada «Aımaqtaǵy kúrish óndirisiniń áleýmettik-ekonomıkalyq mańyzy» taqyrybynda dańqty dıqannyń qazirgi izbasarlarynyń biri, Qazaqstannyń Eńbek Eri, Parlament Májilisiniń depýtaty, Kúrish ósirýshiler jáne óńdeýshiler qaýymdastyǵynyń tóraǵasy Abzal Eralıev baıandama jasady. «Eginshi márt, jer jomart» degenmen, oǵan tıisti jumystar atqarmaı, jetistikterge jetýge bolmaıdy. Sondyqtan jańa tehnologııalar jańa ınnovasııalyq tásilderdi paıdalanyp, sońǵy bes jylda eńbek ónimdiligin birneshe ese arttyrdyq. 400-den asa adamdy jumyspen qamtydyq, olar 606 mıllıon teńge jalaqy tapsa, memleketke 248 mıllıon teńge salyq tólendi, dedi Eńbek Eri.
Munan soń «Kúrish júıesi – senimdi mal azyǵy qorynyń negizi» taqyrybynda «Qazaq eginshilik jáne ósimdik sharýashylyǵy ǵylymı-zertteý ınstıtýty» JShS-niń bólim meńgerýshisi Ǵalıolla Meıirman, «Kúrish egistikteriniń topyraq jaǵdaıy – rekordtyq kórsetkishter kepili» týraly «О́.Ospanov atyndaǵy Qazaq topyraqtaný jáne agrohımııa ǴZI» JShS bas dırektory, Aýyl sharýshylyǵy ǵylymdary akademııasynyń akademıgi, aýyl sharýashylyǵy ǵylymdarynyń doktory Abdýlla Saparov, «Dala akademıgi Y.Jaqaev – kúrish klasteriniń negizin qalaýshy» taqyrybynda «Y.Jaqaev atyndaǵy Qazaq kúrish sharýashylyǵy ǵylymı-zertteý ınstıtýty» JShS bas dırektory Serikbaı О́mirzaqov baıandama jasady. Qoǵam qaıratkeri Ábdijálel Bákir Jaqaev týraly estelikter aıtty. Al jazýshy Qýandyq Túmenbaı Ybyraı atamyzdyń jurt bile bermeıtin qyrlaryna toqtaldy. Ol Jaqaevtyń feodalızm zamanynda dúnıege kelip, sosıalıstik zamanda eńbek etip, kapıtalızmge, ıaǵnı naryq zamanyna bet burǵanda ańyzǵa aınalǵanyn áńgimeledi. Osylaısha, dańqty dıqannyń qurmetine arnalǵan konferensııa óz máresine jetti.
Ozattar oza shapqan kún
Sol kúni Nartaı Bekejanov atyndaǵy oblystyq drama teatrynda merekelik «Altyn dán-2016» saltanatty sharasy da ótti. Qos toıy qabat kelgen syrboıylyqtar mereıtoı aıasynda aq kúrishtiń atasy, dala akademıgi Ybyraı Jaqaevtyń 125 jyldyǵyna oraı dańǵaıyr dıqan eskertkish-bıýstine taǵzym etip, gúl shoqtaryn qoıdy. Merekelik sharalardyń basy-qasynda oblys ákimi Qyrymbek Kósherbaevtyń ózi júrdi.
«Altyn dán-2016» egin jınaý qorytyndysyna arnalǵan mereıtoılyq kesh shymyldyǵy teatrlandyrylǵan qoıylymmen ashyldy. Qoıylymda Ybyraı Jaqaevtyń ónegeli ómiri dáriptelip, aq marjandaı terbetilgen bıshiler óneri kópshilik nazaryna usynyldy. Sonan soń, Qyrymbek Eleýuly eńseli eńbek tórindegi syrboıylyqtar jetistigimen quttyqtady.
– Halqymyz «Jer jomart, jerge sengen el jomart, eńbek etken er jomart» degen. Máýeli kúz, mine, osy qanatty qaǵıdanyń bıyl berekesin tanytty. «Egindi ósire bilý – alǵashqy asý ǵana. Ysyrapsyz jınap alý – máre», degen Ybyraı Jaqaevtyń dana sózi, dańqty dıqannyń óz mereıtoıy men Táýelsizdiktiń 25 jyldyǵymen qatar kelýi eljandy eńbekkerlerdiń mereıin ósirip otyr. Syr dıqandary úlken senimnen shyqty. Buryn-sońdy bolmaǵan rekord ornady. Kúmis dánin kúnge súıdirip, yrzyǵyn ysyrapsyz jınap alǵan beınetker qaýym Táýelsizdik toıyna zor tartý jasady. Al munyń bári oblys jurtshylyǵynyń yntymaq, birliginiń jemisi. Aımaqtyń áleýmettik-ekonomıkalyq damýy jańa beleske shyǵyp otyr. Qaısybir salada bolsyn ilgeri basýǵa baǵyttalǵan bastamalarymyz eldiń turmys-áleýetin kóterýge, Syr eliniń bolashaq múmkindikterin kórsetýge úlken dem berdi. Eńbektiń dańqyn asyrǵan eginshi jurt búgingi zaman talabyna saı, myqty ári tıimdi sharýany júrgizip, joǵary belesterdi moıyndatýdyń úlgisin kórsetip, óńirdiń dara daqyly – kúrishtiń ár gektarynan 54,9 sentnerden ónim aldy. 440 myń tonnaǵa jýyq dán el qambasyna quıyldy. Tabys qutty bolsyn, dıqandar! – dedi aımaq basshysy.
Súıinshileıtin jańalyq – Syr dıqandary Elbasynan alǵys aldy. Aımaq basshysy el Táýelsizdiginiń 25 jyldyq mereıtoıyna tamasha tartý jasaǵan Syr dıqandaryna Elbasymyz Nursultan Nazarbaev arnaıy jedelhat joldaǵanyn jetkizip, onyń mátinin oqyp berdi. Sonymen birge, eginshilerimizdiń bıylǵy jetistikke jetý jolyndaǵy eńbekterine aıryqsha toqtalyp, aımaǵymyzdaǵy aýyl sharýashylyǵy salasynyń qarqyndy damyp kele jatqandyǵyn aıtty. Tórtinshi jyl qatarynan rekord tórinen kórinip otyrǵan syrboıylyqtardyń árdaıym memleket qazynasyn molaıtýda aıanbaı ter tóge beretindigine senim bildirdi. Aımaq basshysy, sondaı-aq, oblys dıqandary óndirgen kúrishtiń eksportqa shyǵý kókjıegi keńeıip jatqandyǵyn, bul oraıda shet memlekettermen baılanys artqandyǵyn aıryqsha atap ótti.
Saltanatty sharada Aýyl sharýashylyǵy mınıstrliginiń jaýapty hatshysy Ermek Kósherbaev respýblıka Premer-Mınıstriniń orynbasary Asqar Myrzahmetovtiń quttyqtaý hatyn oqyp berdi. Odan ári, oblys ákimi bıylǵy jıyn-terim qorytyndysy boıynsha eńbek ozattaryn marapattap, baǵaly syılyqtar tabys etti. Aıtalyq, «Ozat sharýashylyq» atalymynyń I dárejeli dıplomy Jalaǵash aýdanyndaǵy «Tań LTD» JShS-ne buıyrdy. Sondaı-aq, merekelik keshte bıikten kóringen aýdan ákimderine qurmet kórsetildi. Máselen, bıyl egin sharýashylyǵy boıynsha Shıeli aýdany kósh bastady. Sodan soń, bir top qyzmetkerler Aýyl sharýashylyǵy mınıstrliginiń marapatyna ıe boldy.
Merekelik is-sharada, sondaı-aq, Aýyl sharýashylyǵy qyzmetkerleri salalyq kásipodaqtary qoǵamdyq birlestiginiń tóraǵasy A.Súleımenov pen Qazaqstannyń Eńbek Eri, Kúrish ósirýshiler jáne óńdeýshiler qaýymdastyǵynyń tóraǵasy Abzal Eralıev jurtshylyqty mereıtoıymen quttyqtap, úzdikterge merekelik marapattar tabystady.
Merekelik kesh odan ári konserttik baǵdarlamamen jalǵasyn tapty.
Shıelidegi shyraıly sharalar
Munan soń Ybekeńniń toıy týǵan jeri Shıeli aýdanynda jalǵasty. Aýdan ortalyǵyndaǵy mereıtoılyq sharalar oblys ákimi Qyrymbek Kósherbaev bastaǵan el azamattary, eńbek ardagerleri jáne de elimizdiń túkpir-túkpirinen kelgen mártebeli meımandardyń dıqannyń eskertkishine gúl shoqtaryn qoıý rásimimen bastaldy.
«Eńbek erlikke jetkizer, erlik eldikke jetkizer» demekshi, ketpenimen eńbek gımnin jazǵan, kúrish daqylynan dúnıe júzinde álemdik rekord jasaǵan dıqan óz alqabyn tek sýmen emes, mańdaı terimen sýaryp, zor mártebege ıe boldy. Dańǵaıyr dıqannyń quryshtan soǵylǵan som tulǵasy keıingi urpaqtaryn erinbeı eńbek etý men erlikke shaqyryp tur. Otanymyzdyń ár azamaty adal peıilimen halyq úshin eńbek etse, árdaıym qurmet tórinde bolady. Prezıdentimiz Nursultan Nazarbaevtyń «Máńgilik El» ıdeıasy ár adamnyń óz ornynda jaýapkershilikpen qyzmet etýi jáne jalpy halyqtyń aýyzbirligine qosqan úlesi arqyly júzege asady. Zamandastarymyz, keıingi jas urpaq eńbek etý arqyly qasıetti Otanymyzdyń damý qarqynyna úles qosýy tıis. Bul óz kezeginde zaman týdyrǵan túrli kedergilerge toıtarys berý sharasy da bolyp tabylady, dedi aımaq basshysy.
Saltanatty rásimde mártebeli qonaqtar arasynda Parlament Senatynyń depýtattary Bekmyrza Elamanov, Murat Baqtııaruly, Májilis depýtattary Abzal Eralıev pen Natalıa Jumadildaeva, akademıkter Dosmuhamed Kishibekov, Asqar Jumadildaev, Aýyl sharýashylyǵy mınıstrligi Sý resýrstary jónindegi komıtetiniń tóraǵasy Islam Ábishev, dańqty balýan Dáýlet Turlyhanov, basqa da esimderi elge belgili kóptegen azamattar boldy.
«Jaqsydan – sharapat» demekshi, el Táýelsizdiginiń shırek ǵasyrlyq toıy men dıqan atanyń qabat kelgen mereıli merekesiniń ıgi áseri Ybyraı Jaqaev atyndaǵy aýyl kelbetiniń kórkeıe túsýine oń yqpal etti. Aýyl kósheleri asfalttalyp, jóndelse, birneshe kóshe jaryqtandyryldy. Sondaı-aq, osyndaǵy mádenıet úıi de kúrdeli jóndeýden ótkizildi. Atalǵan eldi mekende Y.Jaqaev atyndaǵy kúrish ósirý tarıhy murajaıynyń jańa ǵımaraty saltanatty túrde ashyldy. Eske sala keterligi, aımaqtaǵy eńbek úderisi men eńbek erleriniń ómir jolyn tarqata baıandaıtyn jáne kúrish ósirýdiń qalyptasqan tájirıbesi men jańa ǵylymı negizderdi nasıhattaıtyn mýzeı ǵımaraty aýyl jurtshylyǵynyń ótinishimen aýdan ortalyǵynan qaıta kóshirildi. Qurylysty júrgizý úshin oblystyq bıýdjetten 56 mıllıon teńge bólinip, jumysty «Aıdana» JShS óz merziminde oıdaǵydaı aıaqtap shyqty. Munda 3 zal jáne 3 jumys bólmesi oryn tepken. Ishine 10 306 eksponat ornalastyrylǵan. Jańa mýzeıdiń ashylýynda oblys basshysy eńbek merekesiniń mártebesi arqyly ár adamnyń mereıi artatyndyǵyn jetkizdi. Jaqaevtyń izbasarlarynyń biri, Sosıalıstik Eńbek Eri Shyrynkúl Qazanbaeva bastaǵan ardagerler estelikter aıtty.
Shıeli aýdany – qaı salada da alǵa basyp, Elbasy usynǵan baǵdarlamalardy laıyqty júzege asyryp kele jatqan óńir. Aýdan basshylyǵynyń burynǵy ádemi úrdisti jalǵastyryp, qoǵam úshin ter tóge qyzmet jasaǵan azamattardy qurmet tutýy, olarmen keıingi urpaqty sabaqtastyrýy jurt kóńilinen shyqty. Sonyń bir dáleli – jańadan ashylǵan «Qurmetti azamattar» alleıasy. Munda aýdannyń damýy men eldiń yntymaǵyna eńbek sińirgen azamattardyń esimderi altyn áriptermen jazylyp, áspettelgen. Shıeli aýdany ardagerler keńesiniń tóraǵasy Sultanbek Orazymbetov quttyqtaý sóz sóıledi. Jaqsylardyń esimin atap, olardy ardaqtaý, árıne, eńbek toıyndaǵy eldiktiń belgisi bolsa kerek.
Aýdan ortalyǵyndaǵy Imanjúsip atyndaǵy ortalyq stadıonda «Altyn dán-2016» merekesine oraı teatrlandyrylǵan kórinis, sala úzdikterin marapattaý, merekelik án shashý ótkizildi. Sharanyń ashylý saltanatynda oblys ákimi Qyrymbek Kósherbaev bıylǵy jyly aımaq dıqandary rekordtyq kórsetkishke qol jetkizgendigin baıandady. Bul qatarda, árıne, 11 150 gektar kúrishtiginiń ár gektarynan ortasha 59,2 sentnerden ónim alǵan Shıeli aýdany dıqandarynyń úlesi mol ekendigin basa aıtty. Sý resýrstary jónindegi komıtet tóraǵasy Islam Ábishev aýyl sharýashylyǵy salasy boıynsha top bastaǵan Shıeli aýdany jurtshylyǵynyń qýanyshyna ortaqtasty. Mártebeli meıman sý únemdeý men ony ysyrapsyz paıdalaný jolyndaǵy dıqandardyń tııanaqty isterine laıyqty baǵa berdi. Al aty álemge keń taraǵan ataqty balýan Dáýlet Turlyhanovtyń sońǵy jyldary ónerkásip salasyna da aralasyp, jańa jumys oryndarynyń ashylýyna atsalysyp júrgendigi belgili. Ol osy saparynda aýdanǵa mol ınvestısııa tartyp, sement zaýytynyń irgetasyn qalaýǵa kelgendigin aıtyp qýantty. Merekelik sharada Aqtóbe oblysy atynan kelgen delegasııa jetekshisi Keldibaı Esmaǵanbet jáne Jambyl oblysy Moıynqum aýdany ákiminiń orynbasary Baqytjan Eseev quttyqtaý sóz sóılep, kórshi oblys jurtshylyǵynyń sálemdemesin jetkizdi. Osydan soń aýdan ákimi Qaıratbek Sársenbaev úzdik sharýshylyqtar men úzdik dıqandardy marapattap, baǵaly syılyqtar tapsyrdy. Olardyń arasynda Dáýlet Jumbekovtiń basqarýyndaǵy 1 100 gektar kúrishtiginen ortasha 68 sentnerden ónim alǵan «Aqmaıa» sharýa qojalyǵy, joǵary eńbek kórsetkishine qol jetkizgen «Altyn dán» sharýa qojalyǵynyń tóraǵasy Asqan Berdibaev, «Shıeli MTS» tóraǵasy Baqytjan Tasbolatov jáne basqa da kóptegen eńbek ozattary bar.
Tústen keıin oblys ákimi jańa sement zaýytynyń irgetasyn qalaý rásimine qatysty. Zaýyt tolyq qýatymen iske kiriskende munda 259 adam jumyspen qamtylmaq. «DANAKE» korporasııasy júzege asyratyn atalǵan zaýyttyń jobalyq quny 29 mıllıard teńgeden astam. Jıyn barysynda D. Turlyhanov jáne qytaılyq kompanııa basshysy Lı Mıng sóz sóıledi.
Osydan keıin merekelik sharalar «Dıqan rýhy máńgilik» atty aqyndar aıtysyna ulasty. Bul alamanǵa elimizdegi tańdaýly 14 aqyn qatysyp, aıtystyń bas júldesi – jeńil avtokólikti sarapqa saldy. Tús aýa bastalyp, túnge qaraı aıaqtalǵan aıtysta bas júldeni Ońtústik Qazaqstan oblysynan kelgen aqyn Erkebulan Qaınazarov ıemdense, birinshi orynǵa shıelilik Meıirbek Sultanhan turaqtady. Ekinshi orynǵa Aıdos Rahmetov kóterilse, Aspanbek Shuǵataev, Erjan Ámir, Raýan Qaıdarov úshinshi oryndy bólisti. Olardyń barlyǵyna da qomaqty qarjylaı syılyqtar tapsyryldy. Merekeniń úshinshi kúni aýyl sharýashylyǵy ónimderiniń jármeńkesi ótkizilip, aýdan ortalyǵynyń turǵyndary arzan ónimderdi saýdalap, máre-sáre bolysty. Jaqaev aýylynda «Álemniń ámirshisi – eńbek» atty patrıottyq ánder baıqaýy ótkizilip, ondaǵy ozattarǵa da syı-sııapattar jasaldy. Sondaı-aq, respýblıka jáne shetelderden kelgen apaıtós balýandar qazaq kúresinen kúsh synasty. Jeńimpazdarǵa zattaı baǵaly syılyqtar tapsyryldy. Al aýdandyq mádenıet úıinde Jambyl oblysy, Moıynqum aýdanynyń ónerpazdary qoıǵan merekelik konsert joǵary dárejede ótkizildi. Jambyldyqtardyń toıǵa shashý retinde usynǵan óneri eki márte Sosıalıstik Eńbek Erleri atanǵan Ybyraı Jaqaev pen Jazylbek Qýanyshbaevtyń uly dostyǵynyń sabaqtastyǵy boldy.
«Baqtorynyń» baǵy jandy
«Altyn dán» merekesi men Ybyraı Jaqaevtyń 125 jyldyǵynyń sońǵy sharasy retinde at báıgesi ótti. Elimizdiń túkpir-túkpirinen kelgen júzdegen shabandoz báıgeniń 3 túrinen synǵa tústi. Oblystyń iri sharýashylyqtary men kásiporyndary – «QazGerMunaı» BK, «Mádi Qajy» JShS, «Jan-Araı» JShS, «Baıqońyr» ÁKK demeýshilik jasaǵan at báıgesi qandy qyzdyryp, jandy jadyratty. Dańqty dıqandy ulyqtaý sharasy sheńberinde ótken saltanatta oblys ákimi Qyrymbek Kósherbaev jınalǵan jurtshylyqty egin jınaý naýqanynyń aıaqtalýymen jáne dala akademıginiń mereıtoıymen quttyqtap, shabandozdarǵa sáttilik tiledi.
– Sońǵy jyldary ulttyq sport túrleri aımaqta buqaralyq sıpat alyp kele jatqany qýantady. Oblysta 14 myńnan astam adam etnosporttyń 7 túrimen shuǵyldanady. Jyl saıyn ótkiziletin «Altyn belbeý» týrnıri respýblıkadaǵy eń tanymal ári bedeldi básekeniń birine aınaldy. Sondaı-aq, bıylǵy jyly kókpardan Jańaqorǵan aýdanynda ótken V Qazaqstan chempıonatynda oblys quramasy tuńǵysh ret qatysyp, ekinshi oryndy jeńip aldy. Kókpardan jasóspirimder qurama komandasy eki márte kúmis júlde ıelendi. Ulttyq sportty damytý maqsatynda ótken jyly paıdalanýǵa berilgen ıppodrom halyqaralyq jarystardy ótkizýge jáne óńirde at sportynyń órkendeýine múmkindik beredi, – dedi aımaq basshysy.
At báıgesimen qatar kókpar, teńge ilý syndy ulttyq sport túrleri de qamtylǵan sharada kókpar oıyndary boıynsha Jańaqorǵan aýdanynyń komandasy jeńiske jetip, 2 mıllıon teńge júldeni ıelendi. Al ekinshi oryn jeńimpazy shıelilikter 1,5 mıllıon teńgeniń sertıfıkatyn aldy. Kelesi júldeli oryndy qanjyǵasyna baılaǵan Qyzylorda qalasynyń shabandozdary 500 myń teńgemen jáne tórtinshi oryndy jeńip alǵan araldyqtar 250 myń teńgemen marapattaldy.
Teńge ilý saıysynda birinshi oryndy jańaqorǵandyq Altaı Qońqaev ıelendi. Ekinshi oryndy jalaǵashtyq Dosbol Nurhan jeńip alsa, úshinshi oryn qyzylordalyq Janbolat Áliqojaevqa tabystaldy.
Qunan báıgede Almaty oblysynan kelgen Janqoılyqovtar áýletiniń «Qaratóbeli» aldymen jetti. Shabandozy О́tegen Aıtbek 1 mıllıon teńge aqshalaı syılyqqa ıe boldy. Ekinshi oryn men 500 myń teńgeni qyzylordalyq Danel Igenbaevtyń «Elik» atty tulpary jeńip aldy. Shabandozy – atseıistiń uly Emıl Igenbaev. Al úshinshi orynǵa laıyq dep tanylǵan «Alataý» sáıgúliginiń ıesi almatylyq Aıbek Baqytbekke 300 myń teńge berildi. Shabandozy – Elshat Baımuhanov.
Toq báıgede birinshi «Patsha» atty sáıgúlik qara úzip kelip, ony báıgege qosqan shıelilik Maılybaevtar áýletine 1,5 mıllıon teńge berildi. Ekinshi oryn men 1 mıllıon teńgeni astanalyq Nurdáýlet Mırastyń «Sháıkúreńi» aldy. Úshinshi oryndy ıelengen Janqoılyqovtar otbasynyń «Altyn qozysyna» 500 myń teńge aqshalaı syılyq tabystaldy.
Báıgeniń basty qyzyǵy – alamanda attar 25 shaqyrymǵa aıdaldy. Almaty oblysynan kelgen Jeńis Smaıylovtyń alamannyń aldyn bermeı júrgen «Baqtorysy» márege birinshi jetip, báıgege tigilgen jol talǵamaıtyn avtokólikke ıe boldy. Al ekinshi oryn tarazdyq Melebek Nurdáýletke buıyrdy. Júldesi – 1,5 mıllıon teńge. Jeńip alǵan «Batyr» atty tulpar ıesi – Asqar Oljabaev. Úshinshi oryn men 1 mıllıon teńge aqshalaı syılyq shyǵysqazaqstandyq Erlan Súleımenovtiń «Mırad» tulpary tizginin ustaǵan Nurlan Jaqsylyqqa buıyrsa, tórtinshi kelgen almatylyq Serik Baqıevtyń «Nurtorysy» 500 myń teńgeni ıelendi.
Osylaısha dańqty dıqan toıy men «Altyn dán» merekesiniń sán-saltanaty ulttyq oıynnyń erekshe tartýymen eldiń rýhyn kóterdi.
Erjan BAITILES,
«Egemen Qazaqstan»
Qyzylorda oblysy
Sýretterdi túsirgen
Baǵdat ESJANOV
