Arhıv jumysy – «Ashyq Úkimet» aıasynda

Qazaqstannyń barlyq oblysynda ornalasqan arhıvterdiń basshylary, beldi mamandary, joǵary oqý oryndaryndaǵy arhıv isiniń mamandaryn daıarlaıtyn bilikti ustaz-ǵalymdar eki kúndik semınar-keńeske qatysty. Sharaǵa kelgender «Ashyq Úkimet» portaly jaǵdaıynda arhıvterdiń atqaratyn mindetterin, qabyldaýǵa daıarlanyp jatqan «Qazaqstan Respýblıkasynyń ulttyq muraǵat qory jáne arhıvteri» atty zań jobasyna ózgerister men tolyqtyrýlar engizýge baılanysty usynystardy tal­qy­lap, keńesý úshin Almatydaǵy Ortalyq memlekettik arhıv mekemesine jınaldy. Bes jyldan keıin bastary qosylyp otyrǵan muraǵat isiniń mamandary talqylaıtyn másele shynynda da shash-etekten bolyp shyqty. Bul semınarda, sondaı-aq, «Ashyq Úkimet» sheńberinde elektrondyq qujattardy saqtaý jáne ony júıeleý, júzege asyrý isi, halyqqa qol­jetimdi aqparattar taratý jáne arhıv isiniń mamandaryn daıarlaý jumysy qatysýshylar qarastyratyn negizgi másele retinde usynyldy. Aıtylǵan oıdyń keıbiri pikirtalas tý­­ǵyzyp, qyzý tartystyń ózegine aınal­ǵa­nynyń ózi bul mekemelerdiń qyzmeti tolyqtaı retke kelip bolmaǵanyn, áli de dáıektelip, júıelene túsýi tıis olqy tusy bar ekenin baıqatty. Zamanǵa saı arhıv qujattaryn jınaqtap, saq­taý­dy qamtamasyz etý tek osy sala qyz­met­ker­le­riniń ǵana bas qatyrar sharýasy emes, Úkimet deńgeıinde sheshilýi tıis suraqtardy ár aımaqtan kelgen arhıv ókili saılap kelipti. Bul semınarda basqany aıtpaǵanda, áli kúnge deıin arhıv pen muraǵat, mýzeı men murajaı sózderin durys qoldanýdy bilmeı shatasyp júrgendermen kúresip sharshap júrgen arhıv mamandarynyń jumysyn retteýdiń tetigin áli de jetildire túsý kerektigi sóz boldy. «Memleket basshysy bes ınstıtýttyq re­formany iske asyrý maqsatynda «Ashyq Úkimet» qalyptastyrýdy júzege asyrý boıynsha tapsyrma bergen bolatyn. Bul baǵytta aldymen zańnamalyq bazany jetil­dirý qarastyryldy. Talqylanatyn negizgi máseleniń biri – mınıstrlik ázirlep jatqan arhıv isi salasynda qyzmet kórsetýdi je­til­­dirý máselesin zań jobasy negizinde júzege asyrý bolyp otyr. Ekinshiden, res­­pýblıkadaǵy mekemelerdiń zamanaýı aqparattyq ınfraqurylymyn qurý, elektrondy arhıvterde saqtalatyn re­sýrstarǵa keń qoljetimdilikti qam­ta­masyz etý úshin servısterdi damytýy­myz kerek»,–deıdi Mádenıet jáne sport mınıstrligi Muraǵattyq is jáne qu­jat­ta­ma departamentiniń dırektory Álııa Mustafına. Álııa Qusaıynqyzy zań jobasyna baı­lanysty respýblıkalyq, aımaqtyq arhıv­terdiń usynystary men talap-tilek­te­rin mınıstrlikke joldaýdy surady. Má­denıet jáne sport mınıstrliginiń uıym­dastyrýymen ótkizilgen semınarda jeke qor, jobalyq qujattar, tele-radıoqujattardy sıfrlyq pishimge aýystyrý taqyryptary boıynsha sheberlik-sabaqtary kórsetildi. Aıgúl AHANBAIQYZY, «Egemen Qazaqstan» ALMATY