Oryndy kóterilgen máselege ońtaıly jaýap tabyla ma?

Májilistiń altynshy shaqyry­ly­mynyń elimizdiń barlyq túkpir­lerindegi, ekonomıkanyń barlyq salalaryndaǵy problemalardy kó­terip, tıisti ortalyq bılik organdaryna depýtattyq saýaldar joldaýdy jıiletip otyr. Biz keıingi jalpy otyrystyń birinde jasalǵan eki saýalǵa sholý jasap kórgen edik. Depýtat Shaımardan Nurymov Bilim jáne ǵylym mınıstri Erlan Saǵadıevtiń atyna saýal joldap, memlekettik tildiń táýelsizdiktiń 25 jylyndaǵy damýyna kóńili tolmaıtynyn bildirgen. «Til adam balasynyń negizgi qasıeti bolǵandyqtan, til baılyǵy eldiń eldigin, jurtshylyǵyn, ǵylymyn, ádebıetin, ónerkásibin, mádenıetin, qoǵamdyq qurylystary men salt-sanasynyń, jaýyngerlik dástúriniń – murasynyń qaı dáre­jede ekenin kórsetetin sózsiz dá­lel­di mólsheri», degen Baýyrjan Momyshulynyń sózderin keltire otyryp ol, batyrdyń ǵylymǵa arqaý bolýǵa tıisti osy talabynyń baıaý júrýde ekenin aıtady. «Joǵary oqý oryndaryndaǵy stýdentterdiń tıisti pánder boıynsha qoldanatyn qazaq tilindegi oqý-ádistemelik quraldary jetispeıdi», deı kelip, ol mınıstrge bilim-ǵylym salasyndaǵy kitaptardyń, ǵylymı eńbekterdiń qazaq tilinde daıyndalýy men jazylýy, sondaı-aq aýdarmalardyń sapasy boıynsha yntalandyrý sharalaryn qolǵa alý qajettigin aıtady. Sonymen qatar, ol «Bolashaq» túlekterinen «ózderi daıyndaǵan ǵylymı jumystaryn (magıstrlik jáne doktorlyq dıssertasııalary) memlekettik tilge aýdarýyn talap etip, olardy elimizdiń JOO men kitaphanalarǵa taratylýyn qamtamasyz etý kerek», deıdi depýtat. Premer-Mınıstr Baqytjan Saǵyntaevtyń atyna joldanǵan depýtat Qudaıbergen Erjannyń saýalynda «Batys Eýropa – Batys Qytaı» kólik dáliziniń salynýy belgilengen ýaqyttan keshigip júrgizilip jatqan sebepteri týraly aıtylady. «Kóp jerlerde oǵan merdigerlerdiń daıyn­dyq­syz, tájirıbeleriniń az nemese tehnıkalyq jabdyqtarynyń jet­kil­iksiz bolǵandyǵy sebep bolyp otyr», deıdi depýtat. Sonymen qatar, ol Ońtústik Qazaqstan oblysyn­daǵy Yntymaq eldi mekenin bul joldyń ortasynan qıyp ótkenine nazar aýdartyp, munyń aýyl turǵyndarynyń qatynasyna kedergi keltirip otyrǵandyqtan, turǵyndar narazylyǵyn týdyrýda ekenin jetkizedi. Osyndaı keleńsiz jaǵdaı Túrkistan qalasynda da oryn alyp otyr eken. Qalanyń janynan ótken jol balalar aýrýhanasyn eldi mekennen bólip tastap, turǵyndardyń em-dom alýǵa barýyn qıyndatqan kórinedi. Saýalynyń qorytyndysynda depýtat Úkimet basshysynyń nazaryn osyndaı unamsyz isterdiń bolmaýyna aýdarýdy, úlken joldardyń eldi mekenderdi aınalyp nemese bıik kópir arqyly ústinen ótýin qarastyrýdy jáne «Batys Eýropa – Batys Qytaı» kólik dáliziniń boıynda qajetti ınfraqurylym nysandaryn salýdy suraıdy. «Belgili ara qashyqtyqta bolýǵa tıisti janar-jaǵar maı stansasy, ashana, dárethana sııaqty oryndardyń bolmaýy halyqty tolǵandyrýda», deıdi ol. Oryndy saýaldar zerttelip, oraıly jaýaptar beriletin shyǵar degen úmittemiz. Ázirlegen Jaqsybaı SAMRAT, «Egemen Qazaqstan»