«Jaısań» ázirge jaısyz bolyp tur

Depýtat Gleb Shegelskıı Pre­mer-Mınıstr Baqytjan Saǵyn­taev­tyń atyna saýal joldap, «Batys Qytaı – Batys Eýropa» kólik jolymen Qazaqstannan Reseıge shyǵatyn «Jaısań» shekaralyq beketindegi jaısyzdyq týraly baıandaǵan edi. Depýtattyń aıtýyna qaraǵanda, Qazaqstan jaǵy 227 mln teńge qara­jat salyp, joldy úsh jolaqtan alty jolaqqa aýystyryp, beketten bógelmeı ótý máselesin sheship qoı­ǵan. О́kinishke qaraı, Reseı jaǵynda mun­daı jaǵdaı joq, sonyń kesirinen eki eldiń beketi arasyndaǵy beıtarap aımaqta kólik tolyp ketedi eken. Munda jeńil mashınalar 7-8 saǵattap, al júk mashınalary táýliktep turyp qalatyn kórinedi. Júrginshilerge tamaq satatyn oryndar túgil qarapaıym gıgıenalyq qajettilikti óteıtin jaılar da qa­ras­­tyrylmaǵan. Sonyń kesirinen bizdiń kóp aqsha bólip, jaǵdaıdy jaqsartqanymyz dalaǵa ketip tur. Osyny Reseı Federasııasynyń úkimetimen kelisip, ekijaqty sheshýdi qarastyrsańyz eken, degen edi depýtat Úkimet basshysyna. Bul saýaldy qoldap birneshe depýtat óz qoldaryn qoıǵan-tyn. Saýalǵa jýyrda Premer-Mı­nıstr Baqytjan Saǵyntaevtan jaýap keldi. Onda atalmysh joldy keńeıtý maqsatymen Qazaqstan, Qytaı jáne Reseı taraptary memorandým qabyldaǵany aıtylǵan. Osy memorandýmǵa sáıkes Qytaı jaǵy ózine tıesili mindetti tolyǵymen oryndap, óz aýmaǵy arqyly ótetin 3425 shaqyrymdyq joldy talapqa sáıkes qaıta jaraqtaýdy aıaqtaǵan. Qazaqstan jaǵy da ózine tıesili dálizdiń 2028 shaqyrymyn tegis jaraqtap úlgergen. Qalǵanyn ústimizdegi jyldyń sońyna deıin bitirmekshi. Al Reseı jaǵy Sankt-Peter­býrgten shyǵyp, Máskeýdi aınalyp ótip, Qazaqstan shekarasyna deıin jetetin joldy tek 2019 jyly ǵana aıaqtaýdy belgilep otyr. Sonyń ishinde Peterbýrgten Máskeýdiń aınalma jolyna deıingi qashyqtyq 2018 jyly aıaqtalsa, qalǵanyn tek 2019 jyldyń aıaǵyna deıin bitirmek. Reseıdiń Orynbor qalasynan Qazaqstan shekarasyna deıin jetetin 150 shaqyrymdyq joldyń sapasy tómen. Osyny eskerip, qazan aıynda Astana qalasynda bolǵan aımaq­aralyq yntymaqtastyqtyń 13-forýmynda Qazaqstan men Reseı taraptary vedomstvoaralyq deńgeıde «Batys Qytaı – Batys Eýropa» kólik dáliziniń boıyndaǵy ınfraqurylymdardy damytý máselesin qarastyrǵan qu­jatqa qol qoıdy. Bul qujat Qazaqstan aýmaǵyndaǵy «Jaısań» men Reseı aýmaǵyndaǵy «Sagarshyn» shekaralyq beketterindegi ótkizý múmkindikteriniń sapasyn arttyrýdy kózdeıdi, delingen jaýapta. Sóıtip, «Jaısań» beketindegi jaǵdaı jaqyn arada jaqsaryp qalatyn shyǵar degen úmit bar.