Qoǵamdyq keńes jumysy jandandyrýdy qajet etedi

Qazirgi tańda Qazaqstan boıynsha ártúrli deńgeıdegi 226 qoǵamdyq keńes jumys isteıdi. Olardyń is-áreketterine ótken jylǵy 2 qarashada qabyldanǵan «Qoǵamdyq keńester týraly» Zań negizinde baqylaý jasalady. Bul týraly keshe Din isteri jáne azamattyq qoǵam mınıstrliginiń jaýapty hatshysy Marat Ázilhanov «Qoǵamdyq keńester: qyzmet tájirıbesi men ózara is-qımyl tetikteri» taqyrybynda ótken respýblıkalyq semınarda málimdedi. Jıyndy ashqan mınıstrlik ókili qoǵamdyq keńesterdiń memlekettik saıasatty júzege asyrýda mańyzdy qural bolyp otyrǵanyn áńgimelep, quzyrly organdar tarapynan sheshim qabyldaýda qoǵamdyq ınstıtýttar men azamattardy keńinen tartýdy qamtamasyz etýge yqpal etetinin jetkizdi. Osy ýaqytqa deıin qoǵamdyq keńestermen azamattardyń quqyqtary, erkindigi men mindetterine qatysty normatıvtik-quqyqtyq aktilerdiń 3800 jobasyna sheshim berilip, ákimder men barlyq deńgeıdegi memlekettik mekeme basshylarynyń 600-den astam esebi tyńdaldy. Buǵan qosa, ózekti saýaldardy talqylaǵan 285 qoǵamdyq tyńdaý ótti. Dese de, elimizdegi qoǵamdyq keńes músheleriniń baqylaý ótkizýdegi biliktilikterin arttyrý, jumystarynda kezdesetin problemalar, halyqaralyq tájirıbelerdi de zerttep, zerdeleý jáne olardy ıgiligimizge paıdalaný osyndaı talqylaýdy qajet etti, dedi Marat Almasuly. Sonymen qatar, Parlament Májilisiniń depýtaty Serik Seıdýmanov pen BUU Damý baǵ­darlamasy turaqty ókiliniń orynbasa­ry Mýnhtýıa Altangerel kirispe sóz sóılep, semınar jumysynyń mańyz­dylyǵyn, munda aıtylǵan oı-pikir­lerdiń barlyǵy saraptalatynyn aıtty. Basqosýda Ortalyq Azııadaǵy «INTRAC» baǵdarlamasynyń sarapshysy Anara Moldasheva Qyrǵyzstandaǵy qoǵamdyq keńesterdiń qurylý joldary men is-áreketterindegi oń nyshandardy sóz etti. Al Qazaq gýmanıtarlyq zań ýnı­versıteti qylmystyq-proses­sýaldyq jáne jemqorlyqqa qarsy ǵylymı-zertteý ınstıtýtynyń dırek­tory Marat Qoǵamov, Almaty qala­lyq qoǵamdyq keńesiniń tóraǵasy Rah­man Alshanov, Jambyl oblystyq qoǵamdyq keńesiniń tóraǵasy Jandar Káribaev, «Shyǵys Qazaqstan oblystyq Azamattyq alıansy» zańdy tulǵalar birlestiginiń tóraǵasy Oleg Chernyshov jáne Qaraǵandy oblystyq qoǵamdyq keńesiniń hatshysy Natalıa Vshıvseva baıandamalarynda óz óńirlerindegi uıymdardyń jumystaryn saralady. Respýblıkalyq semınardyń ekinshi sessııasy usynystardy ekshep, jos­parlardy daıarlaýmen, qarjylandyrý kózderin qaraýmen jalǵasty. Son­daı-aq, qatysýshylar «Qoǵamdyq keńes­ter týraly» Zańǵa ózgerister men to­lyqtyrýlar engizýdi qoldap, norma­tıvtik-quqyqtyq aktilerdiń jobasyn bekitti. Biz sharadan soń Almaty qala­lyq máslıhatynyń depýtaty, qoǵam­dyq keńestiń tóraǵasy, «Turan» ýnıver­sıtetiniń rektory Rahman Alshanovqa jolyǵyp, pikirin bilgen edik. Ol bylaı dedi: – Halyqtyń ár sózi – bizdiń nazary­myzda. Úsh aı saıyn qoǵamdyq tyń­daýlar ótkizemiz. Dál qazirgi kezde jeke páter ıeleriniń jumystaryn qarap jatyrmyz, 60 adamnyń aryzyn qabyl­dadyq. Osylardyń negizinde 81 usynys tústi. Endi osylardy jan-jaqty qaraı túsý qajet. Bizdiń negizgi maqsatymyz – halyq­tyń sózin memleketke jetkizý, usynys jasaý. Bul úshin tek qoǵamdyq keńes músheleriniń oı-pikiri azdyq etýi múm­kin. Soǵan baılanysty 78 qoǵamdyq uıymmen kelisimshartqa otyrdyq. Sarapshylardy da birge jumys isteý­ge shaqyryp, ár qujatymyzdy zań aıa­syna sııatyndaı jasaýǵa tyrysýda­myz. Onymen qosa, qoǵamdyq tyńdaý­larymyzǵa belsendi azamattardy da shaqyramyz. Olar da el ishindegi, jurt kókeıindegi máselelerdi ortaǵa salyp, usynystar ázirlenedi. Ashat RAIQUL, «Egemen Qazaqstan»