Ishki konkýrs – maman tańdaý mindetin shıratýda

Memlekettik qyzmetkerlerdiń mansaptyq ilgerileýinde bıyldan bastap jańa júıe qoldanysqa engizilgen edi. Bul oraıda «Memlekettik qyzmettiń mansaptyq modeli» degenderi ataýmen iske qosylǵan Avstralııa, Fransııa jáne Japonııa elderiniń tájirıbesi ishki konkýrstar ınstıtýty maman tańdaý mindetin shırata túsken. Bul týraly Memlekettik qyzmet jáne sybaılas jemqorlyqqa qarsy is-qımyl agenttiginde ótken brıfıngte Memlekettik qyzmet departamenti dırektorynyń mindetin atqarýshy Jarqyn Tileýkenov pen Qazaqstannyń HR-menedjerleri qaýymdastyǵynyń prezıdenti Gúlmıra Raısova baıandady. Memlekettik qyzmetke ornalasýǵa jarııalanǵan konkýrsqa engizilgen jańa júıe tutasymen úsh kezeńge negizdelse, onyń alǵashqy ekeýin aldyńǵy kezekte uıymdastyrý mindetti dep tanylady. Máselen, mekemede bos laýazym paıda bolsa, memlekettik organ ishki konkýrstyń birinshi kezeńin ótkizedi. Oǵan, eń aldymen, osy organnyń ózinde eńbek etetin tómengi satydaǵy laýazymdarǵa ıe qyzmetshiler qatysýy tıis. Mundaı amaldar memlekettik qyzmetshilerge ózderiniń mansaptyq ilgerileýin uzaq merzimge josparlaýǵa múmkindik beretini sózsiz. Sonymen qatar, birinshi kezeńde uıymdastyrylatyn bul konkýrsta memlekettik organnyń mamandarymen qatar, onyń aýmaqtyq bólimsheleriniń qyzmetkerleri de qatysa alady. Ol úshin, árıne, úmitkerdiń tómengi laýazymdarda eńbek ótilimen qatar,  soǵan sáıkes keletin bilimi de basty nazarǵa alynady. Al mansaptyq ilgerileýdiń arqasynda ishki konkýrstardyń qorytyndysy boıynsha tómengi laýazymnan joǵary laýazymǵa aýysqan qyzmetshilerdiń sany 2 512 adamǵa jetkendigin aıtqan Jarqyn Oralhanuly, ishki konkýrstardyń ekinshi kezeńi memlekettik qyzmettegi tıisti eńbek ótili bar barlyq memlekettik qyzmetshiler arasynda ótetinin tilge tıek etti. «Jyl basynan beri 651 memlekettik qyzmetker ishki konkýrstardyń ekinshi kezeńi arqyly joǵary laýazymdarǵa taǵaıyndaldy. Bul jańa júıeniń tıimdiligin kórsetýde. Al úshinshi kezeń týraly aıtar bolsaq, ol – «jalpy konkýrs» dep atalady. Iаǵnı, bul memlekettik qyzmet­kerler arasynda tıisti úmit­kerler anyqtalmaǵan jaǵdaıda ǵana jarııalanatyn konkýrs. Oǵan barlyq azamattar, tipti, eshqandaı eńbek ótili joq joǵary oqý oryndarynyń túlekteri de qatysýǵa quqyly», – deıdi ol. Baspasóz máslıhatynyń ekinshi kezeńi memlekettik qyzmet ótilin esepteý tártibine qatysty áńgimemen jalǵasty. Bul týraly sóz sóılegen Qazaqstannyń HR-menedjerleri qaýymdastyǵynyń prezıdenti Gúlmıra Raısova agenttiktiń resmı saıtyna keletin saýaldardyń basym bóligi tap osy taqyrypty arqaý etetindigin aıtady. «Esterińizde bolsa, aǵymdaǵy jyldyń shilde aıynan beri laýazymdyq jalaqyny bekitýge quqyq beretin eńbek ótilin esepteýdiń jańa erejeleri qoldanysqa engizilgen edi. Jańa erejege saı, laýazymdyq jalaqyny bekitýge quqyq beretin eńbek ótiline áskerı qyzmet, quqyq qorǵaý jáne arnaıy memlekettik organdardaǵy qyzmet ótili, arnaıy oqý oryndaryndaǵy jáne arnaıy bastapqy oqytý oryndaryndaǵy bilim alý merzimderi de esepte­ledi. Sonymen qatar, laýa­zymdyq jala­qyny bekitýge azamattyń memle­kettik mekemelerdegi basshy­lyq qyzmetterinen qurala­tyn eńbek ótili de tirkeledi», – dedi Gúlmıra Bolatqyzy. Spıkerlerdiń aıtýynsha, jańa júıeniń taǵy bir ereksheligi – shet­elde bilim alǵan mamannyń eńbek ótiliniń eseptelýi. Iаǵnı, sońǵy ári sony talapqa saı, eger qyzmetker oqýǵa attanar kezde memlekettik qyzmette eńbek etse jáne oqýy aıaqtalysymen sol qyzmetke qaıta oralsa, onyń shetelde bilim alǵan jyldary memlekettik qyzmet ótiline qosylady. Al bıyldan bas­tap elimizde «Memlekettik qyzmet týraly» Zań kúshine engendigin eskersek, mundaı ózgeris ómirin memlekettik qyzmetke arnaǵan mamannyń mansaptyq ilgerileý jolynyń basty sharty bolyp sanalatyny sózsiz. Nurlybek DOSYBAI, «Egemen Qazaqstan»