Ájeler salǵan ánder-aı...

Qala mańyndaǵy Qarǵaly aýy­lynda «Asyl ájeler» án ansambli qurylǵanyna da kóp bola qoı­ǵan joq. Degenmen, ol azǵantaı ýa­qytta kórermenniń kózaıymyna aı­naldy. Jaqynda Qarǵaly aýylyn­daǵy «Geolog» mádenıet úıinde «Asyl ájeler» halyqtyq án ansambli turǵyndarǵa shyǵar­ma­shy­lyq eseptik konsertin usyndy. Án men kúıdi qudiretteı qur­met­teıtin halqymyzdyń mundaı saýyq-saıranǵa ańsary aýyp tu­ra­tyn ádeti emes pe, kúndelikti ózimiz kórip júrgen pálenshe emes pe dep muryn shúıirmeı, jumyla jınal­ǵanyn qaıtersiń. Bastaryn qosqan­dary­na úsh-tórt jyldyń júzi bol­ǵan­­men, sahna mádenıeti­ne syralǵy bolyp qalǵan ájeler de irkil­me­di, ımenip-jasqanshaq­ta­mady. Esep­tik konsert shymyl­dy­ǵyn ha­lyq áni «Sary­bı­daı­men» ashqan án­shi áje­ler biri jún tútip, biri ur­shyq ıirip, taǵy biri quraq kórpesin ala shyǵyp, sahna sánin keltirip án ajaryn asha túskende rıza bol­ma­ǵan kórermen qalmady dese de bol­ǵandaı. Bu­dan keıin ájeler aqtóbe­lik sazger Nur­talap Júsipovtiń «Jeńispen jetken aǵalar» ánin shyrqasa, M.Aryn atyn­daǵy Qarǵa­ly qazaq or­ta mektebiniń 2-sy­ny­bynda oqı­tyn bir top oqýshy «El qorǵaýǵa ázirmiz!» ánimen sabaq­tas­tyrdy. Sahna tórine kóterilgen tórt áje «Shalqardan ushqan aqqý­lar» ánin tamyljytty. Budan soń halyq ánderi, ataqty kompozıtorlar Shámshi Qaldaıaqovtyń, Eskendir Hasanǵalıevtiń ánderi qalyq­ta­dy. Ansambl qurylǵannan beri kon­sertmeıster bolyp júrgen Shol­pan Rsymbetova ájelerdi syr­naımen súıe­meldep, olardyń ár ánniń ıirimderi men naqyshtaryna tereńirek boılaýyna ásem áýendik jaǵdaı týǵyzdy. «Ánniń de estisi bar, eseri bar» degendeı ánshi ájeler ár ándi tyńdarmanǵa talmaı jetkizý­ge, ásem áserge bóleýge tyrysty. Ansambldiń kórkemdik jetekshisi Qaragóz Saǵynovanyń aıtýyn­sha, «Asyl ájeler» án ansambli 2008 jyly kúzde dúnıege kelipti. Qazir ansambldiń quramynda 26 áje óner kórsetedi eken. Osy kún­deri bir ulty orys áje de ansamblge qatysýǵa tilek bildirip júrgen kórinedi. Ánshi ájelerdiń eń úlkeni seksenge jaqyndasa, jasy kishisi alpystyń aýylyna at basyn burǵan. Olardyń deni — kóp balaly, ul­daryn uıaǵa, qyzdaryn qııaǵa qon­dyr­ǵan ardaqty analar, nemere sú­ıip otyrǵan súıikti ájeler. Ánshi ájeler qala mańyndaǵy selolyq okrýgterdi túgel aralap konsert berip, tabysty oralypty. Sondaı-aq «Asyl áje­ler» halyqtyq án an­sambliniń óner­lerine kórshiles Al­ǵa, Qarǵaly aý­dan­darynyń turǵyn­dary da tánti bolypty. Ánshi ájelerimizdiń reper­týarynda otyz­dan astam án bar eken. Olar kóbine sırek aıtylatyn halyq­tyq jáne qazaq kompozıtorlarynyń ánderi desek, bolashaqta reper­týar­laryn bas­qa ulttardyń da ánderimen to­lyqtyrmaqshy kórinedi. Satybaldy SÁÝIRBAI. Aqtóbe oblysy.