Áskerı-teńiz kúshterine mobıldi súńgýir kesheni jetkiziledi

«Qazaqstan ınjınırıng» UK» AQ-tyń quramyna kiretin qazaqstandyq «Gıdroprıbor» ǴZI»  alǵash ret QR QK Áskerı-teńiz kúshteriniń arnaıy maqsattaǵy bólimshelerine mobıldi súńgýir keshenin jetkizip berýdi júzege asyrady, dep habarlaıdy egemen.kz Qorǵanys mınıstrliginiń resmı saıtyna silteme jasap. Atalmysh keshen Kaspıı teńiziniń sýasty aıdynyn kúzetý úshin arnalǵan. Qazirgi ýaqytta ǵylymı-zertteý ınstıtýty osy jabdyqty áskerı teńizshilerge tapsyrý jóninde tıisti synamalar júrgizýde. Jaýyngerlik tapsyrmalardy oryndaýmen qatar jańa mobıldi súńgýir kesheni jabdyqtalmaǵan jaǵalaý jaǵdaılarynda súńgýirlerdiń jattyǵý turǵysyndaǵy shógýin qamtamasyz etedi. Onyń quramyna súńgýirlik túsýlerdi qamtamasyz etý quraldary bar modýl, ashyq jáne tuıyqtaýly úlgidegi tynys alý apparattary men teńizde jumys jasaýǵa arnalǵan arnaıy qaıyq kiredi. Jetkiziletin keshen joǵary ótimdi KAMAZ avtomobıliniń bazasynda ornalastyrylǵan. Atalǵan tehnıka júk avtomobılderi men arnaıy tehnıkany jınaý boıynsha mamandandyrylǵan «KAMAZ ınjınırıng» AQ birlesken qazaqstandyq-reseılik óndirýshiden satyp alyndy.  Jetkizilip beriletin keshen QR QM ÁTK bólimsheleriniń jaýyngerlik ázirligi men jaýyngerlik qabilettiligin arttyrady.