Qaıratyń qaıda, «Qaıratym»?

Bir kezderi oıyny qazaq jankúıerlerin jelpintken «Qaırat» fýtbol komandasynyń qaı­ta­dan aty jańǵyryp, tamasha jeńisterge jetýin ań­sap júrgender az emes. Endigi jerde ulttyq fýt­boldyń aıy ońynan týǵan kúnin arman­daı­tyn­dar­dyń taýy shaǵylmaýy tıis. Eger «Qaırattyń» oıyny qarjyǵa tirelip tursa – jańa maýsymda ko­mandanyń bıýdjeti 6 mıllıon AQSh dol­la­ry­nan asady. Qysqasy, «Qaırattyń» alańsyz oına­ýy­na barlyq múmkindikter jasalýda. Sonymen kók­tem­­niń alǵashqy kú­ni, ıaǵnı 1 naýryzda Al­maty qalasynyń ákim­­diginde «Qaı­rat» fýtbol klý­by­na qa­tysty úsh jaq­ty ke­lisim-shart­qa qol qo­ıyl­dy. Osylaısha qa­la­lyq ákimdik pen «QazRosGaz» JShS ókil­­deri fýtbol klý­bynyń bıýdjetine aý­darylar qarjynyń kólemin resmı qujatpen naq­tylady. Jańa maýsymda «Qaı­rat­tyń» bıýdjeti shamamen 6 mıllıon AQSh dollarynan asady. Onyń 700 mıl­lıon teńgesin Al­­maty qa­lasy ból­se, «Qaz­Ros­Gaz» JShS 2 mıllıon dol­lardy klýb shotyna aýdaratyn boldy. Sóz «Qaırat» týraly qozǵalǵanda máseleniń bir sheti únemi Almaty qalasynyń basshylaryna da baryp tirelip jatatyny jasyryn emes. Kelisim-shart jasasý rásiminde sóz alǵan qala áki­­mi Ahmetjan Esimov óziniń jeke saıtyna «Qaıratqa» qatysty saýaldar jıi kelip túsetinin atady. Fýtboldy jaqsy kóretin ákimniń qalanyń bas fýtbol komandasyna jetkilikti túrde kóńil bólmeıdi dep esepteıtin jankúıerler saýalyna oraı Esimov bylaı dedi: – Men óz tarapymnan bıyl qala ákimdigi «Qaı­ratqa» kórseter kómegin tolyǵymen ótedi dep aıta alamyn. Kópshiliktiń súıiktisine aınal­ǵan komanda jańa maýsymǵa daıyn. Onyń barlyq qaryzy óteldi. Al bıylǵy jylǵy klýbtyń qorjynyna túsken qarjy aıtarlyqtaı qomaqty. Endigi másele, bólingen qarjynyń tıisti jerine der shaǵynda jetýin qamtamasyz etý. Biz bul isti jiti qadaǵalaımyz. «Qaırat» komandasyna el birinshiliginde 6 orynnan tómendemeý mindetin qo­ıyp otyrmyz. Ákimnen keıin sóz kezegi tıgen klýbtyń jańa bas bapkeri Vladımır Nıkıtenko: – Meniń ómirimde «Qaırattyń» orny erekshe. Bul komanda maǵan asa qymbat. «Qaırattyń» aldaǵy ýaqytta tamasha oıyn órnegin kórsetkenin qalaımyn. Biz tipti júldeli oryndardan taby­lýǵa da bar jigerimizdi salatyn bolamyz. Osy maqsatpen komandaǵa tájirıbeli oıynshylardy jınap úlgerdik. Degenmen, el birinshiligindegi alǵashqy 6 kezdesýdiń orny bólek. Eger bastapqy kezdesýlerdi sátti aıaqtasaq, júldeli oryndar úshin talasa alamyz, – dedi. Jalpy, fýtboldy súıetin jandarǵa Nıkı­ten­konyń esimi ábden tanys. Ol KSRO chempıo­natynda «Qaırattyń» sapynda 256 oıyn ótkizgen bolatyn. Onyń osy jetistigi men rekordyn basqa fýtbolshy áli qaıtalaı qoıǵan joq. Sonymen jańa bapker Túrkııadaǵy oqý-jat­tyǵý kezderinde  qar­sylas retinde ádeıi myqty ko­man­dalardy tań­daǵanyn aıtyp: – Joldastyq kez­desýler óte tar­tys­ty ótti. Ko­man­da­myz­dyń kúshti ko­­­man­dalarmen teń dá­­­­rejede taıtalasa ala­­­­tynyna kóz jet­kizdik. Bul jat­ty­ǵýlardyń fýt­bol­shy­la­rymyz úshin paıda­sy tıdi, – dedi. Aıtqandaı, maý­symaralyq úzilis ke­zinde úsh ret oqý-jattyǵý jıynyn ót­kizip, Túrkııa elindegi 14 joldastyq kezdesýdiń beseýinde basym túsip, úsheýinde jeńilip, qalǵan oıyndarda teń túsken. Osy jattyǵýlardyń nátıjesin kórsetýge «Qaırattyń» qaıraty jete me? Onyń jaýaby aldaǵy kúnderdiń enshisinde. Bas bapkerge atal­mysh komandada birge teńbil dop tepken táji­rıbeli sportshy Sergeı Stýkashov kómektespek. Qazirge almatylyqtar úshin Almaty «Qaı­ra­tyna», kishi fýtbol komandasyna qatysty úlken jańalyq – kezinde Pele oınaǵan, Brazılııanyń áıgili «Santos» komandasymen joldastyq kezdesýi dep aıtýǵa bolady. Mını-fýtboldan álemniń juldyzdy komandasyna aınalǵan «Santos» ko­man­dasymen qarsylasý – almatylyq «Qaı­rat­qa» úlken syn bolyp tur. Sport salasyndaǵy osy bir aıtýly oqıǵaǵa oraı, 7 naýryzda Balýan Sholaq atyndaǵy Sport saraıynda baspasóz máslıhaty ótpek. Sport sa­lasyna qalam terbeıtin áriptesterimiz álemniń eki dúrkin úzdik oıynshysy atanǵan «Santostyń» shabýylshysy Falkaomen jáne osy komandanyń bas bapkeri Fernardo Ferettımen suhbattasa alady. Jýrnalıstermen kezdesýge kishi «Qaırat­tyń» jetekshileri de kelmek. Al ótken ǵasyrdyń aty álemge máshhúr bolǵan fýtbolshysy Pele «Santos» pen «úlken» fýtbolda 18 jyl oınaǵan. Brazılııanyń eń myq­ty klýbtary qatarynda «Santos» komandasynyń qazirgi kóshbas­shy­sy joǵaryda atap ótken Falkao bolyp tabylady. Almatylyqtar taǵatsyzdana kútetin bul jol­dastyq kezdesý qyz-kelinshekterdiń merekesinen keıin ile-shala, 9 naýryzda ótpek. Aınash ESALI. Almaty.