Qazaqstandyqtar "Qorǵasta" kýáliksiz júre alady

Halyqaralyq shekaralyq yntymaqtastyq ortalyǵynyń basshylyǵy osy aımaqta jeke kýáliksiz júrýge ruqsat berý jaǵyn qarastyrýda. «Qazirgi tańda el azamattary shekaradan sheteldik tólqujat arqyly ótedi. Qarasha aıynyń 1-nen bastap, «Qorǵas» aımaǵynda shekaradan ótý tártibi ózgeredi. Endi ol jerden jeke kýálik arqyly da ótýge bolady. Al balalarǵa týý týraly kýálik qajet», - dedi ortalyqtyń prezıdenti Qaharman Jazın qazaqstandyq jýrnalısterge arnalǵan baspasóz týrynyń barysynda. Buǵan qosa ol Qorǵastaǵy uzyn-sonar kezekke baılanysty máseleniń qalaı sheshiletinin aıtty. Onyń málimetteri boıynsha, 2012 jyly «Qorǵastan» 310 myń adam ótken. Bıylǵy jyly osy kúnniń ózinde ol jerge qatynaıtyn azamattar sany 3 mıllıonnan asady. Aldyn ala boljam boıynsha, 2020 jylǵa qaraı ortalyqtan ótetin adamdar sany 8 mıllıonǵa deıin jetedi. «Biz qazir uzyn-sonar kezektiń máselesin sheshý baǵytynda keshendi sharalardy júzege asyrýdamyz. Birinshiden, biz «Qazposhta» uıymynyń qabyldaý tirekteriniń sanyn, osy júkterdi jáne kólikterdi qabyldaıtyn adamdar sanyn kóbeıtemiz. Kóktemde «Qazposhta» úlken júk termınalynyń qurylysyn bastaıdy. Jiberý tártibimen baılanysty qazirgi problemalar sheshiledi»,-dedi ol. Buǵan qosa uıymdasqan týrıster úshin jeke dálizder men «Qazposhtanyń» qabyldaý tirekteri bólinetin bolady. «Bir kúnge qajetti zatyn alý úshin keletin uıymdasqan týrıster alypsatarlyqpen aınalyspaıdy. Endi olar úshin arnaıy dáliz jasalyp, aldyn ala málimetterin usynǵan uıymdasqan týrıster shekaradan nebári birneshe mınýttyń ishinde ótip úlgeredi. Olar qaıtarda júkterimen shyǵatyn kezde de solaı bolady. Osyndaı tártippen biz alypsatarlyqpen aınalyspaıtyn adamdar arasynda týrızm uıymdastyrmaqpyz»,-dep qorytty sózin Qaharman Jazın. Aıta keteıik, «Qorǵas» halyqaralyq shekaralyq yntymaqtastyq ortalyǵy Almaty oblysynyń Panfılov aýdanyna qarasty Qazaqstan-Qytaı shekarasynda ornalasqan. Mundaı aımaqtyń qurylýy memleketterdiń shekara aımaǵynda vızasyz kezdesý uıymdastyrýlaryna múmkinik jasaıdy. Sondaı-aq ol Qazaqstan, Qytaı jáne TMD elderiniń taýarlaryn tanystyryp, kelisimder jasaý úshin de yńǵaıly.