Astanada halyqaralyq kitap kórme-jármeńkesi ótedi

9-12 qarasha aralaǵynda Astanada «Eurasian Fair-2016» Eýrazııa halyqaralyq kórme-jármeńkesi bolady. Onda TMD-nyń, Eýropa jáne Azııanyń 30-dan astam eliniń baspa, kitap saýdasy, ǵylymı-aǵartýshylyq jáne polıgrafııa kompanııalarynyń ókilderi bas qosady.  Qazaqstan Táýelsizdiginiń 25 jyldyǵyna oraılastyrylǵan bul sharaǵa Mádenıet jáne sport mınıstrligi men Astana qalasy ákimdigi qoldaý kórsetse, al uıymdastyrýshysy – «Folıant» baspasy. Kórme-jármeńkege kelýshilerdiń nazaryna jaqyn jáne alys shet memleketterdiń kitap shyǵarý, polıgrafııa salasyndaǵy jetekshi baspa úıleriniń zamanaýı kitap ónimderiniń baı assortımenti, jańa tehnologııalary usynylady. Uıymdastyrýshylardyń aıtýynsha, kórme-jármeńkeniń ári kúni qyzyqty mádenı baǵdarlamalarǵa, ǵylymı sharalarǵa toly bolmaq. Máselen, onyń aıasynda ǵylymı-tájirıbelik konferensııalardy, tusaýkeserlerdi, dóńgelek ústelderdi, tanymal mádenıet qaıratkerlerimen, jazýshylarmen, aqyndarmen kezdesýlerdi, forýmdardy, baıqaýlar men vıktorınalardy ótkizý kózdelip otyr. Sonymen qatar, bul kúnderi baspa úıleri men kitap saýdasyn júrgizetin uıymdardyń basshylary, resmı tulǵalar, halyqaralyq sarapshylar, proza men poezııanyń beldi ókilderi, baspa jobalaryn qoldaıtyn uıymdar men qorlardyń, kitaphana, bilim berý, ǵylymı qoǵamdastyqtyń ókilderi kitap salasy tóńiregindegi ózekti máselelerdi talqy tarazysyna salatyn bolady. «Eurasian Fair – 2016» Eýrazııa halyqaralyq kitap kórme-jármeńkesi dıreksııasy dırektorynyń orynbasasyr Raýshan Qapanqyzynyń sózine qaraǵanda, mundaı aýqymdaǵy shara Astana tórinde alǵash ret uıymdastyrylmaq. Al ony ótkizý týraly bastamany «Folıant» baspasy kótergen. Láıla Edilqyzy, «Egemen Qazaqstan»