Semeıde Qaıym Muhamedhannyń atyna kóshe beriledi

Semeı qalasy máslıhatynyń turaqty komıssııasynda ótken qoǵamdyq tyńdaý barysynda burynǵy Internasıonal kóshesiniń ataýyn asa kórnekti ǵalym, abaıtanýshy, Abaı murajaıyn qurýshy, Alash qaıratkerleriniń izin jalǵaýshy Qaıym Muhamedhanovtyń atyna aýystyrý máselesi qaraldy. Qala basshylyǵy, máslıhat depýtattary, jergilikti atqarýshy organdar men qoǵamdyq uıymdardyń ókilderi qatysqan tyńdaý barysynda turaqty komıssııa músheleri kóshege ǵalymnyń esimin berýdi qoldady. Bıyl birqatar óńir zııalylary jáne Dına Qaıymqyzy ǵalymnyń atyna ózi eńbek etken Semeı qalasynan kóshe ataýyn berý týraly usynystaryn jetkizgen bolatyn. Buǵan deıin ǵalymnyń atyna aýystyrylmaq bolǵan Shmıdt kóshesine Q.Muhamedhanovtyń urpaqtary men semeılik zııalylar qarsylyq bildirgen edi. Olar atalǵan kóshe qaǵa beriste, eleýsiz ári kishigirim kóshelerdiń biri degen ýájdi alǵa tartqan bolatyn. Al Intenasıonal kóshesi qalanyń ortalyǵynda ornalasqan. – Jergilikti onomostıka komıssııalary 2013 jyly taratylǵandyqtan, turaqty komıssııa músheleriniń daýys berýimen máslıhat hattama toltyryp, ony jergilikti atqarýshy bılik óziniń aqparattyq resýrstarynda jarııalaıdy. Budan keıin oblystyq jáne respýblıkalyq onomastıkalyq komıssııalardyń qaraýynan ótýi tıis. Úkimet qaýlysymen tolyǵymen bekitilgen soń ǵana kóshe ataýy zańdy bolmaq, dedi bul týrasynda Semeı qalasy mádenıet jáne tilderdi damytý bóliminiń qyzmetkeri Tolqyn Berikbekova. Bıyl óńirde Qaıym Muhamedhanovtyń 100 jyldyq mereıoıy aıasynda túrli is-sharalar ótip jatyr. Jyl basynda О́skemen qalasyndaǵy A.Pýshkın atyndaǵy oblystyq kitaphanada ǵalymnyń elektrondyq bıblıografııasynyń tusaýkeseri ótse, Semeıde «Qazaqtyń uly Qaıymy» atty tanymdyq kesh uıymdastyrylǵan bolatyn. Qazirgi kezde ǵalymnyń esimin oblys ortalyǵynda da tıisti deńgeıde ulyqtaý máselesi qaralyp jatyr. Dýman Anash, «Egemen Qazaqstan»