Mıssııa ınfraqurylym áleýetin baǵalaıdy

Búgin Astanada Qazaqstannyń ıadrolyq ınfraqurylymyna keshendi sholý jónindegi mıssııa (INIR mıssııasy – Integrated Nuclear Infrastructure Review) bastaldy. 7-qarashaǵa deıin jalǵasatyn sharaǵa oraı Energetıka mınıstri Qanat Bozymbaev Atom energııasy jónindegi halyqaralyq agenttik ókilderimen jáne sarapshylarymen kezdesti. Jeti kúndik jıyn Qazaqstan Respýblıkasy men atalǵan agenttik arasyndaǵy yntymaqtastyq jónindegi jospar aıasynda uıymdastyrylǵan. «Álemdik mańyzy bar INIR mıssııasy, bir sózben aıtqanda, atom energetıkalyq baǵdarlamasyn iske asyrý úshin qajetti ınfraqurylymdy keshendi baǵalaý. Onyń negizi maqsaty AEHA-ǵa múshe memlekettiń atom energetıkasy salasynda ınfraqurylymyn damytýǵa jáne ony júzege asyrýǵa kómek kórsetý bolyp tabylady. Baǵalaý ulttyq ustanym, ıadrolyq qaýipsizdik, qarjylandyrý normatıvtik qujattardy sholý syndy on toǵyz ólshem boıynsha júrgiziledi. Biz óńirlerdegi nysandarǵa barmaımyz. Degenmen, Qazaqstannyń osynaý mıssııa qarsańynda ázirlegen ózin-ózi baǵalaý esebine nazar aýdaratyn bolamyz», dedi AEHA Atom energetıkasy departamenti Iаdrolyq energetıka bóliminiń dırektory, delegasııa basshysy, doktor Dohı Han. Al baspasóz máslıhatynda Energetıka vıse-mınıstri Baqytjan Jaqsalıev «Mıssııanyń paıdaly tustary kóp. Biz ózimizdiń ınfraqurylymymyzǵa shynaıy baǵa jasap, atom energetıkalyq damý jáne júzege asyrylyp jatqan ıadrolyq ınfraqurylym baǵdarlamalarymyzdy túsingimiz keledi», dedi. Al «Qazatomónerkásip» UAK» AQ ıadrolyq otyn sıkli jáne óndiris jónindegi bas dırektory Baýyrjan Ybyraevtyń aıtýynsha, Atom energııasy jónindegi halyqaralyq agenttik ókilderi búginge deıin 21 memlekette bolǵan. Endi, INIR mıssııasy bir apta ishinde atom energetıkasyn damytý bóligindegi Qazaqstan ınfraqurylymynyń jaı-kúıin zertteıdi. Onyń jumysyna mınıstrlikpen qosa, Ulttyq ıadrolyq ortalyǵy, Iаdrolyq fızıka ınstıtýty, «Samuryq-Qazyna» UÁQ», «Qazatomónerkásip» UAK», «Samuryq-Energo», «KEGOC» aksıonerlik qoǵamdary men «Qazaqstannyń ıadrolyq qoǵamy» ókilderi qatysady. Sondaı-aq osy kúnderi AES qaýipsizdik júıesi jáne qurylysyn qarjylandyrý, zańnamalyq-quqyqtyq qordy damytý, qorshaǵan ortany qorǵaý, elektr jelileriniń daıyndyǵy, bilikti kadrlardy daıyndaý jáne ózge de máseleler talqylanbaq. Mamandardyń málimetinshe, AEHA sarapshylarynyń oń sheshimi elimizdiń ıadrolyq-energetıkalyq ınfraqurylymyn damytý jáne kúsheıtý jónindegi ulttyq josparyn jańartýǵa múmkindik beredi.