2001
* 27 tamyzda Almatydan 35 shaqyrym jerde qazaq halqynyń jońǵar shapqynshylyǵyna qarsy kúrestegi eren erligine arnalǵan eskertkish ashyldy. Saltanatty rásimge qatysyp, sóz sóılegen Prezıdent Nursultan Nazarbaevtyń bas-aıaǵy 300 jyldaı merzimge sozylǵan qazaq-jońǵar soǵysyn qazaq halqynyń Uly Otan soǵysy dep ataýǵa bolatyndyǵyn aıtqany jınalǵan qaýymnyń aıryqsha ystyq yqylasyna bólendi. Bul týraly «Egemen Qazaqstan» gazetiniń 28 tamyz kúngi nómirinde «Uly Otan soǵysyndaǵy eren erliktiń eskertkishi» taqyrybymen maqala jaryq kórdi.
* 28 tamyzda Elbasy Nursultan Nazarbaevtyń «Beıbitshilik epısentri» kitabynyń tusaýkeseri ótti. Iаdrolyq qarýsyzdaný máselelerine arnalǵan bul kitapta Qazaqstandaǵy Semeı polıgonyn jabýdyń jaı-japsary da áserli áńgimelengen.
* 29-30 tamyz kúnderi Semeı ıadrolyq polıgonynyń jabylǵanyna 10 jyl tolýyna oraı Almatyda ıadrolyq qarýsyzdaný máselelerine arnalǵan «XXI ǵasyr ıadrolyq qarýdan tazarǵan dúnıeni qalaıdy» atty halyqaralyq konferensııa ótti. Konferensııada sóılegen sózinde Nursultan Nazarbaev: «Adamzat qashanda beıbit kúnge yntyq. Planetanyń tóbesinen Damokl selebesi tónip turǵan jarty ǵasyr ıadrolyq qarýdan ada álem úshin tolas tappaǵan kúrespen ótti. Eger adamzat ıadrolyq essizdiktiń qurdymyna qulap ketpeı, aman tursa, munyń ózi sol qarýdy taratpaýdy jaqtaýshylardyń qýatty úniniń, ǵalymdardyń ıadrolyq apattyń qateri jónindegi paıymdaýlarynyń, adamdardyń beıbitshilikke umtylýynyń arqasy. Bizdiń konferensııamyz izgilikti maqsatty – XXI ǵasyrdy adamzattyń ıadrolyq qaterden qutylatyn ǵasyryna aınaldyrý maqsatyn kózdeıdi. Bizdiń daýsymyz búkil álemge estilýge tıis, estiledi de!», dedi Elbasy.
* 3 qyrkúıekte Prezıdent Nursultan Nazarbaev Parlament palatalarynyń birlesken otyrysynda eldegi jaǵdaıdy jáne 2002 jylǵy ishki jáne syrtqy saıasattyń negizgi baǵyttaryn baıan etetin Qazaqstan halqyna Joldaýyn arnady. «Bizdi aldymyzda úlken mindetter kútedi. Tujyra aıtsaq, bul degenimiz – ne saıası, ne bolmasa dinı nemese ulttyq ekstremızm oryn ala almaıtyn memleket qurý», dedi Elbasy óz Joldaýynda.
*4 qyrkúıekte Prezıdent N.Á.Nazarbaev Qazaqstanǵa jeke saparmen kelgen Ispanııa Koroli Hýan Karlos I-di qabyldady. Kezdesý barysynda ekijaqty yntymaqtastyq, qarym-qatynas máseleleri sóz boldy.
* 5 qyrkúıekte Elbasy Nursultan Nazarbaev Qazaqstanǵa úsh kúndik saparmen kelgen Latvııa Premer-mınıstri A.Berzınshti qabyldady. Premer-Mınıstr A.Berzınshtiń Astanaǵa sapary ekijaqty qatynastarǵa sharttyq quqyqtyq negizin qalady. Premer-mınıstrmen birge latysh bıznesmenderiniń ókiletti toby keldi. Kelissózder nátıjesinde, saıası qatynastar jáne ekonomıkalyq yntymaqtastyqtyń keleshekti baǵyttary týraly birlesken málimdeme qabyldandy. Sapar sheńberinde Úkimetaralyq komıssııanyń tuńǵysh otyrysy ótti.
*6 qyrkúıekte Aqtaý qalasynda Qazaqstan jastarynyń kongresi ótti. Kongreske qatysýshylar aldynda Prezıdent Nursultan Nazarbaev sóz sóıledi. «Halqymyzda «Jas kelse – iske» degen qanatty sóz bar. Qazaq qashanda jasqa senim artyp, jas óskindi betinen qaqpaı ósirgen. Ata jolyn qýý, ákeniń isin jalǵastyrý dáıim perzent paryzy sanalǵan. Biz de sizderge senim artamyz», dedi Prezıdent.
* 11 qyrkúıekte AQSh-ta terrorıstik aktiler oryn aldy. Qazaqstan ǵalamdyq qaýipsizdikke at salysý úshin Iraktaǵy halyqaralyq koalısııa kúshterine qosyldy. AQSh tarapynyń suraýy boıynsha Irakqa ınjenerlik-saperlik otrıad jiberildi.
* 13 qyrkúıekte Qyzylorda oblysynda respýblıkada birinshi bolyp is júrgizý tolyqtaı memlekettik tilge kóshirildi. Táýelsizdik toıynyń aldyndaǵy bul qadam shyn máninde tarıhı oqıǵa boldy.
* 14 qyrkúıekte birqatar mańyzdy sharalar boldy. Osy kúni Almatyda Shanhaı yntymaqtastyq uıymyna qatysýshy memleketter úkimetteri basshylarynyń otyrysy ótti. Onda alty tarapty úlgide yntymaqtastyqtyń basymdyq beriletin salalary qaraldy, osy úderisti jandandyrý jáne tereńdetý jóninde naqty qadamdar belgilendi. Prezıdent N.Á.Nazarbaev atalǵan jıynǵa qatysýǵa kelgen ShYU-ǵa qatysýshy memleketter úkimetteri basshylaryn qabyldady. Máselen, Qazaqstan Prezıdenti men Reseıdiń úkimet basshysy M.M.Kasıanovtyń kezdesýinde Kaspıı munaı qubyry konsorsıýmy jobasy jáne Kaspıı teńiziniń shekarasyn delımıtasııalaý jónindegi kelissóz úderisi týraly sóz qozǵaldy. Sondaı-aq, QHR Memlekettik Keńesiniń premeri Chjý Jýnszımen kezdesýde ekijaqty qarym-qatynastardy damytý máseleleri talqylandy.
* 15 qyrkúıekte Prezıdent Nursultan Nazarbaev Almatydaǵy AQSh elshiliginde bolyp, sondaǵy Aza kitabyna Vashıngton men Nıý-Iorktegi qaıǵyly jaǵdaılarǵa baılanysty Amerıka halqyna kóńil bildirdi. Nursultan Nazarbaevtyń AQSh Prezıdenti Djordj Býshqa joldaǵan arnaıy hatynda qarsy qımyldar jasaý kezinde AQSh bıligi danalyq tanytatyndyǵyna senim bildirilgen. Bul jóninde «Egemen Qazaqstan» gazetiniń 18 qyrkúıek kúngi nómirinde «Qazaqstan AQSh-qa kez kelgen kómek kórsetýge daıar» taqyrybymen habarlama jaryq kórdi.
* 22 qyrkúıekte Rım Papasy Ioann Pavel II Qazaqstanǵa memlekettik sapary bastaldy. Bul Rım Epıskopy, Ǵaısanyń jerdegi izbasary, Apostoldar Knıaziniń murageri, Álem Shirkeýiniń Joǵarǵy Bas Piri, Batys Patrıarhy, Italııa Prımasy, Rım Provınsııasynyń Arhıepıskopy, Mıtropolıti, Vatıkan shahary – memleketiniń basshysy, Bir Táńirdiń úmbetteriniń úmbeti dep ardaqtala atalatyn Shapaǵatty Ákeıdiń Ortalyq Azııa jerine tuńǵysh taban tıgizýi bolatyn. Erteńinde Astanadaǵy «Otan qorǵaýshylar» monýmenti janyndaǵy alańda Ioann Pavel II Qazaqstan jáne Ortalyq Azııa katolıkterine arnap Qasıetti messa ótkizdi. Oǵan 35 myńdaı adam qatysty. Sapary barysynda Rım Papasy Ioann Pavel II qazaq tilinde: «Saǵan Qudaıdyń raqymy jaýsyn, Qazaqstan! Sen keleshekte qaryshtap damıtyn el bolasyń, Qazaqstan!» dedi.
