Ádil ótken saılaýdan saılaýshy utady

Túrli deńgeıdegi máslıhattardyń shyǵyp qalǵan depýtattarynyń ornyna depýtat saılaý Qostanaı oblysyndaǵy tórt aýdan men bir qalada ótti. Saılaý ótken toǵyz ýchaskeniń barlyǵy da bul saıası naýqanǵa tyńǵylyqty daıyndaldy. Muny osy saılaýǵa arnaıy kelgen Ortalyq saılaý komıssııasynyń múshesi Sabıla Mustafına da atap ótti. – Men saılaý bolardan bir kún buryn Qostanaı aýdanyndaǵy saılaý ýchaskelerinde bolyp, saılaýshylardyń daýys berýine daıyndyǵyn kórdim. Saı­laý ýchaskelerindegi uıymdastyrý ju­mystary qandaı dárejede, ýchaskelik saılaý komıssııalarynyń músheleri zań­namalardy qanshalyqty biledi, saılaý ýchaskeleri qalaı bezendirilgen degen kóptegen máselelerge jaýap izdedim. Ony uıymdastyrýshylardyń sonshalyqty yj­daǵattylyqpen, saýattylyqpen atqa­ra­tynyna rıza boldym, – dedi Sábıla Sa­parqyzy jýrnalıstermen kezdesýinde. Máslıhattardyń shyǵyp qalǵan depýtattar ornyna depýtattar saılaýy oblysta Qostanaı, Sarykól, Denı­sov, Taran aýdandary men Arqa­lyq qala­syn­daǵy saılaý ýchaskeler­inde ótti. Bar­lyq ýchaskelerde baqylaý­shylar qatys­ty.Ortalyq saılaý komıs­sııasynyń mú­shesi Sábıla Mustafına Denısov jáne Taran aýdandaryndaǵy saılaýdyń ótýin óz kózimen kórip qaıtty. Saıası naý­qannyń irili-ýaqtyǵyna qaramaı «Qa­zaqstan Respýblıkasynyń saılaý týraly» Zańynyń tolyq júzege asqanynyń kýási boldy. – Árıne, máslıhattardyń shyǵyp qalǵan depýtattary ornyna depýtattar saılaýyndaǵy saılaýshylardyń bel­sendiligin elimizde saıası naýqanǵa aınal­ǵan úlken saılaýlarmen salystyrýǵa bolmaıdy. Sondyqtan kúndiz turǵyndar shamalap keldi de, tústen keıin olardyń bel­sendiligi arta tústi. Biz bolǵan Denı­sov, Taran aýdandarynda keshke qaraı saılaýshylardyń 60 paıyzyna jýyǵy óz qalaýlaryn jasady, – deıdi Sábıla Saparqyzy. Syrtkóz baıqaǵandaı, máslıhattardyń shyǵyp qalǵan depýtattarynyń ornyna úmitkerlerin usynýda «Nur Otan» partııa­synan basqa partııalar asa belsendilik tanytqan joq. Degenmen, jergilikti tur­ǵyndar máslıhattarǵa kim kóringenniń barýyn qalamaıdy, halyqtyń qalaýlylary, belsendi, saýatty adamdardyń saılanǵanyn durys kóredi. Máslıhattarǵa belsendi, halqynyń, aýylynyń qamyn oılaıtyn depýtattar barsa, sol óńirde aýyz sý, kó­gildir otyn, jaıylym, taǵy basqa áleýmettik jáne ekonomıkalyq máseleler jóninde oń ózgeristerdiń bolatyny qazir kópshilikke málim. Sondyqtan saılaýdy uıymdastyrýshylar da, daýys beretin saılaýshylar da saılaýdyń ádil ótkenin maqsat etedi. О́ıtkeni, ádil saılaýdan tek saılaýshylar utady. Názıra JÁRIMBETOVA, «Egemen Qazaqstan» QOSTANAI