• 01 Qarasha, 2016

AI-92 markaly janarmaı nege qymbattady?

315 ret

kórsetildi

2 mın

oqý úshin

Egemen Qazaqstan

Energetıka mınıstri Qanat Bozymbaev Úkimet otyrysynyń qorytyndysyna arnalǵan baspasóz konferensııasynda AI-92 markaly janarmaıynyń qymbattaý sebepterin aıtty. «AI-92 markaly janarmaı baǵasy sál qymbattady. Buǵan qatysty úsh másele bar. Birinshisi – Shymkent munaı zaýyty qazir kúrdeli jóndeýden ótkizilýde. Ony 12-qarashada ske qosý josparlanǵan. Bul kúrdeli jóndeý qaıta jańǵyrtý aıasynda júrgizilýde, sebebi zaýytta qajetti jańa qurylǵylar iske qosylyp jatyr. Zaýyt iske qosylǵan soń AI-92 markaly janarmaı kóbirek shyǵarylatyn bolady. Bul onyń baǵasyna óz áserin tıgizedi degen oıdamyn», – dedi mınıstr. Sonymen qatar, ol 20 kún buryn janarmaı shyǵaratyn Pavlodardaǵy munaı hımııasy zaýytynda tehnologııalyq buzýshylyq oryn alǵany týraly da málimdedi. Tıisinshe, bul jerde de jóndeý jumystary júrgizilgen. «Zaýyt 2-3 kúnniń ishinde iske qosylsa, joǵary oktandy janarmaı qazirgiden tómen, óziniń baǵasymen kóbirek shyǵarylyp, esesine naryqqa da kóbirek keletin bolady. Sonda janarmaı naryǵyndaǵy baǵa retteledi», – dedi Q.Bozymbaev. Mınıstrdiń aqparatynsha, qazirgi kezde elimizge ımporttyq janarmaı kóptep kelip jatyr. Reseıde janarmaı baǵasy Qazaqstanǵa qaraǵanda qymbattaý bolǵandyqtan, eki eldiń janarmaı baǵasynyń naryqtaǵy úlesteri qubylmaly bolyp tur. Kóptep shyǵaryla bastaǵan jaǵdaıda janarmaı baǵasy on kún shamasynda qalpyna kelmek. «Al dızel otynyna qatysty aıtsaq, onyń baǵasynyń tómendeýi baıqalady. Atap aıtqanda, jazǵy dızel otynynyń baǵasy túsedi, óıtkeni qazir oǵan suranys azaıyp jatyr. Al qysqy dızel otyny elimizde óndirilmeıdi. Ol Reseıden keledi. Sondyqtan onyń baǵalaryna eshqandaı retteý joq», – dep naqtylady Q.Bozymbaev.