Júrekke ájim túspesin

Álemde adam balasyn ólimge ákeletin alǵashqy faktor – júrek-qan tamyrlary aýrýlary eken. Jambyl oblysynda bıylǵy jyly kardıoesepte turǵandar sany – 2101 adamdy qurap otyr. 2015 jyly bul kórsetkish 2150 bolǵan. Al bul aýrýdan bolatyn ólim-jitim kórsetkishi 2016 jyly 107,9 paıyzdy  kórsetse, 2015 jyly 142,1 paıyzǵa jetken edi. Osy tusta aıta ketý kerek, bul keseldiń aldyn alýǵa Jambyl oblysynda táýlik boıy joǵary mamandandyrylǵan kardıologııalyq qyzmet kórsetetin 3 ortalyqtyń qosqan úlesi zor. Mine, osy aptada Taraz qala­syn­daǵy ǵylymı-klınıkalyq kardıo­hırýrgııa jáne transplanto­logııa ortalyǵynda ótken Qa­zaqstan kardıologtary men kardıohırýrgteriniń «Sozyl­maly júrek jetispeýshiligi»  Halyqaralyq kongresiniń bas­ty taqyryby osy boldy. Oǵan Qazaqstan, Belarýs, Úndistan, Pákistan, Túrikmenstan, Qyr­ǵyzstan, Slovakııa, Túrkııa, Reseı jáne basqa da sheteldik mamandar qatysyp, júrek aýrýy jóninde pikirler almasyp, ózara tájirıbelerimen bólisti. Búgingideı zamanaýı tehnolo­gııanyń damyǵan zamanynda Jer shary dárigerleri birigip, aýrýǵa qarsy turyp, dúnıe júzinde júrek aýrýynyń aldyn-alý, emdeý, otalaý jóninde jańasha ádis-tásilder jetildirilip jatsa da, bul másele kókeıkesti kúıinde qalýda. Álem dárigerleri bas qosqan bul kongreste sozylmaly júrek jetkiliksizdigin erte dıagnostıkalaý jáne emdeý máseleleri, aldyn alý sharalary talqylandy. Sonymen qatar,  TMD elderi sarapshylarynyń qatysýymen júrek aqaýy alynyp, oǵan jasandy sol jaq qarynshany qoıý jáne ımplantasııalaý  jóninde sheberlik synyby ótkizildi. Ǵylymı-klınıkalyq kardıohırýrgııa jáne transplantologııa ortalyǵynyń dırektory, professor Seıithan Joshybaevtyń aıtýyna qaraǵanda, mundaı shara kardıologııa jáne kardıohırýrgııa salasynyń mamandary úshin óte mańyzdy. Medısınalyq qyzmetterdiń sapasyn jaqsartýǵa, kásibı deńgeıin arttyryp, ozyq tehnologııalar salasyndaǵy tájirıbe almasýǵa úlken múmkindik beredi. Qalaı aıtsa da, bul is-shara otandyq medısınanyń damýyna qosymsha serpin bereri sózsiz. Oralhan DÁÝIT, «Egemen Qazaqstan»   Jambyl oblysy