Oralda velosıped joly ashyldy

Oral qalasynda, Shaǵan ózeniniń oń jaǵalaýynda arnaýly joldyń ashylýy velo­sıpedshilerge úlken qýanysh syı­lady. Onyń uzyndyǵy – 3 shaqyrymǵa jýyq. Ári osy aradan búldirshinder men balalarǵa arnalǵan shaǵyn aınalym jol qosa turǵyzylǵan. Velosıpedshiler joly arnaıy syzyqtarmen belgi­lenip tańbalanǵan. Buǵan qosa, jazdy kúni velosıpedshilerge, qys kezinde shańǵyshylarǵa arnalǵan modýldi ǵımarat pen ot jaǵý qazan­dyǵy salynǵan. Shaǵan ózeniniń oń jaǵalaýyn velosıped jolyna aınaldyrý jónindegi jobany «KPO b.v» atty sheteldik kompanııasy qar­jylandyrǵan. Buǵan 214 mıllıon tenge qarajat jumsalǵan. Osy kezge deıin óńirdegi velosportpen aınalysýshylar óz jattyǵýlaryn Oral qalasynyń mańyndaǵy Bortaý dep atalatyn eldi mekendegi joldyń boıynda ótkizip kelipti. Bul, árıne, velosıpedke arnalmaǵan. Endi olar óz jattyǵýlaryn arnaıy turǵyzylǵan jolda ótkizýge múmkindik alypty. Bul jóninde gazet tilshisine 14 jasar jas óren Nıkıta Batıýkov aıtyp berdi. Sonymen birge, Aısultan Ashy­ǵalıev esimdi 12 jastaǵy bala da qýanyshtan júzi jaınap, er jetken soń Aleksandr Vınokýrovtaı Olımpıada «altynyn» ıelenip, óz eliniń kók týyn bıikke kótersem degen oıy bar ekenin jetkizdi. – Elbasymyz Nursultan Nazarbaev 2020 jylǵa deıin bu­qaralyq sportpen shuǵyldaný­shylardyń sanyn 30 paıyzǵa deıin jetkizý jóninde tapsyrma bergeni belgili. Elimizdiń ba­tys qaqpasynda velosıped jolynyń paıdalanýǵa berilýi ony oıdaǵydaı oryndaýǵa oń serpin beredi. Ári osy bitken is jas­óspirimderdiń qaýipsizdigin saqtaýdyń da basty joly, – deıdi Batys Qazaqstan oblystyq velosport federasııasynyń prezıdenti Asqar Shoraev. Temir QUSAIYN, «Egemen Qazaqstan» ORAL