Jańa emhana boı kóterdi

Merki aýylynyń turǵyndary jańa emhana salý máselesin kópten beri kóterip júrgen-di. Tipti «Ortalyq aýrýhanamyz aýdan ortalyǵynyń bir jaǵynda, emhanamyz ekinshi basynda. Arasy alys. Onyń ústine emhanamyz eski, ábden tozǵan. Emdelýshilerge qolaısyz. Aýdanymyzda jańa emhana salý­ǵa kómektesseńiz» dep, Merki aýdanyna is­saparmen kelgen Jambyl oblysynyń ákimi Kárim Kókirekbaevqa da aıtqan bolatyn. «Birinshi baılyq – densaýlyq» degen, bul másele shynynda óte ózekti ekenin oblys ákimi de ańǵarsa kerek. Kóp uzamaı Merki aýda­nynyń ortalyǵynda jańa ǵımarattyń qurylysy bastalyp ta ketti. Mine, ótken aptada Táýelsizdiktiń 25 jyl­dyǵyna oraı osynaý 250 oryndyq jańa emhana paıdalanýǵa berildi. – Elimiz táýelsizdik alǵan 25 jyl ishinde densaýlyq salasyna úlken kóńil bólindi, – deıdi Jambyl oblysynyń ákimi Kárim Kókirekbaev. –  Densaýlyq saqtaý salasyn qarjylandyrý kólemi ósip, 2005 jyly – 9,2 mlrd. teńge bólinse, 2016 jyly 40 mlrd. teńge bólindi, ıaǵnı 4,4 esege ósti. Jambyl oblysy boıynsha «100 mektep, 100 aýrýhana salý» jobasy sheńberinde quny 18,8 mlrd. teńgege 6 densaýlyq saqtaý nysandarynyń qurylysy aıaqtalyp, paıdalanýǵa berildi. Odan bólek 25 jańa ambýlatorııa, feldsherlik pýnkt halyq ıgiligine tapsyryldy.  Munyń bári oblys turǵyndarynyń densaýlyǵyn jaqsartý men ómirsheńdik deńgeıin arttyrýǵa baǵyttalyp otyr. Jańa emhana barlyq talaptarǵa saı keledi. Bir mezgilde 250 adamnyń em qabyldaýyna múmkindik beretin jańa ǵımaratqa 579 478 myń teńgege qajetti medısınalyq qural-jabdyqtar satyp alyndy. – Jasym 70-ten asty, eńbek ardagerimin, – deıdi Merki aýylynyń turǵyny Dáýit Qa­dyrhanov. – Aýdanymyzda dál osyndaı sán-saltanaty jarasqan jańa emhananyń ashylǵanyna óte qýanyshtymyn. Bul biz sııaqty qarttarǵa da jasalǵan qamqorlyq dep oılaımyn. Bizdiń jas kezimizde mundaı ásem ǵımarattar, ozyq úlgili qurylǵylar joqtyń qasy edi. Endi mine, bári qoljetimdi. Árıne, osynyń bári elimizdiń damyp, órkendep kele jatqandyǵynyń, Táýelsizdigimizdiń arqasy. Bar múmkindikti jasap jatqan Elbasymyzǵa alǵysym sheksiz. Jobalyq-smetalyq quny 1 mıllıard 750 mıllıon teńgeni quraǵan ortalyq emhana eldiń suranysy boıynsha aýdandyq aýrý­hananyń janynan, «Merki» shıpajaıyna barar joldyń boıynan boı kóterdi. Oralhan DÁÝIT, «Egemen Qazaqstan» Jambyl oblysy Sýretti túsirgen Altynbek QARTABAI