"Kongress-holl" ataýy "Astana" konsert zaly dep ózgeredi

Astanadaǵy Kongress-holl ataýy «Astana» konsert zaly» bolyp ózgermek. Osyǵan baılanysty nysannyń qasbetine qaıta jańǵyrtý jumystary júrgizilip jatyr.  Bul týraly «Astana aqshamy» basylymy habarlady. Kongress-holl buryn Tyń ıgerýshiler saraıy bolǵanyn baıyrǵy turǵyndar jaqsy biledi. Keıin jańa shahardyń bitim-bolmysyna baılanysty 1998 jyly qaıta túrlenip, Astananyń aıshyqty nysandarynyń birine aınaldy. Tipti «Kongress-holl» ataýymen memlekettik mekeme de quryldy. Alaıda 2010 jyly osynda Astana Memlekettik akademııalyq fılarmonııasy kóship kelýine oraı eki mekeme birigip, sońynda «Kongress-holl» jeke mekeme retindegi qyzmetin múlde toqtatty. Bir sózben aıtqanda, búginde bul ǵımarat túgel - fılarmonııanyń enshisinde. «Kongress-holl» degen májilister, resmı jıyndar ótetin oryn degen maǵynany bildiredi. Al munda kóbine ánshilerdiń, óner ujymdarynyń konserttik baǵdarlamalary uıymdastyrylyp júr. Fılarmonııanyń konserti de osynda ótedi. Biraq jurtshylyq keıde fılarmonııanyń qaıda ekenin bilmeı, shatastyryp alatyny bar. Sondyqtan ǵımarattyń mańdaıshasyndaǵy jazýdy ózgertpekshimiz. Bul týraly qala ákiminiń qaýlysy shyqty. Al nysannyń qasbetindegi úlken ekranǵa «Fılarmonııa» degen jazý turady, aınalasy qazaqtyń oıý-órnegimen kórkemdeletin bolady» , - deıdi Astana Memlekettik akademııalyq fılarmonııasynyń bas dırektory ári kórkemdik jetekshisi Sáken Abdrahmanov. Iá, ǵımarattyń ataýy ózgergenimen, Astana Kongress-hollsyz qalmaıdy. «EKSPO-2017» halyqaralyq kórme aýmaǵynda jańa Kongress-holl ǵımaratynyń qurylysy júrgizilip jatyr. Bul týraly jaqynda jahandyq kórmeniń damýyna oraı ótken jıynda aıtyldy.