Elimizde 2 mln adam tegin dári-dármek alady

Astanada 13-shi «AstanaZdorovie-2016» halyqaralyq kórmesi ótip jatyr. Kórmege álemniń 11 memleketiniń iri kompanııalary shyǵarǵan medısınalyq jabdyqtar koıyldy, dep habarlaıdy Baq.kz. Qarashanyń 3-5 aralyǵynda ótetin kórmege Germanııa, Iran, Qazaqstan, Qytaı, Koreıa, Reseı, Tájikstan, О́zbekstan, Ýkraına, Chehııa jáne Shveısarııa sııaqty elderdiń 80-nen astam kompanııasy medısınalyq jabdyqtaryn qoıdy. Jyl saıyn ótetin dástúrli kórmeniń shymyldyǵyn QR Densaýlyq saqtaý jáne áleýmettik damý mınıstri Tamara Dúısenova ashyp berdi. «Astanada kezekti 13-shi halyqaralyq dári-dármekter jáne medısınalyq buıymdar kórmesin ótkizip jatyrmyz. Bul kórme el Táýelsizdiginiń 25 jyldyǵyna arnalǵan. Sondyqtan, kórmede tek medısınalyq jańa tehnıkalar men dárilerdi ǵana emes, Qazaqstannyń 25 jyl ishinde densaýlyq saqtaý salasynda jetken jetistikterin de pash ettik. Biz búginde memleket tarapynan 49 aýrý túrinen 400 túrli dári-dármekti 2 mln adamǵa tegin berip jatyrmyz. Al stasıonarǵa kelip túsetin adamdar tolyq memlekettiń esebinen emdelýde. Bul úshin jylda 200 mlrd teńgeden astam qarjy jumsaımyz», - dep málimdedi mınıstr. Shet elderde shyǵarylyp, óz elimizde qurastyrylatyn medısınalyq qural-jabdyqtar da az emes. «Kazmedpribor hoiding» otandyq fırmasy 10 jyldan astam ózge eldermen tyǵyz jumys istep keledi. «Bizdiń fırmamyzdyń bas shtaby Shymkent qalasynda ornalasqan. 2005 jyly ashyldyq. Biz medısınalyq emdeý monıtorlaryn, laboratorııa quraldaryn, rentgen jabdyǵyn, ÝZI-ge túsiretin qural jabdyqtardy qurastyramyz. Qazaqstannyń ár túkpirinen túsken tapsyrystardyń barlyǵyn oryndaımyz. Biz jasaıtyn tehnologııalardyń basty bólikteri Germanııa men Koreıada shyǵarylady», - deıdi «Kazmedpribor hoiding» fırmasynyń bas dırektory Qanybek Qanatbekuly. Atalmysh kórmeni QR Densaýlyq saqtaý jáne áleýmettik damý mınıstrligimen birigip «QazMedTeh» AQ jáne «SK-Farmasııa» JShS birigip uıymdastyryp otyr.