Petropavl qalasynda Birinshi lıga komandalary arasyndaǵy QR birinshiliginde 3-orynǵa ıe bolǵan «Qyzyljar SQ» fýtbol komandasy oıynshylaryn marapattaý rásimi ótti.
Kún qaharmandaryn qyzyl kilemde qarsy alǵan Soltústik Qazaqstan oblysynyń ákimi Erik Sultanov sportshylarǵa qola medal tabystady.
«Búgin soltústikqazaqstandyq fýtbol tarıhyndaǵy aıtýly kún. Birinshi lıga komandalary arasyndaǵy QR birinshiligindegi qola medal – óńir ımıdjin qalyptastyrýǵa úlken úles qosady. Sizderdiń jetistikterińiz óskeleń urpaqqa úlgi. Bolashaqta sizder úzdik sporttyq nátıjeler men iri jeńisterge jetetinderińizge zor senim bildiremin!», - dedi Erik Hamzauly.
О́ńir basshysy sportshylardyń bapkerlerine joǵary nátıje kórsetip, úzdik sportshylar tárbıelegeni úshin alǵysyn bildirdi.
Sonymen qatar, oblys basshysy SQO-da fýtboldy damytý úshin materıaldyq-tehnıkalyq bazanyń nyǵaıtylyp, ınfraqurylymdy damytý jumystary qarqyndy júrgizilip jatqanyn atap ótti. Sońǵy eki jylda 263 fýtbol jáne shaǵyn fýtbol alańdary salynsa, onyń 46-y zamanaýı jasandy jabynmen qaptalǵan. Búginde «Qarasaı» stadıonynda kúrdeli jóndeý jumystary júrgizilýde. Al, sportshylarymyz jyl boıy jattyǵa alýy úshin «Jastar» stadıonynda jabyq fýtbol manejiniń qurylysy bastaldy.
Saltanatty shara barysynda óńir basshysy fýtbolshylarǵa túrli atalym boıynsha marapattar tabystady. «Úzdik qaqpashy» ataǵyna Tımýrbek Zakırov ıe bolsa, «Úzdik qorǵaýshy» bolyp Nemanıa Vıdıch tanyldy. Sonymen qatar, Aslan Januzaqov «Úzdik jartylaı qorǵaýshy», Boshko Stýpıch «Úzdik shabýylshy», al Álı Álıev «Maýsymnyń eń úzdik oıynshysy» atandy.
«Qyzyljar SQ» fýtbol klýbynyń kapıtany Evgenıı Averchenko oblys basshylyǵyna, bapkerler shtabyna, jankúıerlerge qurama atynan alǵysyn bildirdi.
