Bas prokýror: Ultaraqtaı jerge ıe bolý - ár qazaqtyń armany

Qazaqstannyń Bas prokýrory Jaqyp Asanov barsha qazaqstandyqtardy jermen qamtý týraly zań jobasyn jasaýdy usyndy. Memlekettik organdardyń deregi boıynsha, 2016 jyly jer kezeginde turǵan 1,4 mıllıon adam bar. «Elbasynyń barlyq xalyqqa jer berińder degen tapsyrmasy bar. Biraq, árıne, xalyqqa jerdi aıdaladan bermeımiz ǵoı. Oǵan ınfraqurylym júrgizý kerek, balabaqsha men mektep kerek, aýrýxana qajet, munyń barlyǵy - aýqymdy sharýa. Biraq degenmen Ulttyq ekonomıka mınıstrligi, Aýyl sharýashylyǵy mınıstrligi, oblystyq ákimder, prokýratýra - barlyǵymyz otyryp oılassaq. Biz myna nárseni uǵýymyz kerek, aqshadan basqa bir úlken másele bar. Árbir qazaqtyń armany - ultaraqtaı jer alyp, mal asyrap, baqsha egý. Onyń armany sol. Keń úı salyp, kelin túsirip, qolynan sháı iship, solaı emes pe!? Bizdiń qanymyzǵa sińgen qasıet, mentalıtetimiz. Adamǵa qansha páter bersek te, onyń báribir armany - jer úı» dedi Bas prokýror. Onyń aıtýynsha, osy kezde jerdi zańsyz basyp alý faktileri de tyıylar edi. «Elbasy tapsyrma berdi. Biz endi osyny otyryp, tez arada, qandaı joly bar, anyqtap, oılasyp, úkimetke naqty usynys berýimiz kerek. Sonda xalyqtyń da qajettiligin óteımiz, Elbasynyń da tapsyrmasyn oryndaımyz», - dep túıdi oıyn J. Asanov. Esterińizge salsaq, búgin Bas prokýratýrada óz betimen jerlerdi basyp alýǵa qarsy jańa joba qabyldanyp, osy máselelerdi sheshýge baǵyttalǵan keshendi jospar bekitildi.