Vahıd jáne onyń komandasy

О́tken maýsymda ǵana birinshi lıgada oınap, bıyl premer-lıgada óner kórsetken Oraldyń «Aqjaıyq» fýtbol klýby chempıonatty birshama sátti bastaǵanymen, ony qorytyndylaıtyn tusta biraz tuıyqqa tireldi. Buǵan komanda tizginin sol kezge deıin ustap kelgen Talǵat Baısýfınovtiń Qazaqstan ulttyq quramasyn basqarýǵa ketip qalǵany tikeleı áser etti. Sóıtip, dop dodasynyń birinshi bóligi márege jetip, komandalar alty klýbtan eki topqa bólingen kezde sońǵy oryndaǵy «Aqjaıyq» óziniń aldyndaǵy «Tarazdan» týra toǵyz upaıǵa qalyp turdy. Bul kezde aıaqdoptan habary barlardyń kópshiligi oral­dyqtardan úmit úzdi dese de bolady. Klýbty osyndaı qıyn sátte qolǵa alǵan taǵy bir qazaq­standyq maman Vahıd Masý­dovqa «Aqjaıyqty» alǵa shyǵarý ońaıǵa túsken joq. Degen­men, onymen birge jańa fýtbol­shylardyń kelýi oıyndy qaıta qurýǵa múmkindik berdi. Sonyń arqasynda komanda kapıtany Meıram Sapanov bastaǵan jigitter birinshiliktiń ekinshi bó­li­gin keremet órleý ústinde ótki­zip, 10 oıynnyń 8-inde qarsy­lastarynan basym tústi. Mine, osy kózsiz erlikke para-par oıyndardyń nátıjesinde oraldyqtar alǵa uzap ketip qalǵan komandalardyń sońynan «qos atpen qýyp» shyǵyp, olardyń ekeýinen kómbege jete bergende basyp ozdy. Sóıtip, óziniń premer-lıgada qalý jónindegi maqsatyna jetti. Muny bas jat­tyqtyrýshy Vahıd Masýdov Tal­­dyqorǵanda ótken sońǵy oıyn­­nan keıin: «Bizdiń osylaı ja­saıtynymyzǵa eshkim senbep edi, al biz mejemizden óttik», dep bir aýyz sózben túıindep berdi. Osy rette komandanyń bul tabysqa seleksııalyq jumystardy durys júrgizýi arqyly jetkenin de aıta keteıik. Bul jóninde sóz etkende, Paragvaıdan Qazaqstanǵa aıaq basqan birinshi oıynshy, jartylaı qorǵaýshy Freddı Koronel Ortız aldymen aýyz­ǵa iligedi. Maýsym basynda kelgen legıoner uzamaı beldi oı­yn­­shylardyń birine aınaldy. Sha­býyldy uıymdastyrýmen birge stan­dartty jaǵdaıdy jaqsy oryn­daıtyn Freddı birinshilik qorytyndysynda 8 golmen «Aqjaıyqtyń» bas mergeni atandy. Komandany órge súıregender qatarynda tájirıbeli Edýard Sergıenko men serbııalyq qorǵaý­shy Predrag Govedarısany da atap ótýge bolady. Chempıonattyń orta tu­synda kelgen qaqpashy Denıs Tólebaev artynsha áriptesteri Nurbolat Qalmenov pen Roman Bagaýtdınovtyń «ornyn tartyp alsa», nıgerııalyq Maıkl Odıbe ortalyq qorǵaýshy Da­nılo Nıkolıchti yǵystyryp shyǵardy. Sol sekildi tyńnan qosylǵan Rahymjan Rozybakıev, shabýyl­shylar, serb Mıroslav Lechıch pen ýkraın Konstantın Dýdchenko biraz serpin qosty. Chempıonat sońyna taman Chılı eliniń ókili Matıas Rýbıo da negizgi quramnan óz ornyn tapty. Fýtboldan 2018 jylǵy álem chempıonatynyń irikteý týrnırinde Qazaqstannyń Danııa­men 11 qarasha kúni ótetin kezdesý qarsańynda tańdaýly 35 aıaqdop sheberiniń qatarynda «Aqjaıyqtan» úsh birdeı oıynshy, atap aıtqanda, oń qaptaldaǵy qorǵaýshy Eldar Abdrahmanov, jartylaı qorǵaýshylar Rýslan Valıýllın men Rahymjan Ro­zybakıev ulttyq quramanyń oqý-jattyǵý jıynyna shaqyrtý aldy. Árıne, 23 oıynshydan tu­ratyn túpkilikti tizimge enbese de, ulttyq qurama bapker­leriniń kózine iligýiniń ózi – úlken jetistik. Taǵy bir jaıt, «Aq­jaıyq» fýtbol klýby ózge árip­testerine qaraǵanda, negizinen óz tárbıelenýshilerine súıenetin klýb retinde erekshelene alady. Endeshe, ol osy baǵyttan tanbaı, kelesi maýsymǵa tas-túıin daıyndalý kerektigi aıtpasa da túsinikti bolsa kerek. Ǵaısaǵalı SEITAQ, jýrnalıst Temir QUSAIYN, «Egemen Qazaqstan» ORAL