Aldymen balalarynyń jaǵdaıyn qamdasyn

A.ShARHANOVA. «Egemen Qazaqstan» gazetiniń 2011 jyldyń 26 aqpany kúngi nómirindegi «Parlament» arnaýly betinde Jarasbaı Súleımenovtiń «Be­sikten beli shyqpaı jatyp, ómirden nege túńiledi» degen maqa­la­sy jarııalandy. Sol jarııalanym boıynsha meniń depýtatqa naqty óz mysalym negizinde saýalym bar. Men 10 jyl nekede turdym. Bu­rynǵy jubaıymmen aramyzda 3 jas balamyz bar, biz ajyrasqan soń olar meniń asyraýymda qaldy. Men memlekettik qyzmette jumys isteımin. Qazirgi tańda jubaıym 3 perzentine 10 myń teńge alımentti áreń tóleıdi, ortaq salynǵan úıdi alaıaqtyqpen qaıyn atama aýystyryp jibergen. 3 perzentimniń týǵan ájesi Ásemkúl Ernısheva nemerelerin májbúrlep úıden shyǵarýǵa sotqa aryz­danǵan. Ajyrasqanyna 6 aı ótpeı 2-shi ret úılengen arsyz, ımansyz ákeleriniń saldarynan 2 ulym da ómirden túńilgendeı, qyzym neǵyp meniń ákem osyndaı boldy dep suraq qoıady. Birinshi otbasyn qamtamasyz etip, balala­ryna jaǵdaı jasap berip, úlkender ári qaraı ózderiniń arasyndaǵy kıkiljińdi sheshse, ekinshi qurǵan otbasy da berekeli bolar edi ǵoı. Qazir ımansyz eneler, olardyń arsyz balalary qanshama kelinderdiń ómirin qıyndatyp júr deseńizshi. Isherge tamaǵy, kıerge kıimi jetpeı, sharshap-shaldyǵyp, ómirden baz keship ketkisi kelip júrgen, odan qalsa baspanasy joq, kóńilderi jarym tiri jetimder qanshama. Sondyqtan, eń aldymen jalǵyzilikti áıelderdiń jaǵdaıyn oılasty­rý kerek. Erkekterge ajyrasasyń ba, eń aldymen balalaryńdy baspanamen qamtamasyz et dep zańmen belgilep, qazyqtaı qaǵý qajet. Balalaryna pana bola almaıtyn erkekterge jaýapkershilik sezimi darıtyn shyǵar sonda. Máseleniń túbi osy. Ajyrasyp, yrdý-dyrdý bolyp júrgen ata-ana balalaryna qandaı jaǵdaı jasamaq?! Mine, balalar sýısıdiniń bir parasy osy máselede jatyr ma deımin. Basqa jaǵdaılardyń bar ekenin de joqqa shyǵarmaımyn. Túrkistan qalasy.