Atap aıtqanda, úmitker Qazaqstanda atom elektr stansasyn salý máselesi BAQ-tarda tıisti deńgeıde kórsetilmeı otyrǵandyǵyna, ǵylymı ortada pikirtalasqa salynbaıtynyna alańdaýshylyq bildirdi. Sonymen birge, AES salý jáne ony tehnologııalyq jaǵynan qamtamasyz etý jaıly tek bir tarappen – reseıliktermen ǵana kelissóz júrgizilýi de oılandyrmaı qoımaıdy. Aıtalyq, beıbit atomdy paıdalaný, onyń sabaqtas ınfraqurylymdaryn jasaý tájirıbesi fransýzdyń «Fromatom» kompanııasynda da bar. Onyń ónimderin Germanııa, AQSh, Skandınavııa elderi, Qytaı satyp alatyn kórinedi. Ǵ.Qasymov osy máseleler boıynsha úkimet túsiniktemesin kútetinin atap kórsetti.
Osy problemalar aıasynda kezdesýge qatysýshylar aldynda «Nevada-Semeı» qozǵalysynyń prezıdenti Oljas Súleımenovtiń qoly qoıylǵan Japonııa halqyna kóńil aıtqan mátin oqyldy. Qazaqstanda 80-shi jyldardyń aıaǵynda qurylǵan halyqtyq qozǵalys Semeı ıadrolyq polıgonyn jabý jóninde ulan-ǵaıyr jumystar tyndyrdy, ol óz qataryna mıllıonnan astam qazaqstandyq azamattardy biriktirip, álemdik bedelge ıe bolǵan edi. Qazirde aqıyq aqyn Oljekeń men qozǵalys belsendileri beıbitshilik estafetasyn jastarǵa amanattap júktep berý jóninde bastama kóterdi. «Qazaqstan jastary ıadrolyq qarýǵa qarsy!» úndeýiniń sońyna mıllıonnan astam qol jınaldy. Yntaly top bul bastama álemniń kóp elderinde qoldaý tabatynyna senimdi. Patrıottar partııasy atynan sóz alǵan Ǵanı Qasymov ta naq osy aksııaǵa qosyldy. Prezıdenttikten úmitker azamattardyń qaýipsizdigi óziniń saıası qyzmetiniń basty baǵyty ekendigin qadap aıtty. Biz osy máselege kóbirek kóńil bólýge, qaýipsizdik júıesine memleket qarjysyn kóptep salýǵa tıispiz, dep qorytty ol oıyn.
Qorǵanbek AMANJOL.
Almaty.
