«Halyq Arena»

Almatyda 3 myń kórermenge arnalyp salynǵan «Halyq Arena» muz arenasy Dúnıejúzilik qysqy Ýnıversıadanyń basty nysandarynyń birinen sanalady. Munda Stýdenttik oıyn kúnderi hokkeı saıystary ótetin bolady. Bul úlken sport keshenin salý 2014 jylǵy shildede bastalǵan. Nysan qurylysyn júrgizgenderdiń 60 paıyzyn qazaqstandyqtar qurady. Ǵımarat qurylysy mejege saı tamyz aıynyń sońynda aıaqtalýǵa tıis edi. Alaıda, onyń merdigeri bolǵan «Arııa Jańa Astana» JShS jumysty merzimnen 2 aı buryn bitirdi. «Halyq Arena» Almaty qalasynyń Medeý aýdanyndaǵy Kúljin jáne Talǵar joldarynyń qıylysynda 11 gektar aýmaqty alyp jatyr. Ǵımarattyń jobasyn «Arh-Sıntezproekt» JShS jasady. Jobalaýshylardyń aıtýynsha, qalanyń osy jeri álsiz shókpeli topyraqtan turady. Sondyqtan turaqtylyq úshin qurylys­shylar 15 metr joǵarǵy qabatty kóterip, arnaıy ballastpen kómgen. Nysannyń irgetasy monolıt temir­betonnan, joǵarǵy bóligi metall konstrýk­sııadan soǵylǵan. Qurylys barysynda kóbi­ne qazaqstandyq qurylys materıaldary, onyń ishinde energııany únemdeıtin áınekter paı­da­lanylǵan, tek shatyr ǵana Germanııada óndiril­gen arnaıy bolat kásibı jabynmen jabylǵan. Ǵımarat seısmıkalyq jaǵynan turaq­ty, ol 9-10 ballǵa eseptelgen jáne baryn­sha derbes jumys jasaıdy. Onyń jeke jylytý jaıy, birinshi sanattyq trans­for­matorlyq shaǵyn stansasy, sý qoı­ma­lary bar. Aımaqtaǵy jas kóshet­ter ózindik jer asty uńǵymadan avtomatty túrdegi sýǵarǵyshpen sýarylady. «Halyq Arena» bas, qosalqy jáne ákimshilik sııaqty úsh bloktan turady. Ǵımarattyń negizgi oshaǵy bolyp shaıbaly hokkeıge arnalǵan 61h30 metr kólemindegi basty arena tabylady. Qasynda úlken halyqaralyq jarystardy ótkizý úshin mindetti shart bolyp tabylatyn, ólshemi de sondaı qosalqy jattyǵý arenasy ornalasqan. Keshende sportshylardyń jarysty tabys­ty ótkizýlerine barlyq jaǵdaı jasalǵan. Jalpy alǵanda, hokkeı komandalaryna arnal­ǵan 12 kıim aýystyrý bólmesi bar, árbir kıim aýystyrý bólmesinde medısınalyq massaj orny qarastyrylǵan. Kıim aýystyrý bólmeleri janynda Dúnıe­júzilik dopıngke qarsy agenttik (WADA) talap­taryna sáıkes dopıng-baqylaý synamalaryn alatyn bólmeler blogy ornalasqan. Blok kútý bólmesinen, analızderdi qabyldaý ból­mesi jáne zerthanadan turady. Jeke tóre­shi­lik aımaq, konkılerdi ushtaýǵa arnalǵan ar­naıy oryn, jarysqa qatysýshylardyń sport­tyq formalaryn keptirýge arnalǵan oryn­dar bar. Sonymen qatar, sportshylarǵa ar­nal­ǵan qosal­qy úı-jaılar kardıojattyǵý qurylǵy­lary, kúsh jattyǵý qurylǵylary jáne deneni kerýge arnalǵan bos aımaǵy bar jattyǵý zaly qyz­­met kórsetedi. Sondaı-aq, eki qabatta ar­naıy me­dı­sına-qalypqa kelý ortalyǵy jab­dyq­tal­ǵan. Klımat-baqy­laý­dyń zamanaýı júıesi jaıly 20-22˚S temperatýrany tolyq qamta­masyz etedi. Buqaralyq aqparat quraldary úshin bar­lyq qajetti jaǵdaılar jasal­ǵan. Baspasóz ortalyǵy, baspa­sóz-konfe­ren­sııalarǵa ar­nal­ǵan zal, baspasóz-bar, baspasózge jáne foto­­graftarǵa arnalǵan jumys bólmeleri bar. BAQ-qa arnalǵan aralas mıks-aımaq ta qarastyrylǵan. Onda jýrnalıster jarystarǵa qatysýshy-komandalar ókilderimen suhbattasa alady. «Halyq Arenada» 4 kommentator kabınasy jabdyqtalǵan jáne halyqaralyq standarttarǵa sáıkes telekórsetilimder úshin jaǵdaılar jasalǵan. Symdyq jáne symsyz ǵalamtor, bólingen baılanys arnalary bar. Jobalaýshylar arenanyń kórer­mender úshin barynsha jaıly bolýy jaǵyn da kózdedi. Keshen aýmaǵynda yńǵaıly 4 kireberis tur. Jeke avtokólikter úshin 250 oryndyq (onyń ishinde 40 oryn – halyqtyń qımyly shek­teýli tobyna arnalǵan) jerústilik turaq bólin­gen. Jer astyly turaq odan da kóp kólik sanyn qamtı alady, onda 330 kólik orny qaras­tyryl­ǵan, 20 avtobýsqa arnalǵan jeke turaq iske qosylǵan. Ǵımaratta 160 otyrǵyzý oryndary bar, sondaı-aq, kafe jáne 150 adamdy syıdyratyn eki kafe-býfet jumys isteıdi. Múmkindigi shekteýli jandar úshin erekshe jaǵdaılar jasalǵan. Olarǵa aımaqtaǵy kreslo-arbalarǵa bólingen syzyqtar, pandýstar, arnaıy lıftter men bas hokkeı zalyndaǵy jeke oryndar jáne taǵy basqalar jatady. Kórermender sport jarystarynyń barlyq qyzyqtaryn, beıne qaıtalaýlardy, mátindik aqparatty muz aıdyny­nyń ústinde ornalasqan alyp jaryq-dıodtyq beınelik tekshe ekranynan kóre alady. «Halyq Arenanyń» zaly eń zamanaýı jaryqtyq-tehnıkalyq jáne dybys jabdyqtarymen qamtamasyz etilgen. Jobalaý satysynyń ózinde osy zaman­aýı sport qurylymyn Ýnıversıadadan keıin de paıdalaný ıdeıasy qoıylǵan. Keshen óziniń belgilegen maqsaty boıynsha kópfýnksıonaldy bolyp tabylady. Birinshiden, munda hokkeıden basqa aýqymdy jarystardy ótkizý múmkindigi bar. Arena basqa da oıyn jáne jeke sport túrlerine qaraı ózgertiledi. Ekinshiden, eń bas­tysy sporttyq keshen balalyq-jasóspirimdik sportty damytýǵa, barlyq qala turǵyndaryn dene shynyqtyrýǵa tartýǵa eseptelgen (mysaly, qosalqy syrǵanaq aıdynda barsha nıet bildirgen adamdar úshin kópshilik syrǵanaýdy uıymdastyrý). Sondaı-aq, muz arenasynyń kóptegen sporttyq-jattyǵý zaldary da óz kelýshilerin kútedi. «Halyq Arenada» mádenı-kórinis­tik is-sharalardy ótkizýge qaraı ózgerý qubylysy qarastyrylǵan. Jalpy, «Halyq Arena» sáýlet kesheni retinde jergilikti tabıǵat kórinisine sátti úılesedi, ol qalany bolashaqta damytýdyń mańyzdy oshaǵy jáne barlyq qalaýshylar úshin sportpen aınalysý jáne demalys ornyna aınalýy tıis. Boljamdar boıynsha, arena óz aýmaǵyna jyl saıyn shamamen 150 000 kelýshini tarta alady. Talǵat RAIYMBEK, «Egemen Qazaqstan»