Túrkııalyq kompanııa OQO demalys keshenderine qarjy salady

Ońtústik Qazaqstan oblysynyń ákimi Janseıit Túımebaev jergilikti jáne Túrkııa Respýblıkasynyń bir top kásipkerlerimen kezdesý ótkizdi, dep habarlady oblys ákimdiginiń baspasóz qyzmeti. Atap aıtqanda, «Kassanov» kompanııalar tobynyń qazaqstandyq enshiles kásiporyndary «KA Global Construction» JShS, «Týr-Han» JShS jáne «Kazsısoft» JShS-niń jetekshilik quramymen kezdesken óńir basshysy aımaqty damytýdyń túrli jobalary men josparlaryn talqylady. Investorlardy «Kassanov» kompanııasynyń quryltaıshysy Zııatdın Kasanov bastap keldi. Qos tarapty kezdesý barysynda, óńirdiń ınvestısııalyq múmkindikteri týraly sóz qozǵalyp, Janseıit Qanseıituly aımaqtyń jetistikterimen qatar, múmkindikterin de tizbektep ótti. «Ońtústikte aýyl sharýashylyǵy, týrızm, kommýnaldy sharýashylyq, kásipkerlik, densaýlyq saqtaý, avtomobıl joldarynyń qurylysy syndy salalarda birlesken jumys istep, qarjy salýǵa nıettimiz. Enshiles kompanııalarymyz kúngeıde birneshe baǵytta jumys istep, óńirdiń órkendeýine atsalysqysy keledi», - dedi Z.Kasanov. Máselen, jıynda «Týr-Han» jáne «KA Global Construction» JShS-larynyń jetekshisi Okan Eshılgez Saryaǵash, Shardara aýdandary men Túrkistan qalasynda qonaq úı qurylysyn júrgizýge qulyqty ekenin aıtyp, Saryaǵashta emdik-saýyqtyrý keshenin salýdy kózdep otyrǵanyn jetkizdi. Sonymen qatar, ol «Batys Eýropa-Batys Qytaı» avtodáliziniń boıynan servıstik qyzmet kórsetý nysandaryn, aýyl sharýashylyǵy úshin organıkalyq tyńaıtqyshtar óndirý zaýytyn, jylyjaı keshenin salýǵa daıyn ekenin málimdedi. Kompanııanyń búgingi kúnge deıin Almaty men Astana qalalarynda birqatar jobalar boıynsha jemisti jumys istep kele jatqanyn aıtqan kásipker sý kózderin ashý jáne ony tazalaý qyzmetin usynyp, sol arqyly sý tapshylyǵyn azaıtý jobasy men Shymkentte qoǵamdyq kólikterge arnalǵan aıaldamalardy salý usynysyn pash etti. Al «Kazsısoft» JShS-niń bas dırektory Batyrbek Ábdildın ákimge densaýlyq saqtaý salasyndaǵy tyń jobalaryn jetkizdi. Dárigerdiń naýqastyń jaǵdaıyn qashyqtyqtan baqylap otyrýǵa múmkindik beretin qosymsha jańa qyzmetin emdeý-profılaktıkalyq sharalaryna engizýge bolatynyn jetkizgen bıznesmen atalǵan jobanyń Astana qalasyndaǵy qalalyq klınıkalarda sátti júzege asyrylyp jatqanyn aıtty. Túrik kásipkerleriniń osynaý tyń jobalaryn ońdy qabyldaǵan Janseıit Qanseıituly barlyq usynystar boıynsha ınfraqurylymdyq jerlerdiń berilip, ákimdik tarapynan tıisti qoldaýlardyń uıymtastyrylatynyn habarlady. «Jobalardyń barlyǵy kóńilge qonymdy. Endi, tek iske kirisý ǵana qaldy. Ol úshin ákimdik jaǵynan jer bólý, ınfraqurylymyn retteý, salyqtan bosatý syndy jaǵdaılar qarastyrylatyn bolady. Mysaly, jylyjaı keshenin damytý boıynsha, ázirge, 100 gektar jerdi jalǵa alýǵa bolady. Jumystar óz deńgeıinde júrgizilip jatsa, onyń kólemin ulǵaıtý jaǵyn qarastyramyz», - oblys ákimi J.Túımebaev. Investorlar usynysqa qyzyǵýshylyq tanytyp, qarjy salýǵa ynta tanytyp otyr.