Qostanaı oblysyna jumys sapary barysynda QR Parlamenti Májilisiniń Tóraǵasy Nurlan Nyǵmatýlın oblystyq qan ortalyǵynda medısına sala qyzmetkerlerimen kezdesti, dep habarlady Májilistiń baspasóz qyzmeti.
Májilis Tóraǵasynyń aıtýynsha bizdiń elimiz densaýlyq salasynda eshbir elden kem emes. Mysaly, respýblıka kóleminde sapaly medısınalyq qyzmettiń biryńǵaı standarttary engizildi, álemdik tájirıbege sáıkes medısınalyq klasterler quryldy.
Kez-kelgen naýqasty alǵashqy kúnnen anyqtaýǵa jáne aldyn-alýǵa jol ashatyn ulttyq skrınıng jasaý da bizdiń medısınadaǵy úlken jetistik.Jalpy táýelsizdik jyldarynda memleket esebinen 1300-den astam aýrýhanalar men basqa da densaýlyq saqtaý mekemeleri salyndy.
N.Nyǵmatýlın atap ótkendeı, osynyń barlyǵy deni saý ult qalyptastyrý jolyndaǵy memlekettik mańyzdy bastamalardyń jemisi.
Prezıdentimiz óziniń «Qazaqstan - 2050» Strategııasynda jáne «100 naqty qadam» Ult Josparynda densaýlyq salasyn damytýǵa qatysty jańa mindetter qoıǵanyn alǵa tartty.
"Tikeleı Prezıdentimizdiń tapsyrmasymen elimizde áleýmettik medısınalyq saqtandyrý júıesi engizilgenin erekshe atap ótý kerek. Bul mańyzdy bastamany zań jaǵynan qoldaý úshin Májiliste mindetti áleýmettik medısınalyq saqtandyrý týraly zań jobasy maquldanǵan bolatyn. Bul egemen elimiz úshin óte mańyzdy áleýmettik reforma ekeni sózsiz", - dedi Májilis Spıkeri. Al, jalpy Májiliste osy sessııada 81 zań jobasy jumysqa alynyp, onyń 51-i maquldandy.
Erekshe atap ótetin jaǵdaı, 9 zań jobasyna depýtattarymyz ózderi bastamashy boldy.
Májilis Tóraǵasy aımaqqa sapary barysynda «Qostanaı melkombınaty» aksıonerlik qoǵamynyń tynysymen tanysty.
