Úsh sportshyda úmit bar

Atyraýda ázirge qysqy sport túrlerinen top jarardaı saıypqyran sportshylar shyǵa qoıǵan joq. Degenmen, 2015 jyldan beri qostanaılyq Denıs Nıkısha men Olga Tıhonova, ońtústikkoreıalyq Iong A Kım munaıly óńirdiń qysqy sportyn alǵa ozdyrýǵa talpynyp júr. Endi osy úsh short-trekshi taıaýda Almatyda jalaýy jelbireıtin Ýnıversıadaǵa qatysqaly otyr. Denıs Nıkısha ol Sochıde ótken qysqy Olımpııa oıyndarynda tórtinshi orynǵa taban tiregen. Budan on jyl buryn short-trekpen etene «dostyǵyn» Qostanaı oblysynda bastaǵan. Qazir onyń jasy 21-de. Sporttaǵy jetis­tigi az emes. Eki jyl buryn álem chem­pıonatynyń qola júl­desine ıe bolǵan. Keıin AQSh-taǵy Álem kýbogy úshin tartysty synda da júldeli úsh­tik­tiń qatarynan kórindi. Al Oń­tústik Koreıadaǵy osyndaı dúbir­li dodada kúmis júldeni ıelendi. Denıs sporttyń osy túrine baýlıtyn seksııaǵa 4-synypta jazylypty. «Bizdiń synyptaǵy oqýshylardy bir er adam men áıel konkımen syrǵanaýǵa shaqyrdy. Alǵashqy bop men jazyldym. Keıin bildik qoı, olar Qostanaıdaǵy №3 balalar jáne jasóspirimder sport mektebiniń ustazdary Petr jáne Ksenııa Gamıdovtar eken. Alǵashqy qa­damymdy osy ustazdardyń tobynda bastadym. On alty jasymda birinshi ret Avstralııada ótken jastar arasyndaǵy álem chempıonatyna qatysyp edim» dep eske alady ol qazir. Al Almatydaǵy Ýnıversıadada Qytaı, Ońtústik Koreıa sport­shylarynyń basty qarsylasy bolatynyn joqqa shyǵarmaıdy. Taǵy bir sportshy – Olga Tı­ho­nova da Qostanaıdan qanat­tanǵan short-trekshi. Onyń da sporttyń osy túrinen jına­ǵan tájirıbesi az emes. Birne­she ret álem chempıonattary men ký­bogyn sarapqa salǵan doda­lar­ǵa qatysyp, aıtarlyqtaı je­tis­tikterge qol jetkizgen. Bir­neshe ha­lyqaralyq saıys­tar­dyń júl­degeri atanǵan. Biraq Ýnı­ver­sıadaǵa alǵash ret qatys­qaly otyr. Olganyń aıtýynsha, munda top jarýǵa múmkindigi bar. О́ıtkeni, qazaqstandyq short-trekshiler elimizde ótetin do­daǵa byltyrǵy maýsymnan beri tyń­ǵylyqty daıyndalýda. Kúnine 6 saǵat jattyǵady. «Bizdiń komandamyzdyń júl­de alatyndaı senimi zor. О́ıt­keni, bul Ýnıversıada óz elimiz­de ótetin­digi bárimizge úlken jaýap­kershi­lik júkteıdi. Demek, Ýnı­ver­sıa­danyń júl­desin elde qal­dyrýǵa bar sheber­ligimizdi sala­myz», deıdi 19 jasar sportshy qyz. El namysyn qorǵaýǵa Aty­raý­dyń atynan qatysatyn Iong A Kım Ońtústik Koreıadan kelgen. Qazaq elin, qazaq jerin jatsynbaı, halyqaralyq jarystarda Qazaqstannyń namysyn tabysty qorǵap júr. Short-trekten el ishindegi chempıonatta top jarǵan. Sonymen birge, myqty sportshylar qatysqan Azııa chempıonatynda júldeli orynnan kórinip, qazaqstandyq sporttyń órge basýyna úlesin qosyp keledi. Joldasbek ShО́PEǴUL, «Egemen Qazaqstan» ATYRAÝ