– Ne isteımiz bul!.. Kúıeý balam, burynǵy-burynǵy ma, búgin odan da zoryn shyǵaryp, sheshesi men kelinshegin – qudaǵıym men qyzym ekeýin birdeı eńiretip jatyr deıdi... Erteń merekelik shyrshada Aqshaqar bolyp kıinip, taqpaq aıtyp, bı bılep, ónerin kórsetetin 1 synyptaǵy búldirshinderiniń – mekteptiń shyrshasyna qatysýyna tyıym salypty. Munyń aldynda ǵana týǵan inisiniń úılený toıyna kelinshegine moıny qymtalyp, uzyn jeń, tobyǵyn japqan kóılek kımese aparmaıtynyn aıtyp, shashtarazǵa barǵyzbaı, qıǵylyq salǵan. Ol jigit osyǵan deıin bir turaqty jumysqa tumsyq tyǵyp kórmegen, iship alyp, tóbelesten kóz ashpaıtyn, osy kelinshegin de ekiqabat qyp qoıyp, ol qyz ózine qol jumsaýǵa bara jazdap, is nasyrǵa shabatyn bolǵan soń ǵana úılengen jigit edi. «Basy qatty bolsa – aıaǵy tátti bolar» dep jubatysqan ata-analardyń baǵyna taǵy eki-úsh balaly bolyp, nemere súıgizgen jas otaý ıesi keıingi jyldary ishkenin qoıyp, namazǵa jyǵylyp, sol aýyldyń meshitine baryp, ýaǵyz tyńdap júrgenin estigende, jaqyn-jýyqtary turmaq, syrttaǵy bizder de qýanǵanbyz. Biraq, onyń namazxanǵa aınalýynyń endi osyndaı túıtkilderi shyǵa bastady. Artyq sóılegenimizdi bir Alla keshirsin, laıym!
... Úsh balasyna qarap, emizýli kishkentaıymen úıde otyrǵan kelinshegine de, «Balapan» telearnasyna telmiretin sábılerine de teledıdar tamashalaýǵa úzildi-kesildi tyıym saldy. О́zi jalǵyzilikti sheshesiniń qolynda, qýyqtaı baspanada osy shıetteı bala-shaǵasymen birge turatyn, jalǵyz bala. Anasyn «ishimdik ishesiń» dep úıinen qýyp shyqty. Ras, «ózine de obal joq», dep syrtynan kinálap, orta jasqa kelip qalǵan qudaǵıdy basqalarymyz aqtaı almadyq. Qazir ol áıel oblys ortalyǵyndaǵy úılerdiń birin jalǵa alyp, turyp jatyr.
... «Osy mektep degen, báleniń bárin úıretetin! Jańa jyl degen orystardyń meıramy! Shyrshaǵa jibermeımin qyzymdy!» dep bulqan-talqan bolyp, úıdegi balapandaryn úrpıtip, kezekti bir soıqan jasaǵan áke mektep tabaldyryǵyn endi attap, órkenıetti oqý men bilimge umtyla talpynyp, apyl-tapyl qadam basqan bul qyzdy «Mektepten shyǵaryp alyp, medresege berem!» dep qylqyna julqynyp otyr deıdi. Kereǵar pikirli jas ákeni muǵalimderiniń ýájine toqtata almaǵan mektep te «Merekelik baǵdarlamamyzda kórsetetin kóp óneri bar edi, «erteńgiliktiń» shyrqy buzylatyn boldy!
... Ákesin jaılap, kóndirip kórińizdershi!» dep suranyp, sharasyzdyq tanytypty... Ne kerek, «qyryq kisi bir jaq, qyńyr kisi bir jaq». «Osydan sol qyzdy endi merekelik shyrsha túgili, mektepke sabaqqa jiberseń, kóresiń! Úsh bala da saǵan joq! «Talaq» etem seni! Ajyrasam! Ket, qury! Al balalar – meniki! О́lsem de saǵan bermeımin!» dep baıbalam salyp, qoqan-loqqymen qorqytqan er-azamatynan qudaıdyń qutty kúni taıaq jep, júnjigen jas kelinshek álem esigin qaǵyp kelip kirgen jańa 2017 jylǵa osyndaı nalamen kirdi... Qulyn-taıdaı quldyrańdap oınaıtyn qýyrshaqtaı dostarynan –qatarynan qalyp, sora-sora bolyp aqqan kóz jasynan aıǵyzdalǵan júzin jóndep áli jýa almaı júrgen birinshi synyptyq álgi balapan qyz Aıaz atanyń da tátti-páttisi men syılyǵynan qur qalypty... Sonda bul azamat kimge «qıyn» qyldy?!.
Úmit BITENOVA, aqyn, Jazýshylar odaǵynyń múshesi
