Maqsat – qaýipsizdik pen damýdyń úılesimin ornyqtyrý

Qazaqstan ótken jyly Birikken Ulttar Uıymy Qaýipsizdik Keńesiniń turaqty emes múshesi bolyp saılanǵan kezde elimizdiń naqty nemen shuǵyldanatyny qazaqstandyqtar úshin belgisizdeý jáne kómeskileý sııaqty edi. Degenmen, qandaı istiń de júzege asýynyń belgili bir ýaqyty, dál urymtal tusy bolatynyn da eskergen jón. Mine, dál osy syndarly sát bıylǵy jyldyń basyna, ıaǵnı Qazaqstan joǵaryda atalǵan halyqaralyq mıssııasyn bastaǵan kezge tuspa-tus kelip otyr. Bul Qazaqstan Prezıdenti Nursultan Nazarbaevtyń BUU QK-ge Saıası úndeýi bolyp tabylady. Úndeýde Qazaqstannyń qaýipsiz, ádil jáne órkendegen álem qurý úshin jahandyq áriptestikti nyǵaıtý jónindegi tujyrymdamalyq kózqarasy taıǵa tańba basqandaı aıqyn kórsetilgen. Sondaı-aq, Úndeýdiń BUU Bas hatshysy Antonıý Gýterresh myrzanyń óz qyzmetine kirisken kezine jáne Qazaqstan Respýblıkasynyń BUU-daǵy músheligine 25 jyl tolý qarsańynda jarııalanýynyń da aıtarlyqtaı sáıkestiligi bar ekenin aıtqym keledi. Qazaqstan Prezıdentiniń atynan aıtylǵan tujyrymdamalyq kózqaras artyq ta emes, kem de emes, tup-týra jeti basymdyqtan turady. Jalpy aıtqanda, jeti sanyn halqymyz kıe tutatynyn, bul san tek sátti, biryńǵaı jaqsylyq pen tek oń nıettegi joramaldarmen sabaqtastyryla, baılanystyryla aıtylatynyn da eskergen jón. Taǵy bir aıtaıyn degenim, Qaýipsizdik Keńesiniń turaqty jáne turaqty emes músheleri bar ekeni belgili. Qazaqstan olarmen birlesken is-qımyldy qalaı qalyptastyra alady? Bul jóninde Saıası úndeýde kórsetilgen naqty tujyrymdar kez kelgen adamnyń sana-sezimine tez qonaqtaı qalaty­nyna eshqandaı kúmánim joq. Iаǵnı, munyń basty joly jahandyq jáne óńirlik syn-qaterlerdiń sheshimin birlesip tabýdy izdestirý jáne birlesip sheshý bolmaq. Sondaı-aq, bul jónine ujym­dyq jaýapkershilik qalyp­tastyrýdyń qajettiligi de ortaq iske tek tıimdilik ákelmek. Qazaq­stan Prezıdenti Nursultan Nazarbaev Saıası úndeýde kór­setilgen jeti basymdyq – Qa­zaqstannyń BUU-da aldaǵy eki jyldyń ishinde atqaratyn qyzmetiniń aıqyn baǵdarlamasy ispettes. Bulaı deý az. Osy jeti basymdyq BUU qyzmetiniń basty maqsaty – ıadrolyq qarýsyz álem qurýǵa qosatyn Qazaqstannyń qa­rysh­ty qadamynyń qujat túrin­degi kórinisi deýge de bolady. О́tken seısenbi kúni Qazaqstan alǵash ret BUU Qaýipsizdik Ke­ńesiniń turaqty emes múshesi retinde onyń «Shıelenisterdiń aldyn alý jáne beıbitshilikti saqtaý» taqyrybyndaǵy ashyq pikirtalasyna qatysqany belgili. Osy pikirtalas kezinde Qazaqstan Prezıdentiniń Úndeýi otyrys qatysýshylarynyń joǵary baǵasyna ıe bolǵany ári osy Úndeýdi BUU QK-niń resmı qujaty retine tirkeý týraly sheshim qabyldanǵany da tekten tek emes. Bul, birinshiden, Saıası úndeýdiń salmaǵy men mańyzynyń jáne ózektiliginiń basty belgisi. Beıbitshilik jáne qaýipsizdik pen damý uǵymdaryn bir-birinen bóle-jara qaraýǵa bolmaıdy. Bul úsheýi qashanda bir-birimen úndesip jáne birin-biri tolyqtyryp otyrady. Qazaqstan Prezıdentiniń Saıası úndeýi sonyń báriniń baılanystylyǵyn dál ári naqty túrde tujyrymdaı bilýimen qundy dep bilemiz. Haıdar QAPANOV, saıasattanýshy