Golovkın men Alvarestiń komandalary kelissózder júrgizip jatyr

Gennadıı Golovkınniń promoýteri Tom Lefflerdiń aıtýynsha qazaqstandyq boksshynyń komandasy meksıkalyq Saýl «Kanelo» Alvarespen jekpe-jek ótkizý jóninde kelissózder júrgizýde. Ol úshin GGG 18 naýryzda Dennıel Djeıkobsty utýy qajet, dep habarlady vesti.kz. «Ázirge eshnárse sheshilmedi, kelissózderdi júrgizýdemiz. Egerde bul isti tezirek aıaqtaıtyn múmkindik bolsa jaqsy bolar edi. Biraq eń birinshi Gennadıı 18 naýryzda Dennıdi jeńýi tıis. Al kútpegen jerden jeńiler bolsa, bolashaqta qandaı jekpe-jek uıymdastyrsam da esh mańyzy joq. Birinshi óziniń tıtýldaryn saqtap qalýy qajet. Qalǵany bolashaqtyń enshisinde», – dedi Leffler. «Madison Square Garden arenasynda ne bolaryn boljap bilý qıyn. Ekeýi de jeńisterine senimdi. Menińshe, bireýi nokaýtpen jeńedi. Al qajetti nátıjege jeter bolsaq, úlken jekpe-jekter uıymdastyramyz dep úmittenemin», – dedi Golovkınniń promoýteri. Buǵan deıin qazaqstandyq sportshy Alvarespen judyryqtasý bárinen de mańyzdy ekenin málimdegen. Onyń pikirinshe, bul istiń oryn almaýyna meksıkalyqtyń promoýterleri kináli.