Attestattaýdan qandaı memlekettik qyzmetkerler bosatylady?

2016 jyly etıkalyq normalardyń saqtamaǵany úshin 200 memlekettik qyzmetshi jaýapkershilikke tartyldy. Bul týraly Ortalyq kommýnıkasııalar qyzmetinde «B» korpýsynyń memlekettik ákimshilik qyzmetkerlerin keshendi attestattaý» taqyrybynda ótken baspasóz konferensııasynda Memlekettik qyzmet isteri jáne sybaılas jemqorlyqqa qarsy is-qımyl agenttik tóraǵasynyń orynbasary Aıgúl Shaıymova málim etti. Spıkerdiń aıtýynsha, bıylǵy attestattaýdyń burynǵylardan ereksheligi, ol qyzmetkerlerdiń biliktiligin arttyrý úshin olardyń kásibı daıarlyǵy men múmkindikterin anyqtaýǵa baǵyttalǵan. «Bul jalpy búgingi qoǵamnyń suranystary men halyqqa qyzmet etý qaǵıdalaryna jaýap beretin memlekettik apparat qalyptastyrý úshin qajet», – dep atap ótti A.Shaıymova. Ol sondaı aq bıyl «B» korpýsynan shamamen 65 myń memlekettik qyzmetker keshendi attestattaýdan ótetinin málimdedi. «Ortalyq deńgeıde – sarapshylardan mınıstrlik pen vedomstvo departamentteriniń dırektorlaryna deıin, oblystyq deńgeıde – mamandardan jergilikti atqarýshy jáne aýmaqtyq organdardyń basshylaryna deıin, al aýdandyq deńgeıde – aýyl ákimdikteriniń jetekshi mamandarynan aýdan ákimderiniń orynbasarlaryna deıin jáne mamandardan aýmaqtyq organ basshylaryna deıin attestattaýdan ótetin bolady», – dedi agenttik tóraǵasynyń orynbasary. Sondaı-aq ol attestattaýdan bosatylatyn memlekettik qyzmetkerler týraly aıtyp ótti. «Bul sanatqa dekrettik demalystaǵy, aıaǵy aýyr áıelder, sondaı-aq 3 jasqa tolmaǵan balalary bar áıelder, 14 jasqa tolmaǵan balalardy tárbıelep otyrǵan jalǵyzbasty analar men ákeler jatady. Sonymen qatar, zeınetaldy jastaǵy qyzmetkerler, «A» korpýsynyń kadrlyq rezervinde turǵandar jáne memlekettik qyzmetke alǵash ret alynyp, alty aıdan az ýaqyt jumys istegen qyzmetkerler attestattaýdan ótpeıdi», – dep túsindirdi A.Shaıymova.