Jańa basshy zeınetaqy qoryn damytý josparyn aıtty

«Biryńǵaı jınaqtaýshy zeınetaqy qory» AQ-nyń jańa basqarma tóraǵasy Nurbıbi Naýryzbaeva qordy damytýǵa qatysty josparyn aıtty, dep habarlaıdy QazAqparat. «Meniń jumysymnyń negizgi prınsıpi - qordyń salymshylary men zeınetaqy alyp otyrǵan adamdardyń múddelerin qorǵap, qamqor bolý», - deıdi ol. Jańa basshysynyń aıtýynsha, eń aldymen BJZQ qyzmetiniń ashyqtyǵyna qol jetkiziledi. Qordyń salymshylary men zeınetaqy alyp otyrǵan adamdarmen arada tıimdi aqparattyq jáne kommýnıkasııalyq baılanys ornamaq. Sonymen qatar, qordyń operasııalyq jáne qarjy-sharýashylyq qyzmetiniń ashyqtyǵyn arttyrý úshin aqparattyq jumys júrgiziledi dep boljanyp otyr. N.Naýryzbaevanyń aıtýynsha, ekinshi basty mindet - qordyń ishki jumysyn jaqsartý, ıaǵnı BJZQ ishindegi baqylaý júıesin kúsheıtý. «Úshinshi baǵyt - aksıonerlermen, retteýshilermen birge jınaqtaýshy zeınetaqy júıesin reformalaý boıynsha jumysty kúsheıtý kerek. Azamattardyń oqýy, emdelýi, úı alýy úshin jınaǵyndaǵy qarjysynyń bir bóligin alýǵa múmkindik berý, salymshyǵa basqarýshy kompanııany tańdaýǵa nemese óziniń zeınetaqy jınaǵyn basqarý strategııasyn tańdaýǵa múmkindik berý sııaqty  bastamalar talqylanady», - dep jalǵastyrdy N.Naýryzbaeva. «Osylaısha, zeınetaqy qoryndaǵy meniń negizgi jumysym - qordyń jumysyn jaqsartyp, halyq senimin arttyrý», - dedi N.Naýryzbaeva.