Qyzylorda oblysyndaǵy 9 mádenı eskertkish IýNESKO-nyń aldyn ala tizimine endi

Qazaqstan Respýblıkasynyń IýNESKO jáne ISESKO isteri jónindegi Ulttyq komıssııasynyń kezekti otyrysy ótken jyly Qyzylorda oblysynda uıymdastyrylǵan bolatyn. IýNESKO-nyń dúnıejúzilik muralarynyń aldyn ala tizimine oblys aýmaǵyndaǵy Syǵanaq, Jankent, Kesken-kúıik, Shirik-Rabat, Bábish-mola, Jent, Balandy qalashyqtary, Jetiasar mádenı eskertkishteri jáne Saýysqandyq petroglıfteri engizilgen. Bul týraly óńirlik ákimdiktiń baspasóz qyzmeti habarlaıdy. Sonymen qatar, Qyzylorda oblysynyń tarıhı-mádenı muralaryn qorǵaý jáne paıdalaný jónindegi ǵylymı-ádistemelik keńestiń otyrysy ótkizilip, nátıjesinde bıylǵy jyly arheologııalyq qazba jumystary júrgiziletin obektilerdiń aýqymy keńeıtilgen. Osy jyly Jent, Sortóbe, Kerderi kesenelerine de qazba jumystary júrgiziletin boldy. Búgin О́ńirlik kommýnıkasııalar qyzmetinde ótken baspasóz máslıhatynda oblystyq mádenıet, arhıvter jáne qujattama basqarmasy basshysynyń mindetin atqarýshy Mıra Ábýova  jyl sońynda Mádenıet jáne sport mınıstrligi janyndaǵy eskertkishterge mártebe berý jónindegi arnaıy komıssııa otyrysy uıymdastyrylǵanyn aıtyp ótti. Otyrysta oblystaǵy 9 eskertkish respýblıkalyq mańyzy bar tarıh jáne mádenıet eskertkishteriniń memlekettik tizimine engizildi.