Astanada dúnıejúzilik opera konkýrsy ótedi

Uly opera ánshisi ári dırıjer Plasıdo Domıngo negizin qalaǵan vokalshylardyń dúnıe júzindegi eń bedeldi «Operalııa» baıqaýy Qazaqstanda alǵash ret ótedi, dep habarlaıdy «Astana Opera» teatrynyń baspasóz qyzmeti. Jıyrma besinshi ret uıymdastyrylǵaly otyrǵan Opera óneriniń dúnıejúzilik konkýrsy  QR Mádenıet jáne sport mınıstrligi qoldaýymen 2017 jyldyń 24 - 29 shildesi aralyǵynda «Astana Opera» sahnasynda ótkiziledi. «Astana Opera» teatrynyń óner ujymy «EKSPO-2017» kórmesine oraı, este qalarlyq keremet sharalar baǵdarlamasyn ázirledi. Solardyń qatarynda «Operalııa» da bar. Maestro Domıngonyń álemdik opera ónerine qosqan úlesine baǵa jetpeıdi. Mundaı deńgeıdegi tulǵamen birge jumys isteý- biz úshin úlken maqtanysh, - deıdi «Astana Opera» memlekettik opera jáne balet teatrynyń dırektory, Qazaqstannyń eńbek sińirgen qaıratkeri Ǵalym Ahmedıarov. «Operalııa» baıqaýyna 18 ben 32 jas aralyǵyndaǵy kez kelgen ánshi (bas daýsynan bastap, sopranoǵa deıin) qatysa alady. Astanaǵa dúnıejúziniń túkpir-túkpirinen 40 jýyq daryndy vokalshylar keledi. Aldyn-ala irikteý elektrondyq ótinish boıynsha 2016 jyldyń jeltoqsanynan bastap, 2017 jyldyń aqpanyna deıin júredi. Baıqaý úsh kezeńnen turady jáne maestro Domıngonyń «Astana Opera» Sımfonııalyq orkestrine jetekshilik etýimen ótetin jeńimpazdardyń gala konsertimen aıaqtalady. Baıqaýdyń talabymen jáne jańalyǵymen Operalııa saıtynda tanysýǵa bolady.