Fýtboldan Reseı quramasynyń eks-kapıtany, «Qaırat» komandasynyń oıynshysy Andreı Arshavın Gazeta.rý basylymyna suhbat berip, Qazaqstandaǵy ómiri týraly aıtyp berdi.
«Azııa eli bolǵandyqtan shyǵar, jabyq kıim kóp. Dastarhan basynda er adam basty orynda, áıel adam tyńdaýshy. Basqa jaǵynan da óziniń erekshelikteri bar. Bul jaǵdaı eldiń ońtústiginde kóp kezdesedi. Qazaqstannyń soltústik qalalarynyń reseı qalalarynan aıyrmashylyqtary az», – dedi Qazaqstannyń negizgi mádenı erekshelikteri týraly jýrnalıstiń suraǵyna jaýap bergen fýtbolshy.
Arshavın qazaqtyń ulttyq taǵamy ettiń dámin áli tatpaǵanyn aıtty. Sebebi, onyń syrt kelbeti unamaıdy eken. Biraq munda kelgeli fýtbolshy jylqy etin kóp jeıtin bolypty. «Qazaqstanda jylqy eti kóp taraǵan. Ol barlyq meıramhanalarda bar, bazardan da tez taýyp alýǵa boaldy», – dedi ol.
«Qazaqstanda eń tanymal ánshi – Qaırat Nurtas. Onyń Nıýshamen aıtatyn ánin men kóp estidim. Bul jaqsy shyqqan dúnıe boldy», – dedi «Zenıt» pen «Arsenaldyń» burynǵy oıynshysy.
Arshavınniń aıtýynsha, Almatyda oǵan taý erekshe unaǵan. «Alǵash kelgende qatty tań qalǵanym ras. Sebebi, men taýdyń mańaıynda eshqashan turǵan emespin. Bara-bara bul da qalypty jaǵdaıǵa aınaldy», – dedi sportshy.
«Jazdy kúnderi Gorkıı parkinde qydyrǵandy jaqsy kóremin. Meni bazardan da kezdestirýge bolady. Sebebi, ol jerge jıi baramyn. Sırek bolsa da, Shymbulaqqa baryp turamyn», – dedi ol.
Qazaqstan men Reseı chempıonattarynda qandaı aıyrmashylyq bar ekenin suraǵanynda: «Eń birinshi oıynshylardyń deńgeıinde. Biraq men úshin eń basty problema – syrt alańda óner kórsetý. Alańdardyń sapasy óte nashar. Eger olardy jańartsa, tek «Qaırat» qana emes, basqa da oıynshylarǵa da jaqsy fýtbol kórsetýge múmkindik zor bolar edi», – dedi legıoner.
«Shymkentte aýa raıy jyly bolsa da, oǵan degen kútim az. Sondaı-aq, «Jetisý» komandasyn alaıyq. Taldyqorǵan men Almatynyń kún raıy birdeı bolǵanmen, sapasy óte nashar. Amalsyzdan oınaımyz. Al jasandy alań týraly aıtar bolsam, Oraldy, Atyraýdy tilge tıek etýge bolady. Jasandy bolǵanmen, Pavlodarǵa sapasy joǵarǵysyn tósegen. Al Astana-Arenada oınaǵym kelmeıdi. Munda tabıǵı gazon bolmaǵanmen, zaman talabyna saı jasandysyn qoıýy kerek sııaqty. Sebebi, áriptesińe pas berseń, doptyń qaı baǵytqa, qandaı jyldamdyqpen ushatynyn boljap bile almaı ábiger bolasyń. Shyny kerek, kásibı fýtbolda mundaı jaıt bolmaýy tıis», – dedi «Qaırattyń» jartylaı qorǵaýshysy.
Suhbat barysynda ol Qazaqstan Kýbogynyń fınalynda jankúıerlerge laqtyryp jibergen medali týraly da qozǵady.
«Aýa raıy óte qolaısyz bolatyn. Bári aıaqtalǵannan keıin ishke qaraı kirip bara jatqan betim bolatyn. Sol kezde jankúıerlerdiń qoldaýyn kórip, biz úshin tolassyz jaýǵan qarǵa qaramastan stadıonǵa kelgenderine ishteı rıza bolyp, medalimdi solarǵa qaraı laqtyrýdy jón kórdim. Ol adamǵa menen qalǵan bir estelik bolsyn. Biraq bir ókinishtisi «Aqjaıyq» jankúıeriniń qolyna túsipti. Al óz qoldaýshylarymyz alǵanda ómir boıy saqtap ótetinine senimdi bolar edim. Degenmen, jaqsy nıetti jaman qyrynan kórsetkisi keletinderge tań qalamyn. Ol adam medaldi satqysy kelipti, satsyn. Ol óziniń quqyǵy. Men bul jerde eshnárse de isteı almaımyn. Eger de Qazaqstan birinshiliginde jeńiske jetip jatsaq, dál osylaı júldemdi jankúıerler jaqqa laqtyrar edim. Kimniń qolyna tússe sol ıesi bolady. Osy jol durysyraq sııaqty. Sebebi, kópshiliktiń arasynan bireýin tańdap ala almaımyn», – dedi Andreı.
