Nazarbaev BAƏ-niń isker top ókilderimen kezdesti

Memleket basshysy Birikken Arab Ámirlikteriniń isker toptar ókilderimen kezdesti. Bul týraly Aqordanyń baspasóz qyzmeti habarlady. Kezdesýge ámirlikterdiń álemdik deńgeıde jumys júrgizetin jetekshi kompanııalarynyń basshylary qatysty. Qazaqstan Prezıdenti Birikken Arab Ámirlikteri Qazaqstannyń Taıaý Shyǵys aýmaǵyndaǵy negizgi seriktesiniń biri ekenin atap ótti. Nursultan Nazarbaev táýelsizdik alǵaly beri elimizge Birikken Arab Ámirlikterinen kelgen tikeleı ınvestısııa kólemi 2 mıllıard dollarǵa jýyqtaǵanyn aıtty. – Qazaqstanda ámirlikter kapıtalynyń qatysýymen 200-ge jýyq birlesken kásiporyn jumys isteıdi. Olar aýyl sharýashylyǵy, metallýrgııa jáne energetıka salalaryn qamtıdy. «Mýbadala» memlekettik ınvestısııalyq kompanııasymen tyǵyz baılanys ornaǵan, – dedi Memleket basshysy. Qazaqstan Prezıdenti Astanada jalpy quny 1,6 mlrd dollar bolatyn «Abý Dabı Plaza» eki jaqty iri ınvestısııalyq jobasy iske asyrylyp jatqanyn erekshe atap ótti. Sondaı-aq, Nursultan Nazarbaev elimizdiń ekonomıkany ártaraptandyrýǵa aıryqsha kóńil bólip, ozyq 30 memlekettiń qataryna qosylý mindetin aldyna qoıyp otyrǵanyna toqtaldy. – Osy maqsatqa jetý úshin Qazaqstanda bızneske barynsha jeńildikter qarastyrylyp, ınvestısııa tartýǵa qolaıly jaǵdaı jasalýda, – dedi Memleket basshysy. Qazaqstan Prezıdenti respýblıkamyzda júrgizilip jatqan birqatar júıeli sharalar men ınstıtýsıonaldyq reformalarǵa toqtalyp ótti. – Táýelsizdik jyldary elimizdiń ekonomıkasyna jumsalǵan sheteldik tikeleı ınvestısııa 265 mıllıard dollardan asady. Dúnıejúzilik banktiń «Bıznes júrgizý jeńildigi» reıtınginde Qazaqstan 35-shi orynǵa ıe boldy. Búgingi tańda 56 memlekettiń azamattary Qazaqstanǵa vızasyz kele alady. Olardyń qatarynda Birikken Arab Ámirlikteri de bar, –dedi Nursultan Nazarbaev. Memleket basshysy ındýstrııalandyrý baǵdarlamasyn júzege asyrýǵa Birikken Arab Ámirlikteri kompanııalaryn belsene qatysýǵa shaqyryp, elimiz jan-jaqty ınvestısııalyq qoldaý kórsetýge daıyn ekenin jetkizdi. – Basymdyǵy bar salalarda ınvestor korporatıvtik tabys salyǵynan jáne jer salyǵynan 10 jylǵa, múlik salyǵynan 8 jylǵa bosatylady. Sheteldik kásipkerlerge qoldaý kórsetetin Sheteldik ınvestorlar keńesi 19 jyldan beri tıimdi jumys atqaryp keledi, – dedi Qazaqstan Prezıdenti. Budan bólek, Nursultan Nazarbaev Qazaqstanda 10 arnaıy ekonomıkalyq jáne 20 ındýstrııalyq aımaq jumys isteıtinin aıtty. – Bizdi Birikken Arab Ámirlikteriniń ındýstrııalyq aımaqtar jumysy jónindegi tájirıbesi qyzyqtyrady. Biz osyndaı aımaqtardy ámirlikter kompanııalarynyń basqarýyna berýge daıynbyz, – dedi Memleket basshysy. Qazaqstan Prezıdenti ámirlikterdiń bıznesmenderine Qazaqstanda qazir iri memlekettik nysandardy jekeshelendirý naýqany júrip jatqanyn, onyń aıasynda jeti júzdeı memlekettik kásiporyn satylymǵa shyǵarylǵanyn jetkizdi. – Bul – taý-ken metallýrgııasy, munaı óndirý, energetıka, kólik jáne baılanys salasyndaǵy kásiporyndardyń, ınfraqurylym nysandarynyń aksııalary. Biz ámirlikter kompanııalarynyń osy jekeshelendirý isine atsalysýyn biz quptaımyz, – dedi Nursultan Nazarbaev. Memleket basshysy «Astana halyqaralyq qarjy ortalyǵynyń qyzmetine jáne Abý-Dabıdegi sammıtpen taqyryby ortaq aldaǵy «EKSPO-2017» halyqaralyq kórmesine toqtalyp ótti. – Qazaqstannyń elordasynda bıyl «Bolashaqtyń energııasy» taqyrybymen «EKSPO-2017» halyqaralyq kórmesi ótedi. Oǵan 110-nan astam memleket, 18 halyqaralyq uıym jáne jańartylatyn energetıka salasyndaǵy jetekshi álemdik kompanııalar qatysady. Ámirlikter – arab memleketteri arasynan «Astana EKSPO-2017» kórmesine qatysatynyn resmı túrde rastaǵan birinshi memleket, – dedi Qazaqstan Prezıdenti. Nursultan Nazarbaev eki jaqty kelissózder aıasynda «Astana EKSPO – 2017» men «Bıýro EKSPO Dýbaı 2020» arasynda yntymaqtastyq týraly memorandýmǵa qol qoıylǵanyn atap ótip, «jasyl» energııa nemese balamaly jáne jańartylatyn energııa salasy boıynsha Birikken Arab Ámirlikterimen arada tabysty yntymaqtastyq ornaıdy dep úmittenetinin jetkizdi. Sońynda Memleket basshysy kezdesýge qatysýshylardyń bárine alǵys aıtyp, taraptar ózara tıimdi yntymaqtastyqtyń jańa múmkindikteri men bolashaǵyn aıqyndaı alatynyna senim bildirdi.